BÚKÙ TÀ TƗ́DHƗ́//RU YÌZO DHƗ ÀDHYA MÁROKÒ 13

Yésu longó tépelò nɨ pfùma nɨ tà

(À kònò kpà Màtáyò 24:1-2; Lúkà 21:5-6)

1 Yésu dré tá adréràꞌa apfòle tépelò lésè dhɨ ꞌá dhɨ, akódhɨ nɨ lebèbhá kɨ àlo dré tàzoá drá dhɨ: «Tadhálépi, mɨ́ nò rè dzó kàdrɨ̀ gú kònɨ ɨ, àyɨ kɨ kɨ́rà ɨ́be ká!» 2 Dɨ Yésu logó drá dhɨ: «Mɨ́ nò tsì dzó kàdrɨ̀ kònɨ ɨ ꞌí? Lókyá adrélépi alɨ̀le dhɨ sè dhɨ, à gò vélé àyɨ kɨ kɨ́rà kɨ àlo kisú àzya nɨ dri ko. À nɨ kɨ́rà nda kɨ lebhé títí kìní mi.»

Tà dra ru ꞌobhá lókyá kùdù nɨ tà tadházó dhɨ ɨ

(À kònò kpà Màtáyò 24:3-14; Lúkà 21:7-19)

3 Àmvolásà dhɨ, Yésu ɨ̀ dré lɨ̀zo mbàle kòngó Òlívè fa kya drìna gò, akódhɨ dré lɨrɨ́zó àrà kɨtswázó tépelò no lásà bwà dhɨ na. Gò Pétèró, Yàkóbhò, Yòwánɨ̀, tsàle Àndréyà be dhɨ ɨ̀ dré akódhɨ nɨ lizízó àyɨ pátí, tàzoá dhɨ: 4 «Mɨ́ tà rè àma dré, tà nda kòdhɨ kɨ atsá ángutú ya dhɨ ká? Àdho tà nɨ ru ꞌo drìdrì tadházóá dhɨ, tà títí nda ɨ̀ adré ꞌòle ru ꞌo káyà dhɨ nɨ̀?»

5 Yésu logó àyɨ dré dhɨ: «Mɨ̀ kàdré àmɨ kɨ lɨkɨ́ dóro, dhya àlo kòlɨtɨ́ró àmɨ ko. 6 Tàko ko, móndɨ́ bǐ dhɨ kɨ alɨ̀ áma rú sè adrélé tàá dhɨ, ‹Ma Mèsɨ́yà ꞌɨ!› gò, ɨ̀ dré móndɨ́ zyandre dhɨ kɨ lɨtɨ́zó. 7 Mɨ̀ nɨ àdzú kɨ kpòrò yi ànyɨ, adrézó kpà àdzú kɨ rúbí yi làwú làvo na. Dɨ, mɨ̀ kòtayɨ́ àmɨ kɨ togó adrélé gàle ásà dhɨ ko. Tàko ko, adré lèá dhɨ, tà nda kòdhɨ ɨ̀ kòꞌo rè zyà ru ꞌíká. Dɨ, lókyá kùdù atsá rè ko. 8 Súrú kɨ àdzú bhu súrú àruka ɨ́be. Òpɨ̀ kɨ kpà àdzú bhu òpɨ̀ àruka ɨ́be. Kàdíkàdi nɨ bvò kosé, ɨ̀ndɨ̀ kàrábhò nɨ dhe àrà twátwa ɨ ꞌásè. Dɨ, tà nda kòdhɨ kɨ ngbà ꞌí adré ngóró tòkó nɨ mváaswa nɨ kɨdhoma tɨ́nɨ.

9 Dɨ àmɨ ró dhɨ, mɨ̀ kàdré àmɨ kɨ lɨkɨ́ dóro. Tàko ko, à nɨ àmɨ kɨ ꞌo topfòle tàbvó tǎrà ɨ ꞌásè, adrézó àmɨ kɨ bhwa lɨ̀sámbò dzó ɨ ꞌásè. Áma tà sè dhɨ, mɨ̀ nɨ àmɨ kɨ totó gùvèrènérè ɨ kandrá ɨ̀ndɨ̀ ópɨ́ kàdrɨ̀ ɨ kandrá, mɨ̀ kòkɨtswáró áma tà mɨ̀ dré nòle ɨ̀ndɨ̀ mɨ̀ dré yìle dhɨ kɨ longó àyɨ dré be dhɨ bvó. 10 Tàko ko, adré lèá dhɨ, à kòlongó rè zyà Rúbí Tanɨ súrú títí ɨ dré ꞌíká. 11 Dɨ, à kàdré àmɨ kɨ dri tàbvó tàle dhɨ, mɨ̀ kòbhà àmɨ kɨ togó adrélé lanzìle tà mɨ̀ dré dra tàle àmɨ rúsè dhɨ dri dhɨ ko. Be ró dhɨ, mɨ̀ kàdré ndɨrɨ tà Gìká dré dra fèle àmɨ dré tàle lókyá nda sè dhɨ nɨ ta kòdhya. Àngyá ko, mɨ̀ nɨ adré tà nda nɨ ta àmɨ ko. Be ró dhɨ, Tɨrɨ́ Lólo nɨ adré tàá nɨ̀.

