5
Loq lar che liq te koz he lehq Yawg nehax awg lawn
1 Kaw jaw thag huh mi chehd che te ghad ve laq yaq awr pax awr ve laq kuhr awg khuhn loq lar che liq te koz haq ngag gha mawg che yaog. Liq u ve te koz awg khuhn phawd awr lehd ma koz, awg thang phawd awr lehd ma koz liq buhq lar lehq cunr suhr mag dawz lar che yaog.
2 Awg yand u ve haq, awg ghad ir che muhd nuh maq cuh yad te ghad koz che, Liq u ve haq pheq lehq cunr dawz lar che teq pa haq phaz kha tug, a sug te kenr cheawg le lehz, awg khuhd hehnd chawa kug chehd che haq ngag gha mawg che yaog.
3 Liq u ve haq pheq lehq awg khuhn ngawx tug, muhd nuh maq lo chehd che lehd ma koz, mig gig khod-aq lo chehd che lehd ma koz, mig gig awg huhx lo chehd che lehd ma koz, te ghad-e liz pheq maq gha.
4 Liq u ve haq pheq kenr lehq liq u ve awg khuhn ngawx kenr che te ghad-eg liz ca mad mawg che haq te lehq, ngag hax ceh nux huhg che yaog.
5 Kheh te lehq, chaw mawd chaw kehx awg khuhn ve te ghad ngag haq koz ax che, “Tad huhg. Ngawx lor, Yud daq ve awg ceng awg khad awg khuhn tuhaz che, lad cag six lehd koz che Dar viq ve awg chi phehq che te ghad awr lehr, ghad vehor. Kheh te lehq, liq u ve haq liz, cunr dawz lar che suhr mag haq liz yawd pheq gha che yaog,” lehd koz ax che yaog.
6 Awg yand u ve haq, kaw jaw he lehq a saq teq chehd che awg ceng uhd kheh awg kaw jen huh lehd ma koz, chaw mawd chaw kehx teq pa awg kaw jen huh lehd ma koz, hox chehd che Yawg nehax haq ngag gha mawg che yaog. Yawg nehax u ve awr lehr, dawz vehr vid jaw peg che haq sur che yaog. Yawd awr lehr, awg khuh suhr mag cawg lehq, mehz sir suhr mag cawg che yaog. Mehz sir suhr mag u ve awr lehr, mig gig khod-aq awg kag gha lia lo kae pe lar che, Ghig sa ve awg ha suhr mag phehq che yaog.
7 Kheh te lehq, Yawg nehax yawd lag lehq kaw jaw thag huh mi sehr phad ve laq yaq awr pax awr laq kuhr awg khuhn lo yug cid chehd che liq haq yawd yug che yaog.
8 Liq u ve haq yawd yug che te yand, a saq teq chehd che awg ceng uhd kheh he lehq chaw mawd chaw kehx niq chi uhg ghad awr lehr, Yawg nehax mehz khuhd suhr huh boz vehr che yaog. I hehd awg gha lia tenr cawg lehq, sa huhx che kha peh ghad cawg che si mawq khu yug cid chehd che yaog. Sa huhx che u ve awr lehr, Ghig sa ve chaw teq pa ve bon lawg khuhd phehq che yaog.
9 I hehd ka mig khuhd awg suhx haq ka lehq koz che,
“Liq u ve haq yug lehq cunr dawz lar che teq pa haq pheq tug,
nawg te kenr che yaog.
Awg lawn ghod ver, nawg haq su dawz vehr lehq,
awg ceng awg khad awg gha lia awg khuhn lo lehd ma koz,
tawd khuhd awg ceng gha lia awg khuhn lo lehd ma koz,
chaw ceng awg gha lia awg khuhn lo lehd ma koz,
muhd mig awg gha lia awg khuhn lo lehd ma koz,
nawg ved awg suhr haq yehd lehq,
Ghig sa awg pun chaw yad teq pa haq nawg vig khuhq peg che yaog.
10 I hehd awr lehr, a nig ved
Ghig sa awg pun muhd mig yad he lehq
paw khod teq pa phehaq tug nawg te vid peg lehq,
i hehd awr lehr mig gig khod-aq lo gha uq penr tug yaog,”
lehz ka mig che yaog.
11 Awg yand u ve haq ngag ngawx lehq, kaw jaw haq kha caw yuhd huh lehd ma koz, a saq teq chehd che awg ceng uhd kheh he lehq chaw mawd chaw kehx teq pa haq kha caw yuhd huh lehd ma koz, mad jad che muhd nuh maq cuh yad teq pa ve awg khuhd haq ngag gha kad che yaog. I hehd awr lehr, awg minr awg minr pawz, awg hinx awg hinx pawz cawg che yaog.
12 I hehd awg khuhd hehnd chawa kug lehq koz che,
“Su dawz vehr che Yawg nehax awr lehr,
kand pax ted ceng, paw sa che ted ceng,
cud yiq ma yiq ted ceng, awg ghad awg sax ted ceng,
tar ir yawz yan che ted ceng, awg mig awg phond ted ceng he lehq
chid muh che ted ceng haq gha kenr che yaog,”
lehd koz che yaog.
13 Muhd nuh maq lo lehd ma koz, mig gig khod-aq lo lehd ma koz, mig gig awg huhx lo lehd ma koz, lad chuhd ghig awg khuhn lo lehd ma koz, awg kag gha lia lo cawg che Ghig sa kha te phanr lar che a saq teq che awg ceng awg gha lia che kheh koz chehd che haq ngag gha kad che yaog.
“Kaw jaw thag huh mi chehd che te ghad he lehq Yawg nehax haq
co co taer taer chid muh che ted ceng,
tar ir yawz yan che ted ceng,
awg mig awg phond ted ceng he lehq
uq penr che kand pax ted ceng cawg vid-oq,”
lehz i hehd koz chehd che yaog.
14 Kheh te lehq, a saq teq chehd che awg ceng uhd kheh awr lehr, “A meng,” lehz koz lehq chaw mawd chaw kehx teq pa awr lehr, boz cuhx lar lehq a kor pi che yaog.