9
1 A je Yicu ci, “Nggwa je ondaci ꞌdidanu, loko lanni gilo gwenene lïdünü ngene laꞌti la je yiꞌrany mbuji ꞌdi aar enggadani yelenya yidi Ngwaalu yïndï yiima ye yipa.”
A ngwooꞌra ngwükäjäär je engga näjïnïng gwudi Yicu
(Mätä 17.1–13; Luka 9.28–36)
2 Anni ma aar jalu ꞌdi aar ape yomon nyärläl (6), a Yicu ꞌdïꞌrï ngwapani Butrujing na Yagub na Yuwana aar le allu kenala golala aar gu ji ngenone jücü. A Yicu näjïnï ngwäyänü ngwegen.
3 A ngwured ngwüngün gwurli aar bidi pupuꞌrul aar bidani ku11 urrum gidi girany.
4 Ngenone a je Ïlïyängä Müjä gwe ꞌtäcälü aar ondaji Yicunga le.
5 A Butruj ꞌdïꞌrï ngwuci Yicung nu, “Gwani doorta, yijaw ndi ar ji ngene. Ar pä yäꞌtälä täꞌrïl, geꞌte gunga na geꞌte gidi Müjä na geꞌte gidi Ïlïyä.”
6 (Nginde gwaꞌti lïngïdï ngwadi araa, lïtï je yedeny gwulleny.)
7 A gïbäꞌrü ilala ngwuje gwüꞌrübäjälü a ngwujaꞌri ꞌtüdä kïbäꞌränü aar ara, “Gïjï güny giru nggee ganni gämnïny ꞌdengenacar.”
8 Puprang no anni ma aar ombajidalu aar ꞌti ba be änggädï dïjü dere a be Yicu ru jücü.
9 Anni ma aar ji ndi üllä kenala, a je le Yicu rimetanalu ndi ari aaꞌti la ondaci dïjü dere yiꞌral giyee yanni yima aar je engga, ꞌdi a Gïjï gidi Dïjï dümnä ꞌdïꞌrï giyiꞌranyanu.
10 Aar änïjï ngwujaꞌralu ngwee giyigoranu aar ondajidi aar ari, “Yiru ange yani ꞌdïꞌrï giyiꞌranyanu?”
11 Aar be otacalu aar ci, “Ngwoorta ngwudi yobo ngwarra ati be ari Ïlïyä ngwadi ila gwerre gwerre?”
12 Ngwuje ci, “Yiru gu ꞌdidanu ndi ari Ïlïyä gwadi ila gwerre gwerre ngwügwäꞌrïꞌtä yiꞌral ꞌdar. A be yarra ma aar üllïnï kitabanu ndi ari Gïjï gidi Dïjï dümnä gadi yiꞌrendeny mbuji yonyadu aar obe gora ge?
13 A be nggwa je ci, Ïlïyä gwuma ila, a gwuma aar ärrï yiꞌral ꞌdar yanni yïjädï jänü anaku üllïnäär gu gwani nginde kitabanu.”
A Yicu uꞌriyi damal nono
(Mätä 17.14–20; Luka 9.37–43)
14 Anni ma aar ila ngwooꞌra ngwuꞌter, aar engga ngwüjü ngwonyadu ngwuromadi je nono na ngwoorta ngwudi yobo aar ngwe ji ndi garnati.
15 Puprang no anni ma ngwüjï engga Yicung, a je ngwe ngwaalu elalu ꞌdar aar gwalajanu aar aganni.
16 A je Yicu otacalu ngwuje ci, “Ngaa ligarnatadu kang ngindenga le?”
17 A gur geꞌte ngwüjänü ca, “Gwani doorta, äny gwäpïjängä gïjü gätïnä dïꞌrïllä nono dima ruji däꞌräng.
18 Ma ji mung määtä, ngwape ngge aalu ngwüꞌtüyï ngwabiny ngwulem ngweny ngwad ngwundi gwuꞌdid. Nyi be ci ngwoꞌra ngwunga aadi aar ꞌtüyï dïꞌrïllänü aar ꞌti be burna.”
