14
Angidaji gwudi yïjïr na ondaji ngwungla ngwe ngwuꞌter
1 Yäy gu no, gwujanar gay gidi ämnï, ara je yigor ïyïjï angidajing gwudi Lïgïꞌrïm lidi Ngwaalu gwece gwece angidaji gwudi yïjïr ndi ondaji ngwujaꞌri ngwïndï Ngwaalu.
2 Dïjï danni dati ondaji lingla liꞌter, dati ꞌti ondacu dïjü danni dümnä a be dati ondaci Ngwaalinga. ꞌDidanu dïjï dere daꞌti dati lenge ngwujaꞌri ngwüngün. Dati ondaji yujimida Lïgïꞌrïm le lidi Ngwaalu.
3 A be dïjï danni dati alliji yïjïrä, dati ondaci ngwüjü ngwujaꞌri ngwanni ngwati rime aar ojemeye ngwüjü nono aar je orꞌtemaji.
4 Dïjï danni dati ondaji ngwujaꞌri lingla le liꞌter, dati oda ligoꞌro lüngün ꞌdogo a be nginde ngwanni gwati alliji yïjïrä, gwati oda giꞌdonga gidi Ngwaalu.
5 Äny gwüjädï ndi ari nga nga ꞌdar ngaa ondaji ngwungla ngwe ngwuꞌter, nyi be jadani ndi ari ngaa alliji yïjïrä. Gwanni gwati alliji yïjïrä gwupana guꞌru nginde gwanni gwati ondaji ngwungla ngwe ngwuꞌter, ꞌdogo manari gwuma ji gwanni ngwa gwürlï ngwujaꞌri nunnu a je giꞌdoonga gidi Ngwaalu lenge aar ngwe oda yigoꞌro yegen.
6 Gwenene lani ngweengga minyi ila ꞌdanggalu nyi ondaji ngwujaꞌri ngwungla ngwe ngwuꞌter, jayi gwuru ange gwa aang mbuji ꞌdünggüny? ꞌDogo manari äny gwuma je ondaci ngwujaꞌri ngwani ꞌtäälü ngaa je enggaci yere yani bebere na yïjïr yere na ngwujaꞌri ngwere ngwudi enggace, yiꞌral giyee ya je oda ngaa la mätïnälü.
7 ꞌDi ꞌto ngwong ngwanni ngwati aar je ärï, ngwati aranu ngwaꞌti ätï miding, nono guulla na dümbärä, ngwa aar ngwe lenge yal yegen yorto ngwaalinga ne ma aar je ꞌti gïꞌtïjä yal rung rung?
8 A mana, ma ꞌti giil mïꞌrïnä yal yilinginna, yärü gwanni gwa ji mama ngwüꞌtädä gïyäärä?
9 Giyee yiru gu ꞌto ꞌdanggalu. Ma aang ꞌti ondaju ngwujaꞌri ngwulinginna lingla le lalu, awa a be dïjï lenge ngwujaꞌri ngwanni ngwara ngwe? A gwa be ji ꞌdogo ndi ondajajalu ngwaꞌri ngwanu.
10 Yilinginna ndi ari ngwungla ngwo gïdïdlä ngwonyadu yiꞌranu a be ngwungla ku, ngwulinginna ngwujaꞌri.
11 Minyi ꞌti lïngïdï ngwujaꞌri ngwudi lingla ngwondaja je dïjï, äny gwuru gïïlü giꞌter gïdïjï ndoo dondaja na nginde gwuru gïïlü giꞌter ꞌdünggüny.
12 Giyee yiru gu no ꞌto ꞌdanggalu. Anni ïtärä je yigoranu gwani angidaji gwudi Lïgïꞌrïm lidi Ngwaalu, ara je be yigor ïyïjï gendaning angidajing gwanni gwati oda giꞌdonga gidi Ngwaalu.
13 Yäy gu no, dïjï danni dadi ondaji lingla le liꞌter, gäbïcär ngwotaci Ngwaalingalu aar ätädä yiima yidi gwürlï ngwujaꞌralu ngwarung ngwe.
14 Ndi ari minyi otaci Ngwaalingalu lingla le liꞌter, lïgïꞌrïm lüny lati otaci Ngwaalingalu, a be yaꞌrany yüny yaꞌti ätï gonyalu gere.
15 No yiiru yiru ange yadi nje ärrï? Nggwotaci Ngwaalingalu lïgïꞌrïm le lüny nyi be otacalu ꞌto yaꞌrany ye yüny. Äny gwa elnge lïgïꞌrïm le lüny nyi be elnge ꞌto yaꞌrany ye yüny.
16 Ma be ari nga gwürtädï Ngwaalinga lïgïꞌrïm le lingla le liꞌter, a be dïjï danni daꞌti da lenge ngwujaꞌri ngwara ngwe. Awa ngwube ari, “Yiru gu” ngwujaꞌri ngwunga ngwuca ngwe Ngwaalinga yäy ꞌtu, anni aaꞌting lïngïdï ngwujaꞌri ngwanni ngwara ngwe?
17 Yanni yica ye Ngwaalinga yäy ꞌtu yijaw a be yaꞌti ya oda dïjü diꞌter.
18 Nggwuca Ngwaalinga yäy ꞌtu ndi ari nggwati ondajani ꞌdanggalu ꞌdar ngwungla ngwe ngwuꞌter.
19 A be ndi oꞌrajidalu gwudi giꞌdoonga, yijayana ndi nyi ondaji ngwujaꞌri ꞌtudini (5) ngwulinginna nunnu nje ngwe enggaci ngwüjü ngwuꞌter ndi nyi ondaji ngwujaꞌri ngwüüꞌrï ꞌdï (10,000) lingla le liꞌter ngwaꞌti linginna.