12 Móndɨ́ kɨ àyɨ kɨ adrúpi kɨ lefè todràle kàrɨbhá ɨ drɨ́gá. Ànzɨ kɨ atá kɨ kpà àyɨ kɨ ànzɨ kɨ lefè todràle. Ànzɨmvá kɨ lɨgɨ́ àyɨ kɨ tibhá ɨ rú, adrézó àyɨ kɨ ꞌo todràle. 13 Móndyá títí dhɨ kɨ togó kònzɨ bha àmɨ rú áma tà sè. Dɨ, dhya adrélépi ɨ́na togó tsɨ, adrézó áyɨ totó tätä tsàle kùdù na dhɨ nɨ adrɨ́.»

Kɨzà kàdrɨ̀ lavúlé dhɨ

(À kònò kpà Màtáyò 24:15-28; Lúkà 21:20-24)

14 «Dɨ mɨ̀ nɨ ‹ngá adrélé gàle gàgà adrélépi ngá lólo dhɨ kɨ kɨzá dhɨ› nɨ no adréràꞌa áyɨ totó àrà kɨtswálépi tá kàdré lána ko dhɨ na.* (Lè dhya adrélépi tà kòdhɨ nɨ na dhɨ kàdré àndu nɨ nɨ ni dóro.) Lókyá nda sè dhɨ, lè móndyá dra adrébhá bvò Yùdáyà àdhya na dhɨ ɨ̀ kòlapá ràle kòngó ɨ drìna. 15 Lè kpà dhya dra adrélépi áyɨ dzó drìna dhɨ kàsí fɨ̀le dzó na, áyɨ ngá kɨ do lapázó ába dhɨ ko. 16 Dhya dra adrélépi amvú na dhɨ kògò nzɨ̀le ɨ́ bhàna áyɨ kɨ́tá kɨdhɨ̀ àdhya nɨ do lapázó ába dhɨ ko. 17 Kìtú nda ɨ tú dhɨ, kɨzà nɨ adré kàdrɨ̀ tòkó adrébhá ꞌa ɨ́be dhɨ ɨ dré, ɨ̀ndɨ̀ tòkó adrébhá bà fe ànzɨmvá ɨ dré dhɨ ɨ dré. 18 Mɨ̀ kàdré tà zi Gìká tí, àmɨ kɨ lapama nda kàdréró kɨdhɨ̀ lókyá sè ko.† 19 Tàko ko, kɨzà kìtú nda kya nɨ adré kàdrɨ̀ lavúlé. À nò rè kɨzà kárá be kònɨ̀nɨ nda ko, kɨdhólé Gìká dré bvò bhǎrà lésè atsálé ándrò kònɨ̀dhɨ. À kɨtswá kpà gòle vélé nòá tàdzí ko. 20 Kònò Mírì kòkɨ tá kìtú nda kɨ bvó ko dhɨ, dhya àlo bvò dri dhɨ kɨtswá tá adrɨ́lé bwà ko. Dɨ, Mírì kɨ ɨ́na kìtú nda kɨ bvó móndyá ɨ́ dré zɨ̀le dhɨ kɨ tà sè.

21 Lókyá nda sè dhɨ, à kàdré tàá àmɨ dré dhɨ ‹Mɨ̀ nò rè ká, Mèsɨ́yà kònwa!› dhɨ, mɨ̀ kòkaꞌì ko. À kàdré kó tàá dhɨ ‹Akódhɨ kònàle!› dhɨ, mɨ̀ kòkaꞌì ko. 22 Tàko ko, mèsɨ́yà kɨnzò ro dhɨ kɨ apfò pròfétà kɨnzò ro dhɨ ɨ́be adrélé tà kàdrɨ̀ lɨ́ndrɨ́ga ró adrébhá àyɨ kɨ rìnyí tadhá dhɨ kɨ ꞌo, kòkɨtswá dhɨ, ɨ̀ dré ndɨ̀ndɨ̀ móndyá Gìká dré zɨ̀le dhɨ kɨ lɨtɨ́zó. 23 Má longó àmɨ dré tà nda kòdhɨ ɨ títí drìdrì. Dɨ mɨ̀ kàdré tàmìga dri.»

