9
Pol sekesek ta amekes gok i buku aposel
1 Buku sah? Aha tanan gok tek bwe? Ari lakou winiya batawi jo bwe. Jo aposel ari ai.
Jo ndranyolom Laban tataha. Jo amekes gok ta Laban, eme ma aha asahan lau ta Kindrei ta gok nane jo amekes dah.
2 Iri rayah atehei budon anya jo aposel ta Kindrei bwe, arile, na gok tek le, aha asahan lau ta Kindrei, eme aha le leheyani buku jo aposel ta Laban handru.
3 Aha lau rayah ndremenya jo ta iri kandriyen tek, eme jo asehek iri sahou i buku doh ili tiri:
4 Sebwe aha anya, aru Banabas sakohok nyamon ma gwa ta gok taru nadeh?
5 Sebwe aha anya, ndra-in ta ahi aposel asoh iri badih ta Kindrei, ma akohok iri ala hawe ahi, i buku oro aposel rayah, ma nadu tine Laban, ma Pita ale amekes nadeh?
6 Sebwe aha anya, aru Banabas le badeh, atondrok aru amwenen, aru winiya bandrek luk taha ta amekes gok taru bwe nadeh?
7 Are lau iy amekes gok ta bahun, iy le amwenen isih lakou ta bahun ma nan nyamon? Sebwe bwe nadeh! Are lau iy inyor bilin, iy winiyan bakohok sali nyamon bwe? Ya are lau ale ta atondrok iri sipsip, iy amwenen ba-un sur tiri bwe?
8 Jo asehek iri sahou dah na budon tek amwenen bwe. Sahou ta Kindrei udu bolo kandriyen malen mene asehek i buku le aliy.
9 Moses mene torowenei sahou udu bolo kandriyen malen i buku doh,
“Ou badeh, saseu boho katin haka oks buku none iy kamekes lahou tam ta katisih buwa wit.” Dutoronomi 25:4
Sebwe Kindrei abudon boto-on tiri bulumakau le, eme ma iy amekes iri sahou dah?
10 Bwe, iy atehei budon in tataha, ma iri sahou marakon dah tataha amwenen. Tasah, Kindrei aso-ok taha kamekes iri kandriyen buku doh: Ndramak ibo gok ta apou ndren ta bilin, ma ndramak asokok bwisi rais, uru ma la-uh amekes gok doh, tasah uru ndratanan, idah kameh uru akohok nyamon rayah ta gok turu.
11 Aso aposel asehek sahou mwasin ewek taha badeh, i buku aso atah lakou ta Malawin Mwasin. I buku sah handru? Mwasin ta aso akohok sali nyamon taha ta aseben bada aso amwenen? Bwe, solo-an labai?
12 Buku aha aso-ok iri lau rayah ta akohok lakou taha, badeh, kameh aso kakohok kudu bwele-en labai ja tiri. Arile, iri lakou aso winiyan akohok taha badeh, aso bakohok bwe. Tasah, aso baso-ok ta amekes kandriyen ta aturuk san ta sahou mwasin ta Krais ili tiri mwan ma badih, bwe. Eme ma udu bolo len marakon, aso bwese iri maha-an solo-an labai ta atondrok aso le amwenen.
13 Ou tanam, buku iri lau amekes gok ado bolo asiu tinan ta Kindrei, iri badeh, akohok nyamon badu asiu tinan ta Kindrei. Ya, iri lau amekes gok ta asun sipsip udu bwele-e mada koto-ok, iri badeh, akohok niri oda sipsip nane iri lau adeu ili ta asun ta nyara salom.
14 Idoh i buku Kindrei asehek sahou batanau doh eme tataha: Buku are lau ta atiye sahou tan, iy kakohok iri seben badu tiri lau nane anuhun sahou mwasin.
15 Arile jo amwenen winiya bamekes iri kandriyen nane ale Kindrei tiye jo winiyan ta amekes, bwe. Ma jo batorou iri sahou dah, ta akohok ari lakou taha bwe ale. Mwasin badeh, jo kimek bwena op. Jo asehek i buku doh, tasah, kandriyen tek amwenen badeh, jo tanan ta akohok lakou ta ari mwan o badih, bwe. Ma jo baso-ok ari mwan o badih keme kandrei kati sekesek tek dah ja bwe.
