4
Iri atudun Kindrei udu kandrah
1 Ameh ranah nane dah ano badeh, ari ja asahan i buku doh: Jo anyolom kou ari asak udu kandrah. Iy ndramak doh mene jo anuhun bohon bwena, nyaro bohon asehek sahou eme tek, i buku iri lau oloh ndrah, iy asehek i buku doh, “Ou ame loken dah, jo kameh leheya ou tiri lakou mara-ei kameh asahan hamon.”
2 Ma se nawin bwe, Malawin Ndrabun eme bwele-ek, ma jo anyolom koyeu ari ta kabin udu kandrah, ma ndramak ari manyah udu aliy.
3 Ma mada iy ndramak doh anya, lomadan solo-an labai lomotani kon mara-ei i buku bek ari iri aloh jaspa, ma bek ari ja saraman iri aloh koniliyen, nyikadin labai, buku an anya ili bwele-en. Ma beteke nyabwiu awudi koyeu tan, ma jo anyolom idoh anya buku bek ari nyorowan iri aloh emeral.
4 Ma jo ale anyolom koyeu ma lunoh hahuw (24) awudi koyeu ta kabin nane doh, ma oro batun ma lunoh hahuw (24) badeh, manyah ado bada koyeu doh. Iri asini awin lawe-en belen mara-ei, ma barak tiri badeh, bek nyikilikin i buku barak tiri kabin adeu udu batu iri.
5 Ya, udu bada koyeu ta kabin doh, jo anyolom kalik takamek ili eme, ma jo anuhun nyaro lakou tinan labai asahan, ma kuruh atohou i le rasan. Ma udu bwena ta koyeu ta kabin doh, jo anyolom sun ma ndro taloh anya udu aliy. Oro sun ma ndro taloh doh leheya i buku Malawin Mwasin ta Kindrei.
6 Udu mirihik ta koyeu ta kabin badeh, lakou ari udu aliy i buku ndras laba tinan, i buku torowe lewen labai. Koyeu tan udu alih ta lakou mara-ei. Ma jo atou lakou ma mulin ma hahuw koha oro udu aliy. Oro ales ma awudi koyeu ta kabin doh. Ma mada oro badeh, solo-an labai tubuluhi mada oro ma kona oro mara-ei.
7 Lakou ma mulin ma mwena kone madan badeh, i buku layon. Iy ari ja, kone madan i buku bulumakau mwan. Iy ari ja, madan udu aliy, konen i buku batu ndramak awas. Ma iy ari ja badeh, konen i buku manyuwe, lu-u balen alawe ma iy atah loken.
8 Oro lakou ma mulin ma hahuw doh, iy ari, ari badeh, banin ma onoh, ma mada oro solo-an labai tubuluhi bada oro mara-ei, udu bwele-en ma udu bahandra bani oro ale. Na len ma ben mara-ei badeh, oro bamunyau se ta ayah wari bwai. Oro badeh, ayah wari ma asehek sahou i buku doh:
“Laban Kindrei, iy tawi iri boto-on mara-ei.
Iy ndrabun, iy ndrabun, iy ndrabun labai.
Ndra bwena bwena iy udu aliy,
Nadah badeh, iy udu aliy ale.
Ma iy kameh eme hamon ja.”
Oro badeh, bamunyau ta aloh sahou doh bwe.
9 Oro lakou ma mulin ma hahuw nane doh, ayah wari ta sekesek i ta Kindrei manyah udu bada koyeu ta kabin, iy winiyan bamak bwe, ta udu le buku don ai. Ma na bolo len mara-ei oro lakou ma mulin ma hahuw nane doh atudun nyaran, ma adeu wurah i tan. Len ari buku ari oro lakou ma mulin badeh, amekes le ai.
10 Ya, oro lakou ma mulin amekes, ma oro batun ma lunoh hahuw (24) badeh, atehei bwili ndru-u oro i andri udu mada Kindrei, iy manyah udu bada koyeu ta kabin. Ma oro atudun Kindrei, iy ta udu le buku doh. Ma oro ale akahei barak toro nane bek nyikilikin ili taku udu mirihik ta koyeu ta kabin, ma oro anya:
11 “Laban, ou Kindrei tahi.
Ou mwasin labai ma ou are loken, loken labai,
ta iri mwan ma badih kasekesek ou, ma katudun nyaram,
ma kado bahandra boto-on tam le ari.
Tasah, ou amekes lakou marakon.
Na budon tam le amwenen, ou bwidi iri,
eme nadah, iri lakou marakon doh udu kede-eh.”