19 A je be Yicu ci, “Äny gwada je gu ji jadu liru ngwüjï ngwudi gimaad nggee gaꞌti ätï ämnïng Ngwaalu aꞌtur. Nggwada je gu ji ndi mätïjï ligor ꞌdi a jadu ru? Ilar gïjï ge ngene.”
20 No, aar äpïjä. Anni ma dïꞌrïllä engga Yicung, puprang no ngwobeda gïjälü gïdïyängälü ngwüpïdïnälü ngwudatiꞌralu ngwüꞌtüyä ngwabiny ngwulem.
21 A Yicu otaci papangalu gwudi gïjï ndi ari, “Giru gu no ꞌtuꞌtu jadu?”
Ngwuci, “Giru gu no ꞌtuꞌtu yogo ye.
22 Gati dïꞌrïllä ape ngwugatu gïlïgä ngwugatu giyaw nunnu aading ꞌrinye. A be manari nga gwa burni ndi ärrï yiꞌral yere, ar ang ïnä nje gataji düwä.”
23 A Yicu ci, “ ‘Manari nga gwämnä Ngwaalu’ yiꞌral ꞌdar ya je dïjï mbuji danni dämnä Ngwaalu.”
24 Puprang no a papa gwudi gïjï ꞌdïꞌrï ngwari dula ngwuci, “Äny gwämnä Ngwaalu gatajiny düwä nyi dami ümïmïngänü gwüny!”
25 Anni ma Yicu engga ndi ari ngwüjï ngwo ndi gwalajanu aar ila ngwaalu ngwoo, ngwugirinya dïꞌrïllä ngwuci, “Nga nggwee gwürïmü ngwänï gwuru dïꞌrïllä diru däꞌräng nggwa ang ci ꞌtüdä ꞌdünggüngünänü aaꞌti gwa gu änänü mana aꞌtur.”
26 A dïꞌrïllä ari gwulleny ngwüpälü gïjï ge gwulleny ngwüꞌtü. A gïjï ru ngwangina nono dïjü dayu ngwügäbïcï ngwüjü aar ji ndi ari “Gima ayi.”
27 A be Yicu ꞌdïꞌrïyälü ngwüdünäjälä, ngwüdünälä.
28 Anni ma aar ele aar änï ngwuꞌdun, a ngwooꞌra ngwüngün otacalu jücü ndi ari, “Änyängä larra minyii ꞌti burna ndi ꞌtüyï dïꞌrïllä?”
29 Ngwuje be ci, “Dïꞌrïllä danni diru gu no, da aar ꞌtüyï ꞌdogo otaci gwe Ngwaalingalu.”
A Yicu pälü mana gwani yiꞌrany yüngün
(Mätä 17.22–23; Luka 9.43–45)
30 Aar ꞌtüdä ngeno aar millida Jälïl gwe. Aaꞌti Yicu bupa nda je le dïjï dere lenge ngwaalinga,
31 ndi ari gwuju ndi enggaci ngwoꞌra ngwüngün. Ngwuje ci, “Gïjï gidi Dïjï dümnä gadi aar ge gwurlanu aar ätädä ngwüjü. Ga aar ꞌrinye, mung jalu yomon täꞌrïl ga ꞌdïꞌrä.”
32 Aar ꞌti be lïngïdï ngwujaꞌri ngwaru ngwe a je yedeny eny ndi otacalu.
Pani guꞌru giyelenyanu
(Mätä 18.1–5; Luka 9.46–48)
33 Aar ila Kaprnawum anni ma aar ji ngwuꞌdun gïdrü, a je Yicu otacalu ngwuje ci, “Yiru ange yanni yigarnata gu kay?”
34 Aar be gwugwundi ndi ari ngindenga liju ndi garnati yärü gwanni gwupana guꞌru ꞌdenggenanu.
35 Ngwujalu ngwube urnidi ngwoꞌra ngwükäjäär je ngwüngün ngwoo ngwuru ꞌdï na rom (12) ngwuje ci, “Manari gwere gwümïnä ndi ru giꞌra, gäbïcär ngwoꞌre ngwuji gwodan ngwuru dïnäd didi ngwüjï ꞌdar.”
