3
Ngwïnäd ngwudi Ngwaalu
1 Yäy gu no lani ngweengga, nggwa ꞌta je enggaca nono ngwüjü ngwudi lïgïꞌrïm, nga je be enggaci nono ngwüjü ngwudi lingeno ngaa ru nono yïjü yanni yooko ꞌdogo ngwaalu ndi ämnï ndi Kirictu.
2 Yanni yima je enggaci yiru nono ma je ïcï yan, ngwaꞌta je iya enying gwanni gwojemanu. Ndi ari nga nga laꞌti burna ndi eny enying gwanni gwojemanu ꞌdi komon gidi gweneng, ngaa gilona laꞌti mama.
3 Ndi ari ngaa gilona liru ngwüjï ngwudi dïdlä gilingeno. Ndi ari anni rangaa na ngwüꞌdüny ati aang kadi, yäꞌtüdï mene ndi ari ngaa liru ngwüjï ngwudi dïdlä aang arri nono ngwüjï ꞌdogo?
4 Ndi ari manari dïjï dima ari, “Äny gwudi Bulij gwuru,” a ndee ari, “Äny gwudi Abuluj gwuru,” ngaa laꞌti arru nono ngwüjï ꞌdogo?
5 A be Abuluj gwani yärü? A yärü gwani Bulij? Liru ngwïnäd ngwügäꞌräjä je ndi ämnï Ngwaalu. Lapu yiiru yegen anaku ätädä je gu Deleny.
6 Äny gwuru gwani Bulij gwükwüdï yuula giyigoranu yalu a je be Abuluj angiꞌraci a be Ngwaalu ꞌroꞌraji.
7 Yäy gu no, gwanni gwükwüdï gwäꞌtüdï guꞌru na gwanni gwangiꞌraca gwäꞌtüdï guꞌru, a be Ngwaalu ru ngwanni ngwuꞌroꞌraja.
8 Gwanni gwati kwoy na gwanni gwati angiꞌraci, bupi gwuru gweꞌte pu, a dïjï deꞌte deꞌte da aar ätä guꞌru gani yiiru yüngün.
9 Ndi ari nyii lacajidu giyiiru Ngwaalinga le, ngaa be ru liru giruny gidi Ngwaalu ngaa ru oda gwudi Ngwaalu.
10 A yani yïmïꞌrü yanni yätädäär nje Ngwaalu äny gwügätï yidingo nono doorta danni dati oda dïlïngïdï a be dïjï deꞌte ila ꞌto nggu odala. A be gweꞌte gweꞌte gwa arngani ndi ari nggwo gwati oda awa.
11 Dïjï dere daꞌti da gatu yidingo yiꞌter giyidingala yanni yegeꞌta je Ngwaalu yani Yicu Kirictu.
12 Dïjï dere danni doda giyidingala giyee ngwuꞌduna ngwuru dab, buta na yoꞌrr yiru guꞌru, na ngwuꞌduna ngwuru yüꞌrï na yanya aar ru yipuru,
13 yiiru yüngün ya be aji ya ꞌtädïnälü. Ndi ari ya je gomon gidi pï yelenya nggäꞌdï ꞌtäjï giburalu. Ndi ari ya je ꞌtäjälü lïgä le. Lïgä la ïdäjï guꞌru gidi yiiru yidi dïjï deꞌte deꞌte.
14 Manari yanni yüdädïng je yima ꞌti uꞌdu, da aar ätädä guꞌru güngün.
15 Manari yima uꞌdi, guꞌru güngün ga dudi. Nginde gwa gïlängïdïnï gwa be ru nono dïjü dabru gïlïgänü.
16 Ngaa laꞌti lïngïdï ndi ari ngaa liru ngwuꞌdun ngwudi Ngwaalu lati je gu Lïgïꞌrïm lidi Ngwaalu jano?
17 Ma be ari dïjï ndo dati geraji ngwuꞌdunalu ngwudi Ngwaalu, da Ngwaalu gerajalu. Ndi ari ngwuꞌdun ngwudi Ngwaalu ngwujuꞌru ngwuru ngwani nga nga.
18 Aaꞌti dïjï dere ꞌdanggalanu da dudiyi ligoꞌro lüngün. Ndi ari manari dïjï dere ꞌdanggalanu daru diru dïjï dibebera bebere gwe gwudi dïdlä ndee, gäbïcär ngwuru deꞌrr nunnu ngwubebere ꞌdidanu.
19 Ndi ari bebere gwudi dïdlä ndee gwuru yeꞌrr ngwäyänü Ngwaalu. Ndi ari yüllïnä kitabanu, “Ngwaalu ngwati ïꞌdäcï ngwüjü ngwanni ngwaru ngwubebera ngwüꞌdïbä gwe ngwudi bebere gwegen.”
20 Yüllïnä ꞌto ndi ari, “Deleny dïlïngïdï ndi ari yigor yidi ngwüjï ngwanni ngwaru ngwubebera yiru ꞌtur.”
21 Yäy gu no, aaꞌti dïjï da ïrïngïnï dïjï de dümnä. Ndi ari yiꞌral ꞌdar yalu yiru ndi ari,
22 yani Bulij, yani Abuluj, yani Butruj, yani dïdlä, yani midi, yani yiꞌrany, yani gweneno na yani bïgänü, ꞌdar yalu yiru.
23 A nga nga liru lidi Kirictu na Kirictu gwuru gwudi Ngwaalu.