2
Khreq laq kan thag huh khanr suh che awg lawn ca mar lar che
1 A vix a nax teq paog, pong lag thad ngag nig hehd geh lag lehq, Ghig sa koz lar che tawd khuhd nig hehd haq ca mar ax che te yand, na sa jad che tawd khuhd yaw lehq cud yiq ma yiq haq yehd lehq ngag ca mar ax che ma hez.
2 Awg lawn ghod ver, nig hehd geh ngag chehd thad, Yer suq Khreq awg lawn he lehq yawd laq kan thag gha khanr suh che awg lawn haq lehax ngag sir tug yaog lehz, ngag duhd chez lar che yaog.
3 Nig hehd geh ngag chehd thad, awg ghad nud lehq kuhz jad ched jad che awg khuhn chehd che yaog.
4-5 Nig hehd yonr che ted ceng awr lehr, chaw yad ve cud yiq awg khuhn maq gha yeg tug he lehq Ghig sa ve kand pax awg khuhn lo yeg tug, ngag tawd yaw che lehd ma koz, bon mar ax che lehd ma koz, cud yiq tawd khuhd haq yehd lehq beg yug che ma hez. Kheh ma khuhd, Awg ha phu kanx haq pheq mar vid lehq, yawd ved kand pax awg khuhn mar vid che yaog.
Ghig sa pehar che awg ceng teq pa haq Awg ha phu pheq mar ax che
6 Yonr che khuhn awg ghad cawg che chaw teq pa haq ngag hehd cud yiq tawd khuhd mar vid che yaog. A meha ve teq co ve cud yiq haq koz che ma hez. Lug vehr mehx vehr che mig gig jawd mawd teq pa ve cud yiq haq liz koz che ma hez.
7 Kheh ma khuhd, khuhd ceh lar che he lehq cuhx kig nax jad che Ghig sa ve cud yiq haq ngag hehd mar che yaog. Cud yiq u ve awr lehr, a nig awg mig awg phond gha tug awg pun, mig gig maq te phanr ser thad loar, Ghig sa duhd chez lar che cud yiq phehq che yaog.
8 Cud yiq che haq a meha ve teq co ve jawd mawd teq pa liz, te ghad-eg maq sir. I hehd sir che heh ver, awg mig awg phond ve Awg jawd mawd te ghad haq laq kan thag huh thaq vehr tug ma hez.
9 Liq phu khuhn buhq lar che heh,
Ghig sa haq haq che chaw teq pa awg pun yawd ghu lar che awg ceng teq pa awr lehr,
mehz sir mad mawg jaw, nar puh ma kad jaw lehq,
chaw yad ve ni ma khuhn ma duhd sir jaw che yaog,
lehz buhq lar che yaog.
10 Kheh ma khuhd Ghig sa awr lehr, Awg ha phu haq cud lehq awg ceng che teq pa a nig haq pheq mar ax peor. Awg lawn ghod ver, Awg ha phu awr lehr awg gha lia haq ca ngawx lehq, Ghig sa ve nax jad che awg ceng teq pa haq liz yawd ca ngawx che yaog.
11 Chaw yad awg khuhn cawg lar che ni ma ma hez ver, chaw yad haq caz daq che awg ceng teq pa haq a sug sir gha tuawg le. U ve heh te lehq, Ghig sa ve Awg ha phu ma hez ver, Ghig sa haq caz daq che awg ceng teq pa haq liz chaw te ghad-eg liz sir maq gha.
12 A nig awr lehr, mig gig yad teq pa ve ni ma haq gha lar che ma hez. Kheh ma khuhd, Ghig sa a nig haq pehar lar che awg bon teq pa haq sir gha tug, Ghig sa lo lag che Awg ha phu haq a nig gha lar che yaog.
13 Awg bon u ve teq pa awg lawn mar vid che te yand, a nig awr lehr chaw yad mar lar che cud yiq haq cud lehq kawq mar vid che ma hez. Awg ha phu mar lar che heh te lehq a nig kawq mar vid che yaog. Co ha phawd awr ve awg lawn mar vid che te yand, co ha phawd awr haq caz daq che tawd khuhd haq cud lehq mar vid che yaog.
14 Ghig sa ve Awg ha phu ma cawg che chaw awr lehr, Ghig sa ve Awg ha phu haq caz daq che teq pa haq mad haq yug. Awg ceng u ve teq pa awr lehr, yawd awg pun cud yiq mad cawg che awg ceng phehq vehr che yaog. Co ha phawd awr haq lehax cud lehq u ve teq pa haq fir daq pehg daq gha cheaq te lehq, yawd awr lehr u ve teq pa haq maq sir vix.
15 Co ha phawd awr duhd pawnr che chaw awr lehr, awg gha lia haq fir daq pehg daq gha che yaog. Kheh ma khuhd, chaw u ve awg lawn haq te ghad-eg liz fir daq pehg daq maq gha.
16 Awg lawn ghod ver, Jawd mawd Ghig sa haq mar vid tug, yawd ved ni ma haq a sug sir cheawg le. Kheh ma khuhd, a nig awr lehr Khreq ve ni ma cawg lar che yaog.