Móndɨ́ nɨ Mvá nɨ agòma

(À kònò kpà Màtáyò 24:29-31; Lúkà 21:25-28)

24 «Kìtú nda ɨ tú, kɨzà kàdrɨ̀ nda àmvolésè dhɨ,

‹kìtú nɨ mì nɨ atsá tínímvá ro,

mbǎ gò vélé mvèle ko,

25 bhìbhínyà kɨ ledhé bhù lésè,

ɨ̀ndɨ̀ rìnyí bhù na dhɨ kɨ ru kɨzɨ́.›‡

26 Dɨ lókyá nda sè dhɨ, móndyá títí dhɨ kɨ Móndɨ́ nɨ Mvá nɨ no adréràꞌa alɨ̀le ndùrùku ɨ ꞌásè, rìnyí kàdrɨ̀ be ɨ̀ndɨ̀ mìlanzìlanzì kàdrɨ̀ be. 27 Gò akódhɨ dré áyɨ ángéló kɨ mùzo lɨ̀le áyɨ móndyá ɨ́ dré zɨ̀le dhɨ kɨ kɨmó bvò nɨ pá su dhɨ ɨ lésè, kɨdhólé bvò nɨ kùdù lésè, tsàle byá bhù nɨ kùdù na.»

Tà tadhálé fígì fa nɨ tà rú dhɨ

(À kònò kpà Màtáyò 24:32-35; Lúkà 21:29-33)

28 «Lè mɨ̀ kàdré tà tadhálé fígì fa nɨ tà rú dhɨ nɨ àndu ni dóro. Fígì fa nɨ dríti kàdré atsálé màlɨmálɨ gò, bí nɨ dré adrézó ròle dhɨ, mɨ̀ nì tàle dhɨ, yǐgú ànyɨ dhɨ be. 29 Kókpà kòdhɨ tɨ́nɨ, lókyá mɨ̀ dré dra tà nda kòdhɨ kɨ nòzo adréràꞌa ru ꞌo dhɨ tú dhɨ, lè mɨ̀ kònì tàle dhɨ, Móndɨ́ nɨ Mvá láti ꞌá, ndɨ̀ndɨ̀ àmɨ kɨ dzó tí káyà dhɨ. 30 Má adré tà bàti ta àmɨ dré: Móndyá dra adrébhá lɨ́drɨ̀ ɨ́be lókyá nda sè dhɨ ɨ̀ kɨtswá dràle títí drìdrì tà títí nda ɨ̀ dré dra ru ꞌòzo dhɨ kandrá ko. 31 Bhù ɨ bvò be dhɨ kɨ akɨ́. Dɨ, áma kúlí ɨ̀ kɨtswá àyɨkya tàdzí akɨ́lé ko.»

Gìká nì ngbà ꞌí lókyá kùdù nɨ̀

(À kònò kpà Màtáyò 24:36-44)

32 «Dɨ, dhya àlo nì ɨ́na kìtú ꞌɨ yà, kó ngalè sáà ꞌɨ yà tà nda ɨ̀ dré dra ru ꞌòzo dhɨ ko. Ndɨ̀ndɨ̀ ángéló bhù na dhɨ ꞌɨ yà, kó ngalè Gìká nɨ Mváagó ꞌɨ yà dhɨ, ɨ̀ nì ko. Gìká Atá nì ngbà ꞌí nɨ̀ kalóma. 33 Adré dɨ lèá dhɨ, mɨ̀ kàdré àmɨ kɨ lɨkɨ́, adrézó tàmìga dri! Tàko ko, mɨ̀ nì ngalè lókyá nda nɨ atsá ángutú ya dhɨ ko.

34 Tà nda kòdhɨ ngóró agó àlo adrélépi ꞌòle lɨ̀le atsí na dhɨ àdhya tɨ́nɨ. Akódhɨ nda adré rìnyí fe áyɨ màrábà àlo àlo títí dhɨ ɨ dré adrézó àyɨ kɨ àzí ꞌo gò, dré adrézó tàá dhya adrélépi dzóti lɨkɨ́ dhɨ dré dhɨ, kàdré tàmìga dri. Dɨ dré adrézó dzó nda nɨ tayɨ́ lɨ̀zo. 35 Mɨ̀ kàdré dɨ tàmìga dri. Àngyá ko, mɨ̀ nì lókyá ángùdhi dzó líyí nda dré dra agòzo ásà dhɨ ko, gba kàdré ɨ̀ndró sè yà, ngátsi kɨ́tógá sè yà, àgólòwa dré tsírà bheràꞌa yà, kó ngalè drùbhì sè yà dhɨ. 36 Dɨ akódhɨ kàgò ngbǒ ró dhɨ, mɨ̀ kòtayɨ́ àmɨ akódhɨ dré kisúlé adréràꞌa ayí ko dhɨ ko. 37 Tà má dré adrélé tàle àmɨ dré kònɨ̀dhɨ, má adré kpà tàá móndyá títí ɨ dré: Mɨ̀ kàdré tàmìga dri!»

* 13:14 13:14 À kònò Dànyélè 9:27; 11:31; 12:11. † 13:18 13:18 Yúdà ànzɨ kɨ bvò na dhɨ, «kɨdhɨ̀ lókyá» kònɨ̀dhɨ, lókyá kɨdhɨ̀ ro kóná àlo na, adrélépi gìle vwàvwà ro dhɨ ꞌɨ. ‡ 13:25 13:25 À kònò Èsáyà 13:10; 34:4; Èzèkyélè 32:7; Yòwélè 2:10; 3:4.