8
Nyamon iri adeu ili mine kindrei ta wasai
1 Udu bolo la-ukei taha ramen eme tek, aha ndremenya ta iri nyamon ale adeu ili mine kindrei iri amekes na sukumada kei. Taha ndratanan iri lakou solo-an. Arile tanan solo-an le bwidi kandriyen ta nyaladan asahan i tinan. Arile, kandriyen ta aso-ok nadu tinem iri rayah ja, badeh, aseben ma bwidi taha lau ta Kindrei abadok.
2 Buku iri lau anya iri tanan labai, iri lau doh tana iri ari lakou bwe-en!
3 Arile Kindrei le ari tanan labai, are lau aso-ok iy handru.
4 Ya buku sah handru? Idoh mwasin ta taha winiya aimon iri nyamon ale nane iri lau adeu ili niri kindrei ta wasai, deh bwe? Taha ndratanan ndra bwena.
Kindrei ale iri amekes na sukumada kei udu bolo kon munyak dah, ari koha iri bwe, sukumada kei laleyah. Kindrei solo-an bwe, Kindrei le ari kabwe.
5 Iri lakou solo-an udu bolo kandrah ma udu bolo kon munyak iri aloh “kindrei” hawe “laban,” arile oro marakon nane doh Kindrei ma Laban handru bwe.
6 Kindrei tataha badeh ari le. Iy badeh, tama taha mari. Iy bwidi iri lakou marakon ma taha tan amwenen. Jises Krais le ari badeh, iy Laban tataha. Iri lakou marakon iy amekes, iy le badeh, edeu kohan eme tataha.
7 Arile, lau marakon bala tanan iri lakou dah bwe. Lau ta Kindrei rayah ndrame ndra tinan nane kada-ah atehei budon anya iri sukumada kei doh koha iri udu aliy. Ya, buku oro aimon oda lakou nane iri atehei i mine kindrei nane iri asehek na sukumada kei, eme ma ndrine oro atona lakou doh bamwenen bwe.
8 Arile nyamon le winiya batiyani taha bala mirihik ta Kindrei bwe. Buku taha baimon nyamon bwe, idoh winiyan bamekes taha asahan ndraka-an ta madan, bwe. Ya, buku taha aimon nyamon, idoh ale winiyan bamekes taha asahan mwasin ta madan bwe le.
9 Arile, aha katondrok aha kamwenen. Aha tanan, aha winiyan aimon saba nyamon aha aso-ok. Arile, kora-on kandriyen dah aha amwenen amekes, eme ma budon tiri lau baleu bwe, ma iri taku ala bolo iri kandriyen ndra-in.
10 Tasah handru jo amekes sahou dah? I buku doh: Ou mwan, ou badih, tanan tam tinan. Buku ou ala bolo asiu tinan ta kindrei ta wendreya, iri amekes na sukumada kei, ma ou manyah aimon nyamon. Idoh mwasin, arile, buku ari mwan o badih, iy tanan bwe, kindrei ta wendreya doh, lakou ari laleyah. Iy anyolom ou, ma bwidi iy abudon, idoh mwasin ta aimon nyamon nane iri adeu ili na kindrei ta wendreya.
11 Ta iri kandriyen nane doh, eme tanan tam ili bwidi ndramak nane bado mwasin bwe. Nadu tinem nane doh, Krais imek udu bada kei tondreh ta akohok iy eme hamon.
12 Budon ta lau ta Kindrei rayah basahan baleu mara-ei bwe. I buku aha amekes kandriyen ndra-in doh ili tiri, ma bwidi budon tiri andra-i, aha amekes idoh ili ta Krais ale.
13 I buku iri nyamon nane jo aimon doh ili bwidi nadu tinek ari ja taku ili bolo iri kandriyen ndra-in, mwasin ta jo kabeles jo saimon iri nyamon doh, winiya le jo imek. Bwe kameh jo kabwidi nadu tinek rayah ja kataku kala ta kandriyen ndra-in.