16
Haga Hawe Isma-el
1 Abram Sarai badeh badeu tan ari nah bwe. Arile iy badeh badih ari udu aliy i nyara badih ta lahou tan ya iy badu Ijip.
2 Eme iy tiye i ta Abram, “Laban badeh tawi jo, eme badeh jo bato-ou nah bwe. I buku sah, baden eh ou ala amadin hawe badih ta lahou tek? Koro-an iy katuwiy nah keme tek.” Eme Abram badeh aseken budon ta Sarai.
3 Eme Sarai atehei Haga badeh i hawe udun ta nyeu. (i doh asahan badeh, len Abram eme udu Kenan jaha ronoh).
4 Eme badeh Abram amadin hawe Haga ma Haga ndrinen i tinan. Eme len Haga tanan iy badeh ndratuwi nah, iy anyolom Sarai badeh anya jo le ai.
5 Ano Sarai tiye i ta Abram, “Ou le mwesekei badeh ma Haga banyolom jo bala mwasin bwe. Jo le badeh suni iy amadin hawem eme kabatana doh badeh iy atona iy badeh ndratuwi nah, eme ma iy madan andra-i eme tek. Eme Laban le baranyolom talu, ou mwasin de jo mwasin!”
6 Eme Abram anya eh, “Mwasin labai iy badeh ta lahou tam iy udu baha tondrok tam; Saba lakou ou anya amwekes ki tan ou amwekes ai.” Eme badeh iy amwekes tibine i ta Haga andra-i labai, eme Haga atobwak.
7 Eme Angelo ta Laban eme ndruni iy udu gwa li udu lomale an, gwa doh badeh udu ka-u san ili Sur.
8 Eme iy anya eh, “Haga, ou badeh badih ta lahou ta Sarai, ou ado heh ame, ma ou anya ahe.” Eme iy anya eh, “Jo badeh atobwak eme len, ta badih ta kati asiu.”
9 Eme iy tiye i tan, “Ou a hamon ja ma ou asahan bonyo-ou tan.”
10 Ano iy tiye, “Jo kameh edeu lundriyem oro a sola, winiya ari lau bandromwei bwe.”
11 Angelo ta Laban tiye i tan ale, “Ou kede-eh nah mwan ere ndrinem eme ou tondrohani nyaran badeh ki Isma-el, tasah Laban badeh ndranuhun ndrelen ma tikisiy tam.
12 Arile nadum kameh ta ramwes, iy kameh ta amwekes ramwes i la-u lau mari. Ma iri lau mari kameh budon tiri andra-i i tan, ma iy kameh udu ndrahun len labai ta lowan oro.”
13 Ano Haga aloh nyara Laban ma tiye sahou tan i buku doh, “Ou Kindrei ou ndranyolom jo, jo ndratou, ou are ala anyolom jo.”
14 Eme ma iri aloh li doh badeh li ta Ber Lahai Roi, moson “Gwa li ta Kindrei, ou anyolom jo,” udu ndrokowa Kades hawe Beret.
15 Eme Haga atehei nadu Abram mwan; eme badeh Abram tondrohani nyaran Isma-el.
16 Na len doh badeh Abram jaha tan ndru lunoh onoh (86).