16 Jo winiya batudun nyarak bwe, buku jo asehek anya, jo amekes kandriyen mwasin labai. Ta atiye sahou badeh, gok ta Kindrei edeu eme tek ta jo kamekes. Jo saruwani gok nane doh. Buku jo batiye iri sahou tan doh bwe eh, maha-an tinan kameh eme bwele-ek, ma manyah tek winiya bado mwasin bwe.
17 Buku jo atiye sahou mwasin, tasah jo le aso-ok ta atiye, jo kameh akohok ndramas ta aliy. Arile, buku Kindrei ndratehei jo, mwasin, idoh gok ta Kindrei atehei eme tek ta jo kamekes.
18 Ya, saba lakou kameh i nyara ndramas tek? Iri lakou ale jo winiya akohok ta gok tek ta atiye sahou mwasin, idoh badeh, jo bakohok bwe. Tasah, jo badeh, sekesek le ta asehek sahou mwasin ili ta lau marakon, ari sihinek bwe. Ya iri sekesek nane jo akohok, idoh i buku ndramas tek ai.
Pol asahan i buku bonyo-ou ta lau marakon
19 Jo basahan bonyo-ou ta ari ndramak bwe. Arile, jo badeh, asahan i buku bonyo-ou ta lau marakon. Jo amekes i buku doh, ta ariu lau mwan ma badih solo-an ka-en hamon ta Krais.
20 I buku jo udu hawe iri Juwis, jo akohok kandriyen tiri Juwis amwenen, ma jo kameh winiya ariu iri solo-an ame hamon. Iri badeh, ado bahandra tondrok ta kandriyen malen ta Moses, jo badeh, bwe. Arile jo atehei jo mara-ei udu bahandra kandriyen malen, ta ariu iri Juwis ame hamon ja.
21 Buku jo ili udu hawe iri lau, iri bado bahandra tondrok ta kandriyen malen bwe, badeh, kameh jo kamani kandriyen malen, ta ariu iri ame hamon. Arile, jo bamani kandriyen ta Kindrei bwe. Jo badeh, edek udu bahandra batanau handru ta Krais.
22 Buku jo ili udu hawe iri lau, budon tiri bahis handru ta Krais bwe, jo kameh bwidi manyah tek i buku le iri, ta
ariu iri ame hamon. Handru, jo badeh none ta in hamon ta kandriyen tiri mwan ma badih are laleyah, ta none iri madasan mara-ei, ta ariu iri rayah ka-en hamon ta Krais.
23 Jo amekes iri gok marakon doh ta aseben sahou mwasin ta Jises ili bolo kon mara-ei. Eme ma, jo hawe iri mwan ma badih rayah kameh winiyan akohok nyosowa sahou mwasin doh ale.
Taha kasakaliye boto-on kala kakohok ndramas ta ere le buku doh
24 Iri lau sakaliye ta nyorei, iri marakon sakaliye, arile ndramak ari le udu bolo iri marakon kameh akohok ndramas. Ya, aha kasakaliye boto-on ta akohok ndramas doh.
25 Iri mwan ma badih marakon anya kasahan bwena ta iri nyorei, iri badeh atehei iri au ala andri mara-ei in hamon ta so-ok ta bada iri amwenen. Iri amekes i buku doh ta akohok ndramas ta winiya bare luluwen bwe. Arile, ndramas tataha lau ta Kindrei badeh bwe. Taha badeh, kasakaliye boto-on ta akohok ndramas ta ere le buku doh, winiya bandra-i bwe.
26 Jo badeh, amekes i buku ndramak sakaliye boto-on labai, ya iy banyolom bala doh bala doh bwe. Ya jo amekes i buku ndramak ta bahun, iy akeh minen amwenen i ta ndramak, ya iy bakeh minen laleyah bwe.
27 Jo bwidi badak amwenen i buku bonyo-ou tek. Jo a-um badak amwenen ta amekes iy kabadok ta bahun. Jo amekes i buku doh, tasah, kora-on jo kasehek sahou mwasin kili tiri mwan ma badih rayah, ano Kindrei kameh asehek eme tek i buku doh, “Ou ndramalin mara-ei.”