4
Ngwooꞌra ngwükäjär je ngwudi Kirictu
1 Yäy gäbïcär be a nje ngwüjï engga ndi ari a liru ngwïnäd ngwudi Kirictu ar ru ngwartan ngwätädäär je ndi inggidi yujimida yidi Ngwaalu.
2 A be yïbüpïnä ngwartan aar ru yigor yeꞌte pu giyiiru yegen.
3 A be yaꞌtiny ïtï änyïng aꞌtur manari nyii gwe obalu na aar nyi obalu yeleny ye yere yidi ngwüjï ngwümnä, ꞌdidanu ꞌdi nyi giligoꞌro lüny gwaꞌti übïdälü ligoꞌro le lüny.
4 Ligor lüny lijayanu ndi ari ngwaꞌti ätï yiꞌral nono yere. A be yaꞌti ani ndi ari äny gwujaw nono a be Deleny ru dadi nyi de obalu.
5 Yäy gu no aaꞌtina ngaa la obalu dïjï de gaji gaꞌtina ïndï ganni geꞌta Deleny. Dünär ꞌdi a Deleny oꞌra. Nginde gwuru gwadi ꞌtäjï yiꞌralalu gilingenalu yanni yändälü gïdïrïmänü ngwuje ꞌtäjälü yidi yigor yidi ngwüjï komon nggäꞌdï dïjï deꞌte deꞌte da be Ngwaalu ortada da mbuji guꞌru güngün.
6 Gweneno, lani ngweengga, äny gwondijaja giyiꞌral giyee ꞌdar giyigoꞌro yärï Abuluj gwe yani elelle gwalu gïdïlä, nunnu ngaa lenge gïdïlä därï nunnu aaꞌti dïjï dere da ꞌtü ngwujaꞌranu ngwanni ngwüllïnä, nunnu aaꞌti dïjï da piyi ligoꞌro lüngün ndi ïrïngïnï dïjï de deꞌte ngaa ïnïjï dïjü deꞌte.
7 Ndi ari yärü gwuru gwanni gwuruja je ꞌter gïdïjï diꞌter? Yanni yätä je ꞌdar Ngwaalu ngwuru gwätädä je. Ma be ari Ngwaalu ngwuru ngwätädä je, ange gwuru ngaa ye be arri nono ma ara je ꞌti ätädï?
8 Ngaa ligeꞌtaja ndi ari yima je mbuji ꞌdar yanni yibupa je, ngaa lima onje, ngaa lima ru ngweleny nyii laꞌti gu! Awa nggwüjädï ndi ari adinari ngaa ru ngweleny ꞌdidanu nunnu aadi ar acajidi giyelenyanu.
9 Giyo yänggädï nje nono Ngwaalu ngwuminje geꞌte guꞌru gooko liru ngwooꞌra ngwükäjäär je aar nje obedalu kebedalu lani yiꞌrany. Liminje geꞌte a nje dïdlä na yïꞌrr na ngwüjï ombajajalu.
10 Änyängä liru ngweꞌrr gwani Kirictu ngaa be bebere ndi Kirictu. Nyii lamiꞌratu ngaa be ojeme nono. Lima je näjï aar nje be calu mireny.
11 ꞌDi gomon gidi gweneng nyii gilo lïtï je ngwamanu ar nje ngwäädä eny, lïndälü ngwanginu ngwanu. Lïpïnä, aar nje linynyi poor.
12 Lundu ngwäy ndi ape yiiru ngwuy ngwe ngwärï nunnu nyii eny, aar nje ngwüjï lo nje onjaci. Aar nje übïnälü nyii orꞌtemaji,
13 aar nje üꞌrïdä yiꞌduru nono nyii gwäꞌräcänü yigor ye yïjïlänü. ꞌDi gomon gidi gweneng, nyii gilo lima ru nono gïrüräny ngwüjï nyii ru ngwudigany gïdïdlä.
14 Nggwaꞌti ullu ngwujaꞌri ngwee nunnu a je ngwe apiyi yaaru. Nje be ulli nunnu a je ngwe ola ndi ari nga liru yïjï yüny yanni yämnï nje.
15 ꞌDi ma aang ni ari lätï ngwudere ngwüüꞌrï ꞌdï (10,000) ngwanni ngwata je enggaci gwani Kirictu, ngaa laꞌti ätï papang je lonyadu! Äny gwuru papa gwanni gwülïngïtä je ndi ämnï gwudi Yicu Kirictu ndi ari äny gwuru gwanni gwondaca je ngwujaꞌri ngwe ngwanni ngwujaw.
16 Yäy gu no, nggwa je päcälü ndi aang ïdïtänï ꞌdünggüny.
17 Yiru giyee yanni yïgäbïcïny ngaa je be ükäcä Timijawujing. Gwuru gïjï güny ganni gämnïny gwuru ligor leꞌte pu Gideleny. Gwuru gwa je diwayiniyi elelleng gwüny gwanni gwelelleny gwe ndi midi ndi Yicu Kirictu, gwanni gwelataar enggaci gwe gwanni gwati nyi enggaci yiꞌdonga yidi Ngwaalu ngwaalu ꞌdar ngwati nyi gu ele.
18 Loko gilo la ji ndi ari nggwäꞌtüdï gwadi ila ꞌdanggalu, yiru yanni yïgäbïcä je aar be piyi yigoꞌro yegen ndi ïrïngïnï.
19 A be ma gu Deleny ari gito gwuru nggwa ila nyi be engga ndi ari giloo lari lïrïngïnä, gilo lätï yiima gwalla yani ondaji ꞌdogo!
20 Ndi ari yeleny yidi Ngwaalu yaꞌti ani ondaji, aar be ani yiima.
21 Yäy gu no, yiru ange yanni yibupa je? Ngaa je ïlïjä dirula de gwalla nyi ila ämnï gwe na lïgïꞌrïm le lanni lïjïlänü?