3
Otacar Ngwaalingalu
1 Gwodanalu lani ngweengga, otacar Ngwaalingalu gwani nyängä. Otacar jalu ndi ari a ngwujaꞌri badalu ngwudi Deleny dani Yicu a je ngwüjï näjï nono näjïnär gu ꞌdanggalu.
2 Otacar Ngwaalingalu ndi ari aar nje gu etadi ngwüjï ngwanni ngwuki, ndi ari ngwüjï ꞌdar ngwaꞌti ätï ämnïng Ngwaalu.
3 A be Deleny diru ligor leꞌte pu a da je ojemeye nono da je gu etadi dijegoꞌro.
4 Nyii lïcïnänü giyigoranu Gideleny ndi ari ngaa gilo lärrü yiꞌral giyee na ya je gwuji ndi ärrï ꞌto yanni yenggacara je.
5 A Deleny ruyi yigor yalu kay gidi ämnï gwudi Ngwaalu na gidi orꞌtemaji gwudi Kirictu.
Arnganar aaꞌti ngaa la ru ngwamiꞌri
6 Ngwürïny ngwe ngwudi Deleny dani Yicu Kirictu, la je girinya lani ngweengga, ꞌtüdäränü gidiweengga danni diru damiꞌri daꞌti ïndï ngwujaꞌri ngwe ngwanni ngwenggacara je.
7 Ndi ari nga nga yigoꞌro ye yalu lïlïngïdï yiru ꞌtaa ndi ari ngaa gwuji gora gärï. Nyii läꞌtüdï ngwamiꞌri gaji ganni gijar ge,
8 nyii ꞌti ïyädï dïjü gony gere gaꞌti nyii gu geꞌta gony gere. Aar be ru manni ndi ari, nyii lundu ngwäy ndi ape yiiru dilu de nje ape lingen le nunnu aaꞌti nyii la äbïngïnï dïjänü dere ꞌdanggalu.
9 Yaꞌti nje ärrü giyee nunnu nyii laꞌti ädï ndi nje ätä guꞌru, aar be ru nunnu a yigoꞌro yärï ru gora galu nje gwüjïnï.
10 Ndi ari gwele anni jar, lätädä je dïmürä ndee ndi ari, “Gwere gwanni gwati ꞌti apu yiiru, aaꞌti gweny.”
11 Nyii lati ꞌdingini ndi ari loko gilo ꞌdanggalanu liru ngwamiꞌri, lati ꞌti abrralu ndi ape yiiru ati aar be jalu gangin gangin ndi änï giyiꞌralanu yidi ngwüjï ngwuꞌter.
12 Ngwürïny ngwe ngwudi Deleny dani Yicu Kirictu, la je päcälü ndi ari ngwüjï ngwanni ngwuru gu no, ngwunje girinya aar jalu mamma aar ape yiiru aar eny ngwuy ngwe ngwegen.
13 Na gwani nga nga, nggwa je ci lani ngweengga ndi ari, aaꞌti ngaa la ayi nono ndi ärrï yiꞌral yanni yïdünälü.
14 Manari gwere nggwo gwuꞌdonya ngwujaꞌri ngwee ngwullu nje, geꞌtar ngwäy nono aaꞌti gwa le acajidi nunnu a yaaru ape.
15 Aaꞌti gwaru güwän ꞌdanggalu ngaa be girnya nono diweengga dalu.
Mïꞌrä
16 Gweneno ara je Deleny didi adatalu ligoꞌro lüngün ätädä adatingalu kaji ꞌdar na ngwaalu ꞌdar. Ara je gu Deleny ji ꞌdar.
17 Äny gwuru gwani Bulij gwullu aganning nggwee guy ge güny, giꞌremna giru nggee giru ꞌter ndi inggidi ndi ari äny gwuru gwullu je. Ulli gwüny gwuru gu no.
18 Ara je gu yïmïꞌrü yidi Deleny dege dani Yicu Kirictu ji ꞌdar.