6
Päjïdï yeleny gwudi ngwïkïrïjïn
1 Manari dïjï dere ꞌdanggalanu dätï yiꞌral yere kwenggen gwuꞌter, awa ngwube apada poor ngwüjï ngwäꞌtüdï ngwïkïrïjïn aar pïcï yelenya ndi ari manni ngwapada ngwïkïrïjïn?
2 Ngaa laꞌti lïngïdï ndi ari ngwïkïrïjïn ngwuru ngwadi pïcï ngwüjü yelenya ngwudi dïdlä? Manari ngaa liru ladi pïcï ngwüjü yeleny ngwudi dïdlä, ngaa lätï gu yiima ndi pï yelenya giyiꞌral yanni yooko guꞌru ngwïkïrïjïnänü.
3 Ngaa lïlïngïdï ꞌto ndi ari alanga liru lanni ladi pïcï yïꞌrrä yelenya, no yiru guꞌru ndi ar pï yelenya giyiꞌral yanni yooko yidi dïdlä ndee.
4 Ma be ari ngaa gilo lati garnati giyiꞌral yidi dïdlä, ange gwuru ngaa be ïdïtänï ndi ele yiꞌral ye yalu ngwüjï ngwanni ngwaꞌti je giꞌdoonga gidi Kirictu gïꞌtïjä ngwäye?
5 Äjï be ni yaaru giyee! Gwere gwaꞌti ꞌdanggalanu gwubebera ndi ara je ombaci yiꞌral liru ngweengga?
6 Ati be manni diweengga apada gwenggen ngweleny aar je pïcï yelenya ngwäyänü ngwüjï ngwäꞌtüdï ngwïkïrïjïn.
7 Anni raar ꞌdidanu ndi ari ngaa lätäjïdü yiꞌral nono, yinggida ndi ari ngaa lamiꞌratu gu mama. Ngaa larra ngaa ꞌti be ämnä ndi aar je ärrïjï yanni yiki? Ngaa larra ngaa ꞌti be ämnä ndi ara je ngwüjï ärräjï?
8 Ngaa be manni giyigoꞌro yalu ärräjïdï ngaa kajidi ngaa ärrï yiꞌral giyee ꞌdi ngweengga ngwalu.
9 Ngaa ꞌti gu lïlïngïdï ndi ari ngwüjï ngwanni ngwuki ngwaꞌti ätï yuꞌrina yere giyelenyanu yidi Ngwaalo? Aaꞌti la je ïꞌdäjänü. Ngwïjïn yaa lanni lati äpïjï dïdülä yobo, yaa lanni lati mïꞌrï ngwäyänü, yaa ngwur ngwanni ngwati ürnï, yaa ngwur ngwanni ngwati ape ngwuru,
10 yaa ngwuꞌram, yaa ngwuban yaa lanni lati rlälï yaa lanni laru ngwulem yaa lanni lati obe, dïjï dere daꞌti ngwüjänü ngwanni ngwuru gu no, da mbuji yuꞌrina yidi yeleny yidi Ngwaalu.
11 Loko ꞌdanggalanu gwerre liju giyiꞌralanu giyee, ara je be Ngwaalu gaꞌrida nono, ara je geꞌte ngaa ru lüngün, ndi ari ngaa liru ngwüjï ngwüdünälü yiima ye yidi Deleny dege dani Yicu Kirictu na Lïgïꞌrïm le lidi Ngwaalu ngwege.
Abrar yïjïnä
12 Ngwüjï ngwoko ngwati ari, “Yiꞌral ꞌdar yäꞌtüdï drü ꞌdünggüny,” a be nggwa je ci, yiꞌral ꞌdar yaꞌti jaw ꞌdünggüny. Na loko lati ari, “Yiꞌral ꞌdar yäꞌtüdï drü ꞌdünggüny,” a be nggwa je ci nggwaꞌti gwuru dïnäd yiꞌral ye yere.
13 Ngwüjï ngwoko ngwati ari, “Eny gwani lari na lari lani eny,” a be Ngwaalu ngwuru ngwadi je äbrï ꞌdün. A be ngwanginu ngwudi dïjï ngwaꞌti ani yïjïn aar be ani yiiru yidi Deleny na Deleny diru dati iye ngwanginu.
14 Yiima ye yüngün, Ngwaalu ngwüꞌdïꞌrïyä Delenyalu giyiꞌranyanu, na ngwunje ꞌdïꞌrïyälü ꞌto yiima ye yüngün.
15 Ngaa laꞌti lïngïdï ndi ari ngwanginu ngwalu ngwuru ngwanginu ngwudi Kiricto? Ya gu jayi ndi ari nyi ape ngwangina ngwüny ngwudi Kirictu nje acidiyi dedr de? Bärï ꞌtur!
16 Ngaa laꞌti lïngïdï ndi ari gwanni gwati aar acidi dedr de, diraar de leꞌte pu ngwangino? Ndi ari gitab garu nu, “Ngindenga ꞌdün la ru ngwanginu ngweꞌte pu.”
17 A be gwanni gwati aar gekajidi Deleny de, gwuraar gwe leꞌte pu gïlïgïꞌrïm.
18 Abrar yïjïnä! Yere yanni yiki ꞌdar yati je dïjï ärrï, yati ärrïnï poor ngwanginu ngwüngün, a be gwanni gwa ärrï yïjïnä, yating je ärrädä ngwanginu ngwüngün.
19 Ngaa laꞌti lïngïdï ndi ari ngwanginu ngwalu ngwuru ngwuꞌdun ngwudi Lïgïꞌrïm lanni Lijuꞌru lanni gilo ꞌdanggalanu lanni lätädärä je Ngwaalo? Nga nga läꞌtüdï lidi yigoꞌro yalu ngaa be ru lidi Ngwaalu.
20 Ndi ari Ngwaalu ngwïllä je guꞌru ge, yäy gu no, näjär Ngwaalinga ngwanginu ngwe ngwalu.