2
Gwanni gwïndälü mbüny
1 Ma ji ma Deleny dege dani Yicu Kirictu oꞌra, a la oꞌradalu ndi ar le mbudi. Lani ngweengga, nggwa je päcälü ndi ari,
2 aaꞌti yigor ya je pänü ara je yedeny eny gwani yïjïr, na ngwujaꞌri ngwaru ngwe ngwüjï nyii laadi ru lükäjä je. Ngwondajaar ngwe ndi ari gomon gidi Deleny gima ila.
3 Aaꞌti dïjü dere da je dudiyi gay ge gere, lïngïdär ndi ari gomon nggäꞌdï, ga ꞌti gila ꞌdi a ngwüjï ngwonyadu nyurtanu gwerre gwerre na nginde gwanni gwïndälü mbüny ꞌtädälü, gwanni gwani geradalu.
4 Gwa übïnï yiꞌralalu ꞌdar gwa alliji ligoꞌrala lüngün giyiꞌralala pipiꞌriꞌti yidi Ngwaalu na yanni yäpïjäär je yobo nunnu ngwalliji ligoꞌro lüngün ngwujalu kobo gidi Ngwaalu ngwari diru Ngwaalu.
5 Ngaa laꞌti diwayina gaji ganni gijar ge ndi ari äny gwata je ondaci yiꞌral ye giyee?
6 Na gwenene ngaa lïlïngïdï yiru ange yanni giyo yïmätädälü nunnu ngwa ji ngwüꞌtädälü kaji ganni gïgïꞌtïjäär.
7 Ndi ari yiima yidi yujimidi yidi dïjï ndee giyo yima ji giyiiru, a be nginde gwanni nggwo gwümätädälü, gwading määtädälü gwurꞌtal nunnu ꞌdi aar äbrï ngindeng kayanu.
8 Gwa aar be gäbïcälü nggwo gwïndälü mbüny gwa ꞌtädälü gwanni gwadi Deleny dani Yicu dami büdä gwe gwudi düwä didi ngwulem ngwüngün ngwududiyi näjï gwe gwudi buri gwüngün gwadi nggwe ila.
9 Ila gwudi nginde gwanni gwïndälü mbüny, gwadi ila yiima ye yidi dijegoꞌrr ndi inggidi yiꞌral ꞌdar yanni yiru yiꞌduru yidi yiima, yiꞌremna na allalu ndïr,
10 na ꞌdar yanni yiki yanni yadi dudiyi ngwüjü ngwanni ngwani yiꞌrany. Ngwani yiꞌrany nunnu ngwuꞌdonya ndi ämnï yiꞌral yanni yätï ngwäyänü nunnu aar gïlängïdïnï.
11 Yiru giyee yïgäbïcä Ngwaalinga ngwügäbïcï yiima yidi dudi aar ape yiiru nunnu aar je ämnï yanni yiru ꞌtur
12 a nunnu ngindenga ꞌdar aar je le obalu lanni lima ꞌti ämnä giyiꞌral yanni yätï ngwäyänü, a je be yiꞌral jadanu yanni yiki.
Mätïnälü gwudi ngwïkïrïjïn
13 A be nyii lati ci Ngwaalinga yäy ꞌtu yomon reny gwani nga nga lani ngweengga ngwämnä je Ngwaalu, ndi ari ꞌtuꞌtu gwele gwerre Ngwaalu ngwäbrä je nunnu ngaa gïlängïdïnï juꞌriyi gwe gwudi yiiru yidi Lïgïꞌrïm na ämnï gwe giyiꞌral yanni yiru ꞌdidanu.
14 Nginde gwurnida je gwani yiiru giyee ngwujaꞌri ngwe ngwanni ngwujaw ngwärï, ndi ari ngaa acajidi ndi näjï gwudi Deleny dege dani Yicu Kirictu.
15 Yäy gu no lani ngweengga, jar be ꞌdïꞌdäny ngaa mätïnälü ngwujaꞌri ngwanni ngwenggacara je, manari ngwenggacara je ngwündäjïnä ngwulem ngwe ya ngwenggacara je ngwujaꞌri ngwe ngwüllïnä.
16 Nyii lotaca Delenyalu dege dani Yicu Kirictu ligoꞌro le lüngün na Ngwaalu ngwuru Papa gwege gwani nga nga, ngwanni ngwämnï nje yïmïꞌrü ye yüngün yanni yima aar nje ätädä. Aar nje ätädä orꞌtemajing gwudi gwurꞌtaling na geꞌtajing gwanni gwujaw.
17 Aar orꞌtemaji yigor yalu ara je ojemeye nono ndi ärrï yiꞌral ꞌdar yanni yijaw na ndi ondaji ngwujaꞌri ꞌdar ngwanni ngwujaw.