38
Juda Hawe Tamar
1 Na len doh badeh Juda ruwani nadu tinen oro ma iy iu i andri ili hawe ndramak ari badu Adulam nyaran Hirah.
2 Eme udu doh badeh Juda awadei hawe badih ari badu Kenan nadu Su-a. Eme iy sudi iy ano iy amadin hawen.
3 Ma ndrinen i tinan ano ma iy atehei nah mwan ari tondrohani nyaran Er.
4 Ano ja badeh iy atehei mwan ari ja, tondrohani nyaran Onan.
5 Ano iy atehei ari ja ale ma tondrohani nyaran Silah. Iy atehei iy badeh udu Aksip.
6 Ano Juda andrei badih ari nyaran Tamar i ta nadun Er.
7 Arile Er nadu Juda badeh kandriyen tan badeh bamwenen ta mada Laban bwe; eme Laban idiy iy imek.
8 Ano badeh Juda tiye ta Onan, “Ou amadin hawe nyawe nadu tinem ma ou mwesekei lahou ki handru, ta ou a udun ki saluwe nadu tinem. Eme ma ou amwekes ari nah ki ta nadu tinem.”
9 Arile Onan badeh tanan, i dah kameh nah kameh bala lundriyen bwe; eme i buku none len mari iy amadin udu nadu tinen kameh gwa tan iu leleya bada munyak. Ya i dah kameh basahan nah nadu nadu tinen bwe.
10 Kandriyen iy amwekes doh bamwenen ta mada Laban bwe; eme Laban idiy iy imek ale.
11 Ano Juda tiye i ta udu nadun badih Tamar, “Ou badeh ado badih nyau ado asiu tam ado gwek, winiya le Silah ki tinan.” Iy badeh abwerei koro-an iy kameh kimek ki le buku nadu tinen oro ale. Eme Tamar badeh iu i hamon i asiu ta taman.
12 Ano udu luluwen badeh, udu Juda iu ndrine Su-a imek. Ano tikisiy tan ta udun ano badeh, uru kawas tan Hirah badu Adulam badeh ala Timnah ala hawe iri lau asan lami sipsip tan.
13 Eme na len lau tiye ta Tamar anya, nyanan mwan badeh ndra-au ndrala Timnah ndrasan lami sipsip,
14 eme iy eme badeh asini awin ta udun nyau mene iy edeu iu, ano andrei awi jam tubuluhi bulin na aliy. Ano nyahani iy manyah udu mada san ta kon Ina-im kon tinan ari udu san ili Timnah. Ma iy badeh tanan, nadu Juda mwan Silah badeh ndra winiya tasou, arile iy bala tasou bala tan bwe le.
15 Eme Juda anyolom iy badeh iy anya i badih ta mada san, tasah iy tubuluhi batun.
16 Iy banyolom iy bamwenen bwe, eme iy edek ili hawen ili ka-u san ma tiye, “Ou ame jo anya kamadin ou.” Arile iy badeh nyanan.
Eme iy anya, “I buku none jo kamadin hawem sasah handru ou kameh atehei keme tek.”
17 Eme iy anya, “Jo kameh edeu tam ari me kasen.”
Eme iy tiye, “Ou atehei ari lakou ki nyara tandrakan tam, winiya ou le baratiyani barame.”
18 Eme iy anya, “Saba lakou ki nyara tandrakan jo atehei tam?”
Eme iy anya, “Na lakou ta balem ma ring hawe kandro tarou ta minem.” Eme iy atehei i minen ma iy amadin hawen, ano iy atehei nah i ndrinen ma ndrinen i tinan.
19 Ano hamon Tamar iu badeh iy asiniy awin ja iu. Ano iy asiniy awin ta nyau tan iy la-un ja.
20 Ano udu badeh iy suni kawas tan Hirah badu Adulam atiye me ili, ma tiye tan kakuhi lakou ta nyara tandrakan tan udu hawe i badih doh keme hamon. Arile iy ili badeh, iy batakalahei iy bwe.
21 Eme iy ndremenya iri lau nane manyah ado doh, “I badih ta mada san ala manyah udu ka-u san Ina-im ndraheh?” Eme iri anya, “Ari badih ta mada san dah bwe oh.”
22 Eme iy iu i hamon ja ili hawe Juda ma iy tiye, “Jo badeh batakalahei iy bwe. Ma iri lau badu kon doh anya, iri ari badih ta mada san i buku doh bare don bwe.”
23 Eme Juda anya, “Lakou doh ki tan kudu gwek. Jo bwalek iri lau sondrokonya ma sehe-en to. Jo badeh none ta anya kisih iy, arile ou takaleh iy labwe.”
24 Udu, bun taloh ano badeh, lau asehek ta Juda anya, “Nadu nyanam Tamar badeh ndra buku badih ta mada san ma nyolom tan ndra randra ma iy ndrinen ndra tinan.”
Eme Juda anya, “Katiyani iy keme ma kasulumwi iy kimek.”
25 Ano iri andrei iy eme len, ano iy suni sahou i ta nyanan mwan Juda eme: “Jo badeh nah udu ndrinek dah nadu ndramak lakou tan dah. Ou tanam lakou dah ma tarou udu badan de bwe?”
26 Juda anyolom ma iy tanan, ano iy tiye, “Iy badeh tiye sahou handru. Jo badeh ndra bwe ai, ta tandrakan tek, jo mene ndratehei iy ndratasou ndra ta Silah ai.” Eme iy bamadin hawen ja bwe ai.
27 Ben ano ta iy anya kedeu nadun keme len badeh, iri silahei iy badeh nah mwimwir udu ndrinen.
28 Nah anya keme len badeh iy ari badeh minen eme len; eme badih ta lahou ta nah andrei kam saraman, eme iy sawei boha nah dah. Eme iy tiye, “I dah, eme len bwena.”
29 Arile iy ruwani minen ja badeh, nadu tinen mwan eme len, ano iy tiye, “San ta iy eme len asa i le buku doh!” Eme badeh nyaran i Peres, moson “Iy eme len bwena.”
30 Ano badeh kam saraman udu boha nadu tinen in hamon eme len ja, eme tondrohani nyaran Serah, moson “Lomadan saraman.”