20 Lani ngweengga, gäbïcär yogonga. Giyiꞌral yanni yiki, rüdär yaꞌranya nono yidi yïjü yanni yooko, a be ndi ïrïyï ngwäyälü gwalu rüdär nono ngwüjü ngwanni ngwupa.
21 Yüllïnä giyobo ndi ari,
“Ngwungla le ngwudi ngwüjï ngwuꞌter
na ngwulem ngwe ngwudi ngwüjï ngwuru gïïlü ꞌter
nggwa ondaci ngwüjü ngwüny,
a be ꞌdi no ngindenga laꞌti liny ꞌdengenaci,”
Ngwaalu ngwaru gu.
22 Yäy gu no, ondaji ngwungla ngwe ngwuꞌter gwäꞌtüdï giꞌremna ngwïkïrïjïn ngwube ru giꞌremna ngwüjï ngwanni ngwäꞌtüdï ngwïkïrïjïn nunnu ngwinggidi yiima yidi Ngwaalu a be yïjïr yidi ngwïkïrïjïn yiru, yäꞌtüdï yidi ngwüjï ngwanni ngwäꞌtüdï ngwïkïrïjïn.
23 Yäy gu no ma aang oꞌrajidalu gwüpäng ꞌdar liru giꞌdoonga gidi Ngwaalu, a ngwüjï ꞌdar ondaji ngwungla ngwuꞌter, a loko lanni laꞌti lïngïdï yiꞌral yidi Ngwaalu na loko lanni läꞌtüdï ngwïkïrïjïn ändä, laꞌti la ari nga nga rlälü giyiꞌrano?
24 Ma be ari gwanni gwäꞌtüdï dïkïrïjïn na dïjï danni daꞌti lïngïdï yiꞌral yidi Ngwaalu ändä ngwumbuji ngwüjü ꞌdar ngwalliji yïjïrä, gwa gäbïcïnï gwücïnänü gwa lenge ndi ari nginde gwuki na gwa aar gwe obalu ngwujaꞌri ngwe ꞌdar ngwuꞌdingining je,
25 na yujimid yere yidi ligor lüngün ya ꞌtädälü, no nginde gwa aalu yirku ye gwa kwuci Ngwaalingalu gwa inggidi ndi ari, “Ngwaalu ꞌdiꞌdanu ngwo ꞌdanggalanu.”
Äpïjï Ngwaalinga yobo gay ge gïdünälü
26 A ladi be ara lani ngweengga? Ma aang oꞌrajidalu gwüpäng, a dïjï deꞌte ätï delnga na ngwujaꞌri ngwudi enggaci ngwüjü, na ꞌtäjälü na ondaji ngwungla ngwe ngwuꞌter na ndi gwürlï ngwujaꞌralu. Giyee ꞌdar gäbïcär je aar äpïnï gwani ojemeye giꞌdonga nono gidi Ngwaalu.
27 Ma dïjï dere ondaji lingla le liꞌter, aar ondaji rom (2) na täꞌrïl (3) ꞌdogo, ati aar dünïcïdï ndi ondaji a dïjï ji danni dadi gwürlï ngwujaꞌralu.
28 Ma dïjï erne dadi gwürlï ngwujaꞌralu, gwanni gwadi ondaji lingla le liꞌter ngwugwugwundi kiꞌdoonga ngwondaci ligoꞌro lüngün ꞌdogo na Ngwaalu.
29 A ngwïjïr rom na täꞌrïl ondaji, a be loko ïrïyï ngwujaꞌri ngwäy nono mama ngwanni ngwaraar ngwe.
30 Na ma ꞌtäjälü ïlïjä dïjü dijalu, gwanni gwuju ndi ondaji gwerre gwerre, ngwüdünï.
31 Ndi ari nga nga ꞌdar la be gigiꞌtidi ndi alliji yïjïrä nunnu ꞌdar aar lenge na ꞌdar aar ojeme nono.
32 A be ngwügïꞌrïm ngwudi ngwïjïr ngwa je ngwïjïr ngwegen määtä.
33 Ngwaalu ngwäꞌtüdï ngwudi ꞌdïgwüꞌrr yiꞌralanu, aar be ru Ngwaalu ngwudi adatalu. Anaku raar gu giyiꞌdoonga ꞌdar yidi ngwüjï ngwudi Ngwaalu,
34 a ngwaw gwugwundi giyiꞌdoonga yidi Ngwaalu. Aaꞌti ngwa aar je gäbïcï ndi utalu aar be ätï ꞌdengenacing anaku aru gu yobo.
35 Ma aar ru ngwadi lenge aar utalu yiꞌral yere, aar otaci ngwuralu ngwegen ꞌdunu, ndi ari yaꞌti yijaw ndi daw utalu kiꞌdoonganu.
36 Ngaa laru ngwujaꞌri ngwudi Ngwaalu ngwüꞌtüdï ꞌdanggalo? Na ngaa laru ngaa ru jücü lanni lima gu ngwujaꞌri ngwudi Ngwaalu obanano?
37 Ma dïjï ci ligoꞌro lüngün diru dïjïr na dangidacaar yiima ye yidi Lïgïꞌrïm, ngwube lenge ndi ari ngwujaꞌri ngwee ngwüllïjä je, girinya gwudi Deleny gwuru.
38 Mung ïꞌdädänü ngwujaꞌri ngwe ngwee, nginde gwa aar gwe ïꞌdädänü giligoꞌro lüngün!
39 Yäy gu no, lani ngwänggärï ara je yigor enyanu ndi alliji yïjïrä, na aaꞌti ngaa la ümïnïcï ondajing ngwungla le ngwuꞌter.
40 A be yiꞌral ꞌdar äpïnï gay ge gijaw aar ele kayalu.