3
Uꞌri nono gwudi gur gayu guy
(Mätä 12.9–14; Luka 6.6–11)
1 A gaji giꞌter a Yicu ele ngwänï ngwämrä. Gur geꞌte giju gu gayu guy.
2 A ngwüjï ngwoko ji ndi iye Yicung nunnu aar engga gwadi uꞌriyi guru nono komon nggoo giru Kwoꞌra täꞌrïl aar gu määtïdädä.
3 A Yicu ci guru nggoo gayu guy, “ꞌDïꞌrü nga dünälä gidiliganu!”
4 Ngwuje be otacalu, “Yiru ange yanni yibupa je yobo ndi ar je ärrï komon ganni giru Kwoꞌra täꞌrïl? Ndi ärrï yiꞌral yanni yijaw gwalla ndi ärrï yiꞌral yanni yiki, ndi ꞌrinyidi gwalla ndi gïlängïdïyï?” Aar be gwugwundi.
5 A je Yicu ruyi ngwäy nono gwapu güündä gwulleny na gwani undi gwudi yigor yegen kiyi liguri, ngwuci guru, “Gwällï guyanu.” Ngwugwalli guyanu a guy güngün oꞌradi ngwujayi.
6 A Ngwübärrïjï ꞌtü aar mïnï gay ngwüjïngä le ngwudi Yïrüdïj awa aar ꞌrinye Yicung.
A ngwüjï ngwonyadu gwuji Yicung
7 A Yicunga ngwooꞌra ngwe ngwüngün ꞌtü aar oꞌrada gidibirta didi yaw yidi Jälïlïng, a je ngwüjï ngwonyadu ngwudi Jälïlïng gwujani.
8 Anni ma ngwüjï ꞌdingina yiꞌral ye ꞌdar yanni yärrüng je, aar ꞌdïꞌrä ngwonyadu aar ila ndi Yicu. Ngwüjï ngwudi Yäwüdïyäng, Üräjälïmïng, Adumiyang na ngwudi ngwaalu dambal Ordon na ngwudi yündär yani Jür na Jäyïdä.
9 Nunnu ngwüjï ngwonyadu, a Yicu ondaci ngwoꞌra ngwüngün aar gïꞌtïjï bälükä gweꞌte gwooko mama nggu jalu aaꞌti gwa ngwüjï romadi nono.
10 Ndi ari gwuꞌriya ngwüjü nono ngwonyadu, no a ngwüjï ngwanni ngwümä mïnï ndi obe ngwüjänü aar akani nono.
11 Manari gwuma ngwüꞌrïllä engga, ati aar kwucalu yirku ye aar mïꞌrï dula aar ci, “Nga gwuru Gïjï gidi Ngwaalu.”
12 Ngwuje be girinya ngwe rimalu gwulleny ndi ari aaꞌti gwa aar gwe ondajalu ndi ari gwani yärü.
Ngwooꞌra ngwükäjäär je ꞌdï na rom (12)
(Mätä 10.1–4; Luka 6.12–16)
13 A Yicu ꞌdïꞌrï ngwallu milli ngwuje urnidi lanni linaning je aar ila ꞌdünggüngün aar le ji.
14 Ngwuje utanu ꞌdï na rom (12) ngwuje ruji ngwooꞌra ngwükäjäär je aar ngwe ji. Nunnu ngwuje ükäjï aar ele ndi ondaci ngwüjü
15 ngwuje ätädä yiima ndi ꞌtüyï ngwüꞌrïllä ngwüjänü.
16 Ngwürïny ngwegen ngwuru ngwee, Jamaan (gwanni gwuming ci Butruj),
17 Yagub gïjï gidi Jäbädï gwenggen gwe gwani Yuwana (lanni liming je ätädä ngwürïny ngwani Bunarij, ngwani yïjï yidi mïꞌrïnänü gwudi gere),
18 Andrawuj na Bïlïpüj, na Bartumawuj na Mätä na Tumaj na Yagub gïjï gidi Albayu, na Tadiyuj na Jamaan gwanni gwati ligor enyanu gwani gen.