36 Ngwape gïjü ganni gookoꞌring ngwüdünäjälä gidiliganu ngwümätänï nono ngwuje be ci,
37 “Dïjï dere danni da gwäꞌrï yïjü yanni yookoriny anaku nggee ngwürïny ngwe ngwüny, dïgwäꞌrïny, na gwere gwanni gwunyi gwäꞌrï, gwaꞌti gwäꞌrä änyïng, ngwube gwäꞌrï ngindeng gwanni gwükäjïny.”
Gwanni gwaꞌti nje ïnïjä nggwo ar le
(Luka 9.49–50)
38 A Yuwana ci, “Gwani doorta, änyängä länggädï dïjü deꞌte ndi ꞌtüyï dijegoꞌro ngwürïny ngwe ngwunga nyii be etaci ndi ari däꞌtüdï dege.”
39 A Yicu ari, “Aaꞌti da ang etaci ndi ari dïjï dere daꞌti danni dadi ape yiima ngwürïny ngwe ngwüny ngwube aji ngwoꞌre aar nyi ngwe ondaji ngwujaꞌri ngwanni ngwuki.
40 Ndi ari gwere gwanni gwaꞌti nje ïnïjä, gwege gwuru.
41 Nggwa je ci ꞌdidanu gwere gwanni gwa je ïcï yaw giny ge ngwürïny ngwe ngwüny nunnu ngaa liru lidi nginde gwanni Gwubrutaar yelenya, ꞌdidanu gwaꞌti gwa aar düdïjï guꞌru güngün.”
Ndi gäbïcï ngwüjü aar ke
(Mätä 18.6–9; Luka 17.1–2)
42 “Na gwere gwanni gwa dudiyi ngindeng gwere gïyïjänü giyee yookoꞌriny yämnä ꞌdünggüny ngwügäbïcï ngwärrï yiꞌral yanni yiki, yaadi jayani aar gekaci lille lipa giligoꞌro lüngün aar gatu giyaw.
43 Manari guy gima ru gadi ang gäbïcï nga ape gwuki, üꞌrïdädälü mbüny. Yijayana ndi änï giyelenyanu yidi Ngwaalu gwüꞌrü guy geꞌte pu ndi ari nga ele gïlïgä lidi yiꞌrendeny lanni lati ꞌti ayu aꞌtur ngwuy ngwe rom
44 (Ngwaalu, ‘Ngwati gu ꞌti ngwondem ayu, agu ꞌti lïgä ayu.’)
45 Na manari a gora ru gunga ga ang gäbïcï nga ape gwuki, üꞌrïdädälü mbüny. Yijayana ndi änï giyelenyanu yidi Ngwaalu gwüꞌrü gora ndi ari aar ang gatu gïlïgänü lidi yiꞌrendeny yora yanu rom.
46 (Ngwaalu, ‘Ngwati gu ꞌti ngwondema ayu, agu ꞌti lïgä ayu.’)
47 Na manari läy lima ru lunga lanni la ang gäbïcï nga ape gwuki, gwällädälü mbüny. Yijayana ndi änï giyelenyanu yidi Ngwaalu gwuru gabuluny, ndi ari aar ang gatu gïlïgä lidi yiꞌrendeny ngwäy ngwänü rom
48 ngwaalu,
‘Ngwati gu ꞌti ngwondem ayu,
a gu ꞌti lïgä ayu.’
49 Ndi ari dïjï deꞌte deꞌte, da yiꞌrendeny eny nono gwele ngwümündä.
50 Ngwümündä ngwujaw, ma be ari ngwuma dudi nyirang gwüngün, ngwa aar je nyiriyi mana awