7
Utalu gwani agidi
1 A be gweneno yani yiꞌral yanni yulla je ndi ari, “Yijayana aaꞌti ngwüjï ngwa ago?” Nggwaru yijayana aaꞌti dïjï da agu.
2 A be anni onyadu yïjïn, a dur ätï dayu düngün a daw ätï dur düngün.
3 A dur aar acidi daw de düngün ndi ari diru daw düngün na ꞌto a daw aar acidi dur de düngün ndi ari diru dur düngün.
4 Daw daꞌti ätï yelenya ngwanginu ngwüngün ndi ari dur düngün diru. Na ꞌto dur dati ätï yelenya ngwanginu ngwüngün ndi ari daw düngün diru.
5 Aaꞌti dïjï da ümnïcï gwenggen ngwanginu ngwüngün, ꞌdogo manari lïmäätäjïdä gu gaji gooko nunnu ngaa gwuji otacing Ngwaalingalu. Aar be oꞌre ngwujaꞌri ngwudi dïmbür durnga daw de nunnu aaꞌti dijegoꞌrr da je ïdäjï ndi ari ngaa laꞌti mätï ngwanginu ngwalu.
6 Nggwuca je gu no gwani ma aang ꞌdengenajidi nggwo yaꞌti ani ngaa je ärrï yiima ye.
7 Äny gwüjädï ndi ari aadi ngwüjï ꞌdar ru nono änyïng. A be dïjï deꞌte deꞌte dangidacaar yiꞌral yüngün yangidaci je Ngwaalu, dïjï ndee yiꞌral yüngün yiru no na ndee dätï yiꞌral yüngün yiru no.
8 A be ngwüjï ngwanni ngwaꞌti agu na ngwedel, ngwunje ci, yijayana ndi ari aar jalu laꞌti agu nono änyïng.
9 Ma be ari laꞌti la burni ndi määtä ngwangina ngwegen, aar be agu. Ndi ari agu gwujayana ndi üꞌdïnänü amiꞌra gwe.
10 A be nggwa ola ngwüjü ngwanni ngwagu ngwujaꞌri ngwe ngwee. Ola nggwee gwäꞌtüdï gwüny, gwuru gwanni gwenggaca Deleny ngwüjü. Ndi ari aaꞌti daw da aar badatanu dur de düngün.
11 Na manari dima aar de badatanu, ngwube jalu aaꞌti da ägïnï yaa aar oꞌrajidi dur de düngün. Na dur aaꞌti da geꞌte dayu düngün kay.
12 A be loko ladi nje ondaci äny, Deleny däꞌtüdï, diweengga dere danni dagu dayu däꞌtüdï dïkïrïjïn dämnä ndi aar de ji, aaꞌti ding geꞌte kay.
13 Na manari daw dätï duru däꞌtüdï dïkïrïjïn, ngwube ämnï ndi aar de ji, aaꞌti ding gatani.
14 Ndi ari dur danni däꞌtüdï dïkïrïjïn dima jüꞌrïnï daw de düngün danni diru dïkïrïjïn, na daw danni däꞌtüdï dïkïrïjïn dima jüꞌrïnï dur de düngün danni diru dïkïrïjïn. Manari yaꞌti gu rüdï, yïjï yalu yïrngü a be anaku rar gu, yïjüꞌrïnä.
15 A be manari gwanni gwäꞌtüdï dïkïrïjïn gwuma ele, ngwele. Dur danni diru dïkïrïjïn yaa daw danni diru dïkïrïjïn daꞌti gïkïnä yiꞌral ye yere ngene. Ngwaalu ngwurnidi nje ndi ar jalu ladatalu.
16 Nga gwülïngïdï gu awa gwuru daw, ndi ari nga gwa gïlängïdïyï duru dunga? Yaa nga gwülïngïdï gu awa gwuru dur, ndi ari nga gwa gïlängïdïyï dayu dunga?
A dïjï ji anaku urnida gu Ngwaalu
17 Giyiꞌralalu ꞌdar, ati dïjï deꞌte deꞌte ji ngwaalu anaku gïꞌtïjä gu Deleny ndi elelle gwanni gwornaca Ngwaalu. Ngwujaꞌri ngwuru ngwee ngwanni ngwuru drü ngwondajiny ngwe giyiꞌdoonga ꞌdar yidi Ngwaalu.
18 Dïjï düꞌrïdänä anni urnidu Ngwaalo? Gäbïcär ngwujalu anaku rung gu. Dïjï ju daꞌti üꞌrïdänä anni urnidu Ngwaalo? Gäbïcär ngwujalu anaku rung gu.
19 Nga üꞌrïdänï nga aaꞌti üꞌrïdänï, yaꞌti ojema. Yanni yojemana yiru ndi ari a dïjï määtä ngwujaꞌri ngwudi Ngwaalu.
20 Gäbïcär dïjü deꞌte deꞌte ngwuji anaku jung gu gwele gwerre a be Ngwaalu urnida.
21 Nga gwuru dïnäd gwerre aar ang be Ngwaalu urnida? Aaꞌti ligor la ang pänü giyiꞌral giyee, ma ang mbuji gay ndi gätïnï linginalu, ärrü je.
