39
Josep Hawe Udu Podipa
1 Ya Josep badeh ndrakuhi iy badeh ndrala Ijip. Podipa ndramak ta lau ta bolo asiu hawe ta bwena ta ndrokei sihine iy udu mine iri lau badu Isma-el. Iri mene kuhi iy ili doh.
2 Eme Laban badeh udu hawe Josep, ma lakou mari iy amwekes badeh ndra mwasin le. Eme Josep badeh manyah tan badeh badu asiu ta Podipa,
3 eme Podipa anyolom Laban udu hawen ma mwesekei iy amwekes lakou ndra mwasin le.
4 Eme iy anyolom Josep badeh udu mwasin ta madan, eme iy asahan ndramak ta lahou tan; ano Podipa anyolom iy badeh winiyan, eme iy atehei iy atondrok asiu tan ma lakou tan mari.
5 Na len iy atehei Josep atondrok asiu tan ma lakou tan mari, Laban badeh atehei nyosowan i la-u asiu ta Podipa. Tasah na Josep le badeh, Laban atehei nyosowan i la-u lakou mari ta Podipa badu bolo asiu ma manan ale.
6 Eme lakou mari iy atehei udu baha tondrok ta Josep. Iy badeh babudon ta lakou mari bwe, nyamon le iy aimon. Josep badeh ndramak ari buruwen ma iy badeh konen labai.
7 Ano udu sese badeh udu Podipa budon tan andra-i ta Josep eme iy ndremenyani iy ta iy kili hawen ki bada sau.
8 Arile Josep bwalen, ma iy tiye, “Jo badeh atondrok lakou mari. Podipa winiyan babwerei bwe, tasah iy atehei budon i tek ta jo badeh winiyan tondrokei lakou mari badu asiu tan ma lakou tan mari.
9 Ari lau ja bado bwele-ek ja udu asiu dah bwe, jo le. Podipa badeh batawiy ari lakou bare minen ja bwe, arile udun: Tasah ou badeh udun labai. I buku sah handru kameh jo kamwekes kandriyen ndra-in ma karei ki ta Kindrei?”
10 Eme iy badeh ndremenya seken ta Josep len ari i buku ari, ta iy kili bada sau hawen, arile Josep bwalen.
11 Ano na len ari badeh Josep anya kili bolo asiu kamwekes lahou tan. Eme ari lau ta lahou badeh bare aliy bwe.
12 Eme udu Podipa tawi awin tan indrek iy, “Ou ame sau hawek.” Arile Josep atobwak eme manan, awin tan ta bwele-en le badeh udu ndra minen udu gwek.
13 Eme udu Podipa anyolom awin tan badeh udu minen udu badeh,
14 eme iy luhi iri lau ta lahou tan ame. Eme iy tiye i toro, “Ado kanyolom. Iy ndramak badu Hiburu ala andrei iy mene eme hawe taha dah badeh bobose taha handru. Iy eme bolon dah badeh anya kamadin jo, arile jo eme arah.
15 Iy anuhun jo arah le badeh, iy ruwani awin tan udu ka-uk udu ai, iy le atobwak eme len ta asiu ma iy iu.”
16 Eme badeh awin tan udu ka-un udu gwek winiya le udun eme.
17 Ano iy asehek i ta udun i buku doh, “Iy ndramak ta lohowan badu Hiburu ou kuhi iy eme kede-eh anya kateu jo.
18 Eme jo arah i ta lau kaseben jo le badeh, iy ruwani awin tan udu ka-uk udu ma iy atobwak i manan ta asiu.”
19 Eme udu Podipa tiye i tan, “Iy ndramak ta lahou tam badeh amwekes kandriyen doh eme tek.” Eme iy anuhun sahou udun asehek i tan badeh, eme ndrinen i buku jih.
20 Eme Podipa tawi Josep ma atehei iy i bolo kou, ndrahune iri lau ta bolo kou ta kabin areu aliy.
21 Arile Josep udu bolo kou badeh, Laban udu hawen, Laban tikisiy iy ma mwesekei ndramak ta atondrok bolo kou badeh aseken iy.
22 Eme ndramak ta atondrok iri badeh atehei Josep badeh atondrok iri lau mari nane are bolo kou nane dah.
23 Eme iy ndramak ta atondrok ari lakou bwe, lakou badeh udu baha nyolom ta Josep, tasah Laban badeh udu hawe Josep, eme badeh mwesekei Josep winiyan amwekes lahou mari.