45
Josep Nyowonya Iy I Ta Nadu Tinen Oro
1 Ano udu mada iri lohowan ta Josep badeh, Josep winiyan batawi iy bwe, eme iy tiye iri lohowan tan mari au. Ari ndramak badeh bare hawen bwe eme badeh iy asehek ta nadu tinen oro ta iy badeh are lau handru.
2 Eme Josep tabani bohon i loken ta ndrelen eme badeh iri Ijip anuhun, eme badeh iri ala tandra-un ta kabin udu loboho ndrahu manyah tan.
3 Ano Josep tiye i ta nadu tinen oro, “Jo dah, Jo Josep. Tama udu loken kahis le?” Arile nadu tinen oro anuhun badeh oro toroyani oro eme oro batiye sahou bwe.
4 Ano Josep tiye i toro, “Abo, ado kameh mirihik.” Eme oro ame, ano iy tiye, “Jo dah, jo Josep ado mene atehei jo i ta sisih eme Ijip.
5 Ya ado sanoh ma ado satehei budon ndra-in sawek tado, tasah ado mene atehei jo i ta sisih eme Ijip, ndri-i. I doh badeh Kindrei le tiyani jo eme bwena ta aseben lau mari badeh samak.
6 I dah jaha la-uh ai, ta nyamon bwe udu bolo munyak dah; arile jaha limeh kahis, i dah kameh ari nyamon winiyan batahiy bwe ma i dah kameh ari len ta akohok nyamon bwe.
7 Kindrei atehei jo eme bwena dah i san randra labai, ta aseben ado ma lundriye ado samak.
8 Eme i dah ado handru batiyani jo bame dah bwe, i dah Kindrei labai. Kindrei atehei jo asahan ndramak ta lahou tan badu bolo asiu ta kabin, ari ndramak ja bare bwele-ek bwe. Jo badeh atondrok munyak mari badu kon dah; jo badeh atondrok Ijip mari.
9 “Ya abo, ado ka hamon suwi ka hawe tama ma ado katiye tan i dah badeh boho nadum Josep: ‘Kindrei badeh ndratehei jo ndratondrok kon Ijip mari; ado kala ma ado kame suwi;
10 Ou ma hawe nadum oro ma nadu tubum oro, iri sipsip, iri me, iri bulumakau ma hawe lakou tam mari kame kamanyah kado loboho Gosen, kado mirihik tek.
11 I buku none ado ado Gosen badeh kameh madak kameh udu tado. Jaha limeh ta nyamon bwe badeh kahis le; eme jo badeh bwalek ou, ma hawe lowam oro ma hawe iri katin haka tado badeh sakohok sandra-i ta son.’ ”
12 Ano badeh Josep tiye le, “Ya ado mari, ma ou ale Benjamin, ado badeh ndranyolom jo badeh Josep handru.
13 Ado katiye ta tama ta jo badeh jo le ai udu Ijip ma ado kasehek tan ta lakou mari ado ndranyolom na mada ado. Ano ado kandrei iy suwi keme dah.”
14 Ano Josep korotani nadu tinen Benjamin ma iy eden; ma Benjamin tawi iy ma iy eden ale.
15 Ano badeh ma ndrelen le, iy korotani nadu tinen oro ma iy eden. Ano badeh ma nadu tinen oro asehek sahou hawen.
16 Ano na len sahou ili asahan ndranye kabin udu ndrahun manyah tan, ta nadu tine Josep oro badeh ndrame, eme badeh kabin hawe iri lau ta lahou tan badu bolo asiu tan badeh sekesek handru.
17 Eme kabin tiye ta Josep, “Ou tiye ta nadu tinem oro ka lokou lakou ki la-u katin haka toro ma oro kala Kenan.
18 Oro kala kandrei tama oro ma hawe lowa oro ano oro kame hamon. Jo kameh edeu munyak mwasin handru badu Ijip i toro, ma i dah kameh edeu toro lakou winiyan len oro ado ado.
19 Oro katiye toro badeh andrei sau aliu na katin haka badu Ijip kili, ya udu oro ma hawe nadu oro ka la-un ma tama oro ki la-un ya oro ka tiyani oro kame dah.
20 Oro badeh sabudon ta lakou toro mari, tasah lakou mari mwasin badu Ijip badeh kameh i toro.”
21 Ano nadu Jekop oro bwidiy i le buku aliy. Eme Josep atehei sau ta aliu na katin haka, i buku none mene ndratiye ma hawe nyamon i noro ta san.
22 Josep ale edeu toro ari ari awin ta adeu ta asin, arile Benjamin le badeh iy atehei tonek silba boroh hawe limeh awin ta asin.
23 Ano iy atehei ta taman ronoh donki idih na lakou mwasin badu Ijip ma atehei ronoh donki ja idih na kalom hawe jabi ramen ma hawe nan rayah nyamon ta san.
24 Eme badeh iy tiye ta nadu tinen oro au ai, ma iy tiye i toro, “Ado sandra-i sado san.”
25 Ano oro ruwani Ijip ma adek a hamon ala hawe tama oro Jekop ala Kenan.
26 Eme oro tiye ta tama oro anya, “Josep badeh bamak bwe! Iy badeh atondrok kon Ijip mari!” Eme Jekop badeh andru-uk ma batehei budon tan bahis bala ta sahou toro handru bwe.
27 Arile udu, oro asehek sahou mari badu boho Josep i tan, ano iy anyolom iri sau aliu na donki mene Josep atehei i mine oro badu Ijip eme badeh, ma balen aleu.
28 Eme Jekop anya, “Naduk Josep badeh bamak bwe, iy udu kede-eh le! Jo kili kanyolom iy koro-an jo kimek.”