22 Ndi ari gwanni gwuru dïnäd kaji ganni gurnida ge Deleny, gwuru dïjï dïgätïnä linginalu didi Deleny. Yeꞌte yeꞌte nginde gwanni gwügätï linginalu kaji ganni gurnida ge Deleny, gwuru dïnäd didi Kirictu.
23 Ngaa lïllïnä guꞌru ge, aaꞌti ngaa la ru ngwïnäd ngwudi ngwüjï.
24 Lani ngweengga, a dïjï deꞌte deꞌte ji ngwaalu ngwüngün ngwäyänü Ngwaalu, anaku urnida gu Ngwaalu.
Lanni laꞌti agu na ngwedel
25 A be yani yiꞌral yanni yulla je yani ngindenga lanni liru yuꞌtaar, äny gwaꞌti ätï ngwujaꞌri ngwere ngwudi Ngwaalu ngwadi nje ngwe ci. Linje be ondaci ꞌdogo ngwujaꞌri ngwüny gwuru dïjï dämnäcä Ngwaalu ngwätädä ïnäng gwüngün.
26 Anaku ru gu dïrbä gwenene no, äny gwaru ya jayani ndi dïjï jalu anaku jung gu.
27 Manari nga gwagu, aaꞌti a gwa mïnï ndi geꞌte dayu kay. Na manari nga gwaꞌti agu, aaꞌti nga gwa mïnï dayu.
28 A be manari a gwuma agu, yaꞌti a je ärrü yanni yiki. Na ma guꞌtaar ägïnï, yaꞌting je ärrü yanni yiki. A be lanni lagu, la je dïrbä mbuji donyadu gïdïdlä ndee nyi gwubupa ndi a je gu etadi giyiꞌral giyee.
29 Yanni yadi nyi ye ari lani ngweengga, yiru ndi ari gaji nggo gaꞌti olanu. ꞌTuꞌtu gwene aar elada gweere, lanni lätï ngwayu aar elelle nono ma aar je ꞌti ätï.
30 Na lanni lirunu, aar ru nono ma aar ꞌti runu. Na lanni lijayanu aar ru nono ma aar ꞌti jayanu. Na lanni lati ellang gony aar ru nono ma aaꞌti gong rüdï gegen ndi aar määtädä.
31 Lanni lati ape ngwony ngwudi dïdlä ndee, aar ru nono ma aar je ꞌti apu. Ndi ari ngwong ngwudi dïdlä ndee ngwadi dudi.
32 Nggwümïnä je ngaa gätïnï linginalu aaꞌti yigor ja je pïcï yiꞌralanu yere. Dur danni daꞌti agu a ligor päcï yiꞌralanu yidi Deleny. Bupi gwüngün gwani ndi gäbïcï ligor lidi Deleny ngwujayanu.
33 A be dur danni dagu, ligor lüngün lïpïcä yiꞌralanu yidi dïdlä ndee awa ndi gäbïcï dayu düngün ngwujayanu
34 no ligor lüngün liranu rom. Na no ꞌto daw danni daꞌti ägïnä yaa guꞌtaar, yigor yegen yïpïcä je yiꞌralanu yidi Deleny awa ndi ru gwudi Deleny gilingeno na gïlïgïꞌrïm. A be daw danni dägïnä darngana yiꞌral yidi dïdlä ndee awa ndi gäbïcï duru düngün ngwujayanu.
35 Äny gwondaja ngwujaꞌri ngwee gwani jayi gwudi yigoꞌro yalu, yaꞌti ani nggwümïnïcä je, aar be yani ngaa elelle gay ge gïdünälü a yigor yalu ru yeꞌte pu Gideleny.
36 Manari dïjï dere ndo daꞌti burna ndi määtä lingina aar jalu guꞌtaar ge güngün ganni gading agu, na manari gima pe ngwüdlä ngwïndï, a gur engga ndi ari ngwagu, gäbïcär ngwagu, yaꞌting je ärrü yere yanni yiki. Aar agidi.
37 A be dïjï danni dima gu ari ligor le lüngün, daꞌti aar linyaca ngwube määtä buping gwüngün, a dima ari ligor le lüngün däꞌtüdï dadi agu guꞌtaara, dïjï ndee därrü ꞌto yiꞌral yïdünälü.
38 A be no, nginde gwanni gwagu guꞌtaara gwärrü yiꞌral yïdünälü a be gwanni gaꞌting agu, gwärränä yiꞌral yïdünälü.
39 Manari dur didi daw ndona dijalu dimidu, dur düngün diru na anni jung na dimidu. Ma be ari dima ayi, daw da be gätïnï linginalu ndi ägïnï gidur danni da de ligor lüngün ari, a be nginde ru gwudi Deleny.
40 A be äny gwadi ari da jayananu manari dima ꞌti ägïnä, yiru ndi ari äny gwätï ꞌto Lïgïꞌrïmä lidi Ngwaalu.