44
Bwiniu Amai
1 Ano badeh Josep tiye sahou i ta ndramak ta lohowan tan ta atondrok asiu tan, “Ou anyuhi nyamon ma solo-an ki bolo ndrom toro lau kede-eh, winiya oro winiyan bwese-ei ma ou atehei su-ubek toro mari ki hamon bolo ndrom toro ari ari.
2 Ou atehei bwiniu tek le badeh ki bolo ndrom ta iy bahan ki hawe su-ubek tan ta kalom.” Eme iy mwesekei i le buku aliy in hamon ta boho Josep.
3 Ano na mandraben badeh oro au ma donki toro adek au.
4 Oro bala len ta kon tinan handru bwe le badeh, Josep tiye i ta ndramak ta mwena ta atondrok iri lohowan tan badu bolo asiu, “Ou ala sakaniy oro lau nane. Ya i buku none ou ala tawi oro badeh, ou ndremenya oro ki buku doh, ‘Jo amwekes mwasin ewek tado, ya buku sah ado amwekes budon ndra-in i bada budon ndra-in?
5 I buku sah ado bene-ei bwiniu silba tek? Bwiniu doh badeh ala jo a-un gwa na aliy. Ma bwiniu doh badeh kau tek. Ado badeh ndrandra-i handru!’ ”
6 Ano ndramak ta lahou dah isos hawe oro, eme iy tiye sahou nane i toro.
7 Eme oro anya, “Ou tiye sahou i buku badeh eme taso dah i buku sah badeh? Aso tandrakan handru aso babwidiy ari lakou bwe.
8 Ou tanam aso, aso mene andrei su-ubek mene udu bolo ndrom udu munyak Kenan mene ewek hamon. Ya ta saba katin handru aso kabene-ei silba badu asiu ta tinan tam?
9 Ndramak ta lohowan ta Laban, i buku none ou silahei are andrei, iy badeh kadai iy kimek ma aso mari badeh kasahan bonyo-ou tado.”
10 Ano iy anya, “Jo aseken budon badeh; arile iy ndramak le andrei bwiniu badeh kameh asahan bonyo-ou, ya ado mari ka-au ai.”
11 Eme oro suri ndrom toro suwi i andri, ano oro sihiy ndrom toro.
12 Eme ndramak ta lohowan takaleh bolo ndrom toro amwenen handru. Udu ta kadok ili taku ta iy bahan, eme iy ndruniy bwiniu dah udu bolo ndrom ta Benjamin.
13 Eme oro sadi awin toro ma oro tikisiy labai, ano badeh oro atehei lakou toro i bwele-e donki toro, eme oro adek a hamon ja ala kon tinan.
14 Oro ame hamon ame asiu badeh, Josep udu aliy le kahis. Eme oro aluh andri i tan,
15 eme Josep anya, “Ado mwesekei sasah handru dah? Ado badeh winiyan atanan jo badeh udu aliy winiyan takalahei ado na kau.”
16 Eme Juda tiye, “Ndramak tinan, aso baratiye sasah handru barawek tam? Aso kandres ou barala buku sah? Aso katiye aso bwe barala buku sah? Kindrei badeh ndranyolom aso, aso badeh ndrandra-i. I dah kameh Benjamin le ari winiyan bala bonyo-ou tam le bwe, i dah kameh aso mari.”
17 Eme Josep anya, “Bwe! Jo winiyan bamwekes kandriyen badeh bwe! I dah kameh iy ndramak le nane andrei bwiniu tek le kameh i bonyo-ou tek. Ado mari badeh ka-au ka hamon hawe tama ado ma mwasin.”
18 Ano badeh Juda ili hawe Josep tiye, “Ndramak ta tondrok, ou sabolosen, ou anuhun jo anya kasehek sahou tek. Ou sabolosen same tek; ou badeh i buku none le kabin.
19 Ou badeh mene ndremenya aso anya, ‘Tama ado udu aliy, ma hawe nadu tine ado udu aliy?’
20 Eme aso anya, ‘Ehe, aso badeh tama aso udu aliy ma hawe nadu tine aso udu aliy. Udu suniya tama aso i alon badeh iy atehei Benjamin ya nadu tinen ari badeh ndramak. Iy le ari badeh udu aliy; ma taman badeh aseken iy tinan labai.’
21 Eme ou mene tiye anya, aso badeh katiyani iy keme, eme badeh aso andrei iy eme ta ou badeh kanyolom iy.
22 Eme aso mene tiye tam anya, taman badeh kameh winiyan batehei iy bwe, i buku none iy keme, kameh taman kameh imek.
23 Eme badeh ou tiye anya, aso winyan bame bare madak bwe, i buku none nadu tine aso bame bwe.
24 “Eme na len aso ala hamon badeh aso tiye ta tama aso.
25 Ano badeh tama aso tiye aso badeh ame hamon ja kasih nyamon.
26 Eme aso tiye tan, ‘Aso winiyan bala bwe; bala mada ndramak doh bwe i buku none nadu tine aso bahan bame hawe aso bwe. I buku none nadu tine aso bahan eme hawe aso, badeh aso winiya ala ai.’
27 Eme tama aso tiye taso, ‘Ado badeh tanan uduk Rejel badeh atehei nah i naduk badeh la-uh le.
28 Ya iy ari badeh ndramak. Sebwe iy badeh iri katin haka ndriliu ndrasadi iy, tasah kabatana aliy le badeh jo se batou madan bwe.
29 Jo badeh ndra alon. I buku none ado andrei iy ewek kameh, jo kameh tikisiy ma na tikisiy tek i badan le kameh mwesekei jo imek!’ ”
30-31 Eme Juda tiye, “Ndramak tinan, I buku none jo ki hamon ya tama kanyolom Benjamin bado hawek bwe kameh, i dah kameh iy imek. Iy badeh ndra alon labai ma budon tan badeh aso ta nah le dah, ya i dah kameh tikisiy tan le kameh kidiy iy kimek.”
32 Eme Juda tiye ja, “Jo dah badeh ndratandrakan tama ta jo kameh akohok maha ta Benjamin; i buku none jo batiyani iy bala hamon hawe taman bwe, ma i dah kameh jo kameh akohok maha ta aliy winiya jo le baramak.
33 Eme na dah ndramak tinan, jo kameh akohok kon tan asahan bonyo-ou udu; ou atehei iy ki-iu ki hawe nadu tinen oro.
34 Jo winiyan bala hamon hawe tama bwe, i buku none Benjamin bame bwe. Jo badeh bwalek anyolom tama akohok maha ma isi ta aliy.”