5
Jon atou buk ari doh bohon ndrakumum
1 Udu bolo ameh tek doh badeh, jo anyolom iy ndramak nane manyah udu bada koyeu ta kabin badeh, tawi buk ari udu minen salin, iri ndralukumwiy. Iri torowenei sahou udu bolon ma konan ale, ma Kindrei atehei tobwe ma ndro taloh udu aliy ma ari ndramak winiyan basihiy bwe.
2 Ano ja, jo anyolom angelo ari boto-on labai eme, ma iy aloh i buku doh, “Are lau mwasin handru, kameh winiyan sudi tobwe doh iu, ma sihi buk asak? Ari ndramak udu kede-eh, deh bwe?”
3 Angelo asehek i buku doh ano le badeh, ma iri lau mara-ei atalan ta asilah ari ndramak. Iri asilah bolo kandrah ma bwele-e munyak, ma udu bahandra munyak, kon tiri lau ndramak ndrasu-u, arile iri basilahei ari ndramak ja bwai, ya ari ndramak winiyan banyolom bolon bwe le.
4 Jo anyolom badeh, iri bandruni ari ndramak mwasin labai ta iy winiyan sihi buk doh ma anyolom bolon ja bwai. Eme ma bwidi jo eden.
5 Jo eden le ai. Ano batun ari badu bolo oro lunoh hahuw (24) nane eme asehek sahou eme tek i buku doh, “Ou saden! Ou atou! Ndramak ari kede-eh i buku layon, iy badu boho kamen tiri Juda, ma iy ale badu boho kamen ta tubun Debit. Iy i buku sisine kei asahan ta kandro kei iri mwetehei mwena. Iy idi balik uru kandriyen ndra-in. Eme ma iy winiyan sudi tobwe ma sihi buk doh asak.”
Jon anyolom Nadu Sipsip ta Kindrei
6 Ano badeh, jo anyolom ndramak ari, iy ales i buku Nadu Sipsip ta Kindrei. Nyolom tan i buku iri lau ndradai iy ndramak, arile iy amak eme awas ja. Iy ales udu le alih ta ka-u koyeu ta kabin, ma oro lakou ma mulin ma hahuw hawe iri batun. Kasoh tan ma ndro taloh hawe madan ma ndro taloh. Madan doh badeh, leheya i buku Malawin Mwasin ta Kindrei ma ndro taloh. Kindrei ndrasuni iri ndrala bolo kon munyak mara-ei ta amekes lahou tan.
7 Nadu Sipsip doh eme, ili andrei buk udu mine Kindrei salin, iy nane manyah udu bada koyeu ta kabin.
8 Iy ili andrei buk, ano oro lakou ma mulin ma hahuw, hawe oro batun ma lunoh hahuw (24) atehei bwili ndru-u oro i andri udu mirihik ta Nadu Sipsip ta Kindrei. Oro batun ari, ari badeh, tawi ndran iri aloh hap, udu mine oro hawe bwekei raben bek nyikilikin. Ma eh manahu buburen irek udu bolo bwekei doh, ma tuhi bwekei mara-ei. Idoh leheya buku salom ta lau mwan ma badih ta Kindrei marakon.
9 Iri ame ayah wari ari ha-un i buku doh:
“Ou mwasin handru ta andrei buk doh,
ma sudi tobwe marakon nane iu.
Tasah, iri mene adai ou amak,
ma na ndrayem amwenen, ou ndrakonohei iri mwan ma badih ndrame hamon, ta Kindrei.
Ya, ou badeh, ndrakonohei iri mwan ma badih ndrame hamon ja.
Iri lau doh badu boho kamen mari,
ma boho kon rakon rakon badu kon munyak mari,
ma iri lau bada iri randrah, randrah,
ma badu kon munyak tinan mara-ei.
Eme ma, nadah badeh, iri mara-ei ta Kindrei le ari kabwe.
10 Ou badeh, ndrabwidi iri ndrasahan pris ta amekes lahou ta Kindrei tataha,
ma iy asahan kabin tiri.
Ma iri kameh atondrok iri lau mwan ma badih mara-ei badu kon munyak.”
Iri atudun nyara Nadu Sipsip ta Kindrei
11 Ano badeh, jo anyolom, ma anuhun boho iri angelo solo-an labai, kane iri buku ralou (10,000), tulou (30,000), ndru tulou (70,000) kane iri ili le ai, i buku nyaran bwe (100,000,000). Iri mara-ei doh, hawe oro lakou ma mulin ma hahuw, ma hawe oro batun mara-ei badeh, ales ma awudi koyeu ta kabin.
12 Iri badeh, ayah wari boto-on labai, ma boho iri iu ili loken mara-ei i buku doh:
“Iy ndramak kede-eh badeh, Nadu Sipsip ta Kindrei, iri lau mene adai iy imek.
Iy winiyan ta akohok nyaran i tinan, iri lakou mwasin ma tanan mwasin, ma hawe boto-on mara-ei.
Iy winiyan handru, lau mara-ei katudun nyaran.
Kadeu sekesek ma wurah kili le tan.”
13 Ano badeh, jo anyolom iri lakou mara-ei ma mulin udu kandrah, udu bwele-e munyak, udu bahandra munyak, udu ndrahune iri lau ndramak ndrasu-u, ma udu bwele-e ndras. Iri lakou mara-ei doh badeh, jo anuhun iri ayah wari i buku doh:
“Kindrei manyah udu bada koyeu ta kabin, ma hawe Nadu Sipsip tan.
Uru winiyan akohok wurah, ma nyara uru i tinan mara-ei.
Ma sekesek hawe boto-on mari ta ere le buku doh winiyan bano bwe!”
14 Udu bada len, iri amekes i buku doh, eme ma oro lakou ma mulin ma hahuw anya, “Idoh handru.” Ma iri batun mara-ei atehei bwili ndru-u iri i andri ma atudun Kindrei hawe Nadu Sipsip tan.