2
A Yicu uꞌriyi dimjo nono
(Mätä 9.1–8; Luka 5.17–26)
1 Aji a yomon ru cong a Yicu oꞌra mana Kaprnawum. A gu ngwüjï ꞌdingini ndi ari gwuma oꞌra ꞌdunu.
2 No, aar oꞌradalu ngwonyadu ꞌdi aaꞌti ngwaalu ju gïdrü na poor, a je Yicu ondaci ngwujaꞌri.
3 A ngwüjï ngweꞌte ila, aar äpïjä dïjü diru dimjo aar millajida kwoꞌrongo.
4 Anni ma aar ꞌti mbuju gay gadi aar ge änïjï ndi Yicu gïdrü ndi ari ngwüjï ngwonyadu ngwaalinga, aar allu ngwuꞌdunala korrala aar je ngirita ꞌdi aar geꞌte gubuꞌru aar dingada gïlälä ge ganni gating gu ndralu.
5 Anni ma je gu Yicu enggadada ämnïng Ngwaalu gwegen no, ngwuci dimjo ndoo nu, “Gïjï güny, ke gwunga gwuma aar ang düdänïjänü.”
6 Ngenone, ngwoorta ngwoko ngwudi yobo ngwuju gu ndi jalu, aar ïrïyï ngwäyälü giyigoranu yegen,
7 “Ange gwuru a gu be aꞌri nggwee ondaji no? Nginde gwaru ngwulem! Yärü gwanni gwa burni ndi düdänïjï ngwüjänü ndi ke gwegen, aar be ari Ngwaalu ngwuru jücü?”
8 No a Yicu lenge ngwujaꞌri ngwanni ngwuju giyigoranu yegen lïgïꞌrïm le lüngün, ngwuje ci, “Nga nga larra ngaa be ïrïyäjï ngwäyälü giyiꞌral giyee?
9 Yïndï ne yanni yijanalu ürgäny ndi ci dimjo, ‘Ke gwunga gwuma aar ang düdänïjänü’ na ‘ꞌDïꞌrälü ang ape gïlälälü gunga ang ele’?
10 A be nunnu ngaa lenge ndi ari Gïjï gidi Dïjï dümnä gätï yelenya ngene gïdïyängälü ndi düdänïjï ngwüjänü giyiꞌral yegen yanni yiki.” Ngwuci dimjo ndoo,
11 “Nggwondacanga, ꞌdïꞌrälü ang ape gïlälälü gunga ang ele ꞌdunu.”
12 Ngwüꞌdïꞌrälü ngwape gïlälälü ngwele a ngwüjï ꞌdar engga. A yiꞌral giyee dibiyi ngwüjü ꞌdar aar ortada Ngwaalinga aar ari, “Yaꞌti ar je änggädï gomon gere aꞌtur yiru gu no!”
A Yicu urnidi Lawing
13 Oꞌre mana a Yicu ꞌtü ngwele poor gito gito gïmämäng nono gidibirta didi yaw yidi Jälïlïng, a ngwüjï ngwonyadu ꞌdïꞌrï aar gwoda ngwüꞌdïꞌrï ngwuje enggaci ngwujaꞌri.
14 Anni mung ji ndi ele kayalu, ngwengga guru gidi dulba gani Lawi gïjï gidi Albayu ngwuji ndi jalu ngwaalu ngwudi uti dulba ngwuci, “Gwujaniny.” A Lawi ꞌdïꞌrälü ngwugwujani.
15 A Yicu ji gïyïrnü ngwuꞌdun ngwudi Lawi, a ngwudulba ngwonyadu na lanni liki, aar ila aar le ji ndi eny na ngwooꞌra ngwüngün, ndi ari ngwüjï ngwuju ngwonyadu ngwanni ngwugwujana.
16 A anni ma ngwoorta ngwudi yobo ngwuru Ngwübärrïjï, engga ndi ari nginde gwïtäär ngwüjï ngwe ngwanni ngwuki, na ngwudulba, aar otacalu ngwoꞌralu ngwüngün aar je ci, “Gwarra aar be eny ngwudulba ngwe na ngwüjï ngwanni ngwuki?”
17 ꞌDingining gu no, ngwuje mïꞌrïcï ngwujaꞌri ngwee, “Gwäꞌtüdï gwanni gwuꞌru nono gwati ele gidima, ngwube ru gwanni gwümä. Nggwaꞌti ïndädï ndi nje urnidi lanni lïdünälü, nyi be ilada ndi nje urnidi lanni liki nunnu aar joꞌrenyana.”
Aar otaci Yicungalu gwani määtä ngwädä
(Mätä 9.14–17; Luka 5.33–39)
18 Gaji nggoo, ngwooꞌra ngwudi Yuwana na ngwooꞌra ngwudi Ngwübärrïjï ngwati määtä ngwädä aar be ila ngwoko ndi Yicu aar otacalu, “Ngwooꞌra ngwudi Yuwana na ngwudi Ngwübärrïjï ngwati määtä ngwädä aar be arra ngwunga?”
19 A je be Yicu ci, “Garang ganni gadi gäbïcï ngwïrnü ngwudi gur gadi agu aar määtä ngwädä gijaar le? Anni jaar gurnga le gidi agu, laꞌti la määtä ngwädä
20 a be gomon ga ji gila ma aar je apada guru gidi agu gidiliganu degen, gomon nggoo, la be määtä ngwädä.”
21 Ngwuje ci, “Dïjï dere daꞌti dati ape direda diyang ngwugatada gidired diru duꞌrin. Mung ogꞌra, dired ndoo diyang da ronyadanu dokta diredanu ndoo diru duꞌrin da kani.
22 Na dïjï daꞌti dati bäläjï diꞌrica danni diyang gïdürädänü duꞌrin. Mung bäläjï, dürädä da ubi a diꞌrica na düräd ngwa geradalu ꞌdün. Bärï, diꞌrica danni diyang dati aar bäläjï gïdürädänü danni diyang.”
Yicu gwuru Deleny didi gomon ganni giru Kwoꞌra täꞌrïl
(Mätä 12.1–8; Luka 6.1–5)
23 Gomon geꞌte komon Kwoꞌra täꞌrïl, a Yicu ele aar üꞌrü ngwurunyanu ngwudi yon ngwooꞌra ngwe ngwüngün. A ngwooꞌra ngwüngün gilaꞌti yona.
24 A Ngwübärrïjï ci nu, “Ombaja ꞌda ngwoꞌra ngwunga ngwarra aar be ärrï yiꞌral yiru drü ndi ärrïnï komon Kwoꞌra täꞌrïl?”
25 A je Yicu gwäꞌräcänü ngwuje ci, “Ngaa laꞌti ulu ngwujaꞌri ngwanni ngwüllïnä ndi ari Däwüd gwärrü ange anni ma je ngwamu enyanu aar mïnï ndi eny ngwooꞌra ngwüngün?
26 Ngaa laꞌti lïngïdï ndi ari nginde gwändï ngwuꞌdun ngwudi Ngwaalu kaji gidi dirꞌdal diru giꞌra dani Abijar ngweny yona yidi dïmürä yiru drü, ngwurꞌdal ngwuru ngwati je eny ꞌdogo, ngwuje ape yoko ngwuje ätädä ꞌto ngwoꞌra ngwüngün aar je enye?”
27 Ngwuje be ci nu, “Gomon giru Kwoꞌra täꞌrïl gïgïꞌtïjäär dïjü dümnä. Dïjï dümnä daꞌti aar gïꞌtïjä gomon giru Kwoꞌra täꞌrïl.
28 No, Gïjï gidi Dïjï dümnä giru ꞌto Deleny didi gomon giru Kwoꞌra täꞌrïl.”