19 A Yäwüdä Äjïgärïyütï gwanni gwuma aji ngwugwurlanu Yicu gwe.
A ngwüjï ci Yicung Bäljäbül
(Mätä 12.22–32; Luka 11.14–23; 12.10)
20 A be Yicu ꞌdïꞌrï ngwänï gïdrü a ngwüjï oꞌradalu ngwonyadu ꞌdi aar ꞌti mbuju gay gadi aar ge eny ngwooꞌra ngwe ngwüngün.
21 Anni ma gu ngwüjï ngwudi Yicu ꞌdunu ꞌdingina ndi ari Yicu gwuma ila Kaprnawum, aar ꞌdïꞌrä ꞌdar aar elada Yicung nunnu aar ꞌtüyï ngwüjänü ndi ari laru, “Nginde gwuma ji giꞌralu mbüny.”
22 A ngwoorta ngwudi yobo ngwanni ngwïndï Üräjälïm aar ari, “Yicu gwuma Bäljäbül aw nono! Yiima ye yidi deleny didi ngwujegoꞌrr, yiru yating ye ꞌtüyï ngwujegoꞌro.”
23 A je Yicu urnida ngwuje ondaci ngwuje mïꞌrïcï ngwujaꞌri ngwuje otacalu ndi ari, “Dijegoꞌrr dati ꞌtüyï dijegoꞌro awa?
24 Manari yeleny ken geꞌte pu yima üꞌrïdïdänü, yeleny giyoo yaꞌti ya mätïnälü.
25 Manari ngwuꞌdun ngweꞌte pu ngwuma üꞌrïdïdänü, ngwüjï ngwüngün ngwaꞌti ngwa ätï yiima ndi mätïnälü.
26 Manari dijegoꞌrr dima oꞌrananu ligoꞌro le lüngün ngwüꞌränü, daꞌti da mätïnälü, yiima yüngün yima ji gito ndi medadi.
27 Yiru gu ꞌdidanu ndi ari gwere gwaꞌti gwati änädädä dïjü dojema nono gïdrü ngwapada ngwony ngwüngün, manari diming ꞌti mätï gwerre gwerre ngwugekajalu ꞌdi ngwube obe ngwuꞌduna ngwüngün.
28 Yiru gu ꞌdidanu nggwa je ci, yiꞌral ꞌdar yanni yiki na ari ngwulem gwudi ngwüjï gwa aar je düdänïjänü.
29 A be gwanni gwa ari ngwulem Gïlïgïꞌrïm lanni Lijuꞌru, gwaꞌti gwa aar düdänïjänü aꞌtur gwuma ke aw nono gwudi gwurꞌtaling.”
30 Nginde gwaru gu ngwujaꞌri ngwee ndi ari lari, “Nginde gwätïnä dïꞌrïllä nono.”
Ngwüjï gïdrü ngwudi Yicu
(Mätä 12.46–50; Luka 8.19–21)
31 A be nanni gwudi Yicu na ngwenggen ꞌdïꞌrä aar ila ndi Yicu aar dünä poor aar be ükäjïdï ꞌdünggüngün.
32 A ngwüjï ngwujalu ngwonyadu aar änänü aar ci, “Nanni gunga na ngwanggalu gilo poor lïmïnängä.”
33 A Yicu utalu ngwari, “Yärü gwuru nanni gwüny na ngwänggärï?”
34 Ngwube ꞌdïꞌrïyï ngwäy ngwombaji ngwüjü ngwanni ngwujicalu aar üꞌrälü cïꞌdüd ngwari, “Nanni gwüny gwuru nggwee a ngwänggärï ru ngwee!
35 Gwanni gwati ärrï buping gwudi Ngwaalu gwänggärï gwuru gwanni gwuru dur ngwuru gwanni gwuru gera a nanni gwüny ru.”