17
Asan Ku-i Ndramak Kalem Ta Sahou Randra Le
1 Na len Abram jaha tan asahan ndro ronoh ndro ari (99), Laban badeh asahan hawen tiye, “Jo dah jo Kindrei jo tek boto-on. Ou anuhun jo ma len mari badeh ou amwekes kandriyen mwasin le.
2 Jo kameh amwekes sahou randra le hawem ma edeu lundriyem oro a sola.”
3 Eme Abram aluh i andri ma bulin i andri bada munyak, ano Kindrei anya eh,
4 “Jo amwekes sahou randra le dah hawem. Jo badeh tandrakan, ou badeh kameh asahan tubu iri lau mari badu kon munyak.
5 Nyaram kameh bala Abram bwe ai, nyaram kameh Abraham, tasah ou kameh asahan tubu iri lau badu kon munyak solo-an.
6 Jo kameh edeu lundriyem oro a sola, eme oro rayah kameh asahan kabin.
7 “Jo kameh balek winiyan bamani tandrakan tek i tam ma hawe i ta lundriyem oro na len, eme, eme, bwe. Sahou randra le dah, winiyan ta bano bwe. Jo kameh asahan Kindrei tam ma Kindrei ta lundriyem oro.
8 Ou badeh badu leheleh ta kon Kenan mari, jo kameh edeu i tam ma i ta lundriyem oro udu le buku doh ma jo kameh i Kindrei toro.”
9 Ano Kindrei tiye ta Abraham, “Ou ma lundriyem oro badeh ndrine ado kise, ta sahou randra le hawek ma lau rebesem hamon ame.
10 I dah sahou randra le tek ou samaniy, udu ndrokowak hawe ndrokowam hawe lundriyem oro: lau mwan mari badeh kasan ku-i lakou tiri ki-iu.
11-12 Na dah ma na len hamon eme ou badeh asan ku-i lakou ta nah ki-iu i buku len tan kasahan ndru la-uh. Iri ta lahou tam badu leheleh ma badu asiu tam ale. I doh badeh ta leheya sahou randra le udu ndrokowa talu ma la-uh.
13 Ado ari ari badeh kasan ki-iu eme ya mada lau kanyolom i dah badeh kalem ta leheya sahou randra le tek ma ou badeh udu le buku doh.
14 Are lau mwan basan ku-i lakou tan bwe, iy badeh lau tek bwe, tasah iy babudon sahou randra le tek hawen bwe.”
15 Ano Kindrei tiye ta Abraham, “Ou badeh saloh udum Sarai ja ai; na dah ma na len eme badeh ou aloh Sara.
16 Jo kameh edeu nyosowan i tan ma iy kameh atehei ari nah i tam. Jo kameh atehei nyosowan i tan ma iy kameh asahan tine iri lau mari badu kon rakon buruwen, ma kabin kameh asahan ta lundriyen oro.”
17 Eme Abraham aluh ya bulin i andri bada munyak eme iy lomondra ili ma iy akodei iy ta ehe-en anya eh, “Winiyan ari ndramak jaha tan rinek (100) winiyan mwesekei nah? Ya Sara badeh jaha tan ndro ronoh (90), ya iy winiyan tuwi ale?”
18 Eme Abraham tiye ta Kindrei, “I buku sah ou winiyan batehei Isma-el bame nah badu ndrinek bwe?”
19 Arile Kindrei anya eh, “Bwe ai. Udum Sara kameh atehei nah ari i nadum ya ou tondrohani nyaran badeh ki Aisik. Jo bamani sahou randra le hawen ma lundriyen oro bwe. I doh ta udu le buku doh. Ya winiyan ta bano bwe.
20 Ya ndrelen tam ta Isma-el baden eh, jo ndranuhun; jo kameh nyosowani iy handru; ma jo kameh mwesekei iy asahan sola ma kanen kameh i sola. Iy kameh asahan tama oro lau ta batun ma ronoh la-uh ma jo kameh edeu iy asahan kon rakon buruwen.
21 Arile jo kameh bamani sahou randra le hawe nadum Aisik bwe. I dah kameh adeu iy na jaha eme.”
22 Eme Kindrei asehek sahou i ta Abraham ano badeh iy iu ai.
23 Eme Na len doh le badeh, Abraham anuhun sahou ta Kindrei ma iy sani ku-i lakou ta Isma-el iu hawe tiri lau mwan are asiu tan ale. Iri doh badeh iri lau ta lahou tan badu bolo asiu. Iri lau ala adeu iri ado hawen ma hawe iri lau rayah ta sisih ale.
24 Abraham jaha tan asahan ndro ronoh ndro ari (99) badeh, sani ku-i lakou tan iu,
25 ya Isma-el badeh jaha tan ronoh taloh.
26 Uru ma la-uh badeh asan ku-i lakou turu iu na len ari le,
27 ma hawe iri lau ta lahou mari ta Abraham.