4
Muhd nuh maq lo Ghig sa haq a kor pi che
1 U ve awg khaz nuhr ngag ngawx che te yand, ngawx lor, muhd nuh maq lo ghaz mir phawa lar che haq ngag gha mawg che yaog.
Kheh te lehq, behd mez che khuhd heh te lehq buhg che, awg kawd thad ngag haq yawa lehq ngag gha kad peg che awg khuhd awr lehr, ngag haq te pawz kawq koz ax che, “Chuhr huh taz laoq. Awg khaz nuhr gha phehaq tug awg lawn teq pa ngag nawg haq mar ax tug yaog,” lehd koz che yaog.
2 Teq pear lehax ngag Awg ha phu awg khuhn chehd lehq, ngawx lor, muhd nuh maq lo kaw jaw ted mag cawg chehd che he lehq kaw jaw u ve awg thag huh te ghad mi chehd che haq ngag gha mawg che yaog.
3 U huh mi chehd che te ghad awr lehr, awg ghiz laex ceng cawg che huhx meh sehnx he lehq nix-i ghad te che huhx meh sehnx haq sur che yaog. Nuh naz che huhx meh sehnx haq sur che muhd naz seh ghig awr lehr, kaw jaw u ve haq kha caw yuhd cawag vehr che yaog.
4 Kaw jaw u ve ted mag kha caw yuhd huh kaw jaw niq chi uhg lehd cawg che yaog. Kaw jaw u ve teq pa awg thag huh chaw mawd chaw kehx niq chi uhg ghad mi chehd che yaog. I hehd awr lehr phux-u ghad te che beg ke haq veq deh lehq, si ux cuhr khuhz lar che yaog.
5 Kaw jaw u ve awg khuhn muhd pehq pawd tuhaz che, awg khuhd hehnd jad che teq pa buhag che he lehq muhd tawr che awg khuhd tuhaz che yaog. Kaw jaw u ve mehz khuhd suhr a mir suhr mag toq chehd che yaog. A mir u ve teq pa awr lehr, Ghig sa ve awg ha suhr mag phehq che yaog.
6 Kaw jaw u ve mehz khuhd suhr, huhx meh kehr-o heh te lehq mehz ghiz haq sur che lad chuhd ghig ted mag cawg che yaog.
Kaw jaw awg kaw jen huh lehd ma koz, kha caw yuhd huh lehd ma koz, a saq teq chehd che awg ceng uhd kheh cawg che yaog. I hehd awr lehr, mehz khuhd suhr phawd awr liz, kuhr tehx nuhr phawd awr liz, mehz sir kha peh cawg che yaog.
7 Awg kawd maq teq kheh awr lehr, lad cag six haq sur che yaog. Niq kheh teq kheh awr lehr, nud par nehax haq sur che yaog. Sehz kheh teq kheh awr lehr, chaw yad ve mehz khuhd cawg che yaog. Uhd kheh teq kheh awr lehr, pog tod che a ceg nux haq sur che yaog.
8 A saq teq chehd che awg ceng u ve uhd kheh awr lehr, awg kheh mag gha lia tawg laq khuhq mag cawg lehq, i hehd ve awg ton awg gha lia lehd ma koz, tawg laq awg huhx lo lehd ma koz, mehz sir kha peh cawg che yaog. I hehd awr lehr, muhd kaw muhd khax ma jehd jehd te lehq che kheh koz chehd che yaog.
“Kand pax ir che Jawd mawd Ghig sa awr lehr,
daq kehg jad, daq kehg jad, daq kehg jad che yaog.
Yawd awr lehr, pong lag thad liz, a meha liz,
lag tug awg yand awg khuhn lo liz,
teq chehd che Ghig sa phehq che yaog,”
lehd koz che yaog.
9 A saq teq chehd che awg ceng u ve uhd kheh awr lehr, kaw jaw thag huh mi chehd che, co co taer taer teq chehd che te ghad haq awg mig awg phond, yawz yan che he lehq yawd ved awg bon haq chid muh che khuhd pid che te yand,
10 chaw mawd chaw kehx u ve niq chi uhg ghad awr lehr, kaw jaw thag huh mi chehd che te ghad mehz khuhd suhr khi cuhx teh lehq, co co taer taer teq chehd sehr phad haq a kor pi che yaog. Kaw jaw u ve mehz khuhd suhr huh i hehd ve si ux cuhr haq kuhz teh lar lehq koz che,
11 “Ngag hehd ve Jawd mawd Ghig sa-og,
nawg awr lehr awg mig awg phond ted ceng,
yawz yan che ted ceng he lehq
kand pax ted ceng haq gha kenr che yaog.
Awg lawn ghod ver, awg ceng gha lia haq
nawg phanr lar cer lar lehq,
nawg ved a lor haq te lehq awg ceng
gha lia phehaq lehq nawg te phanr lar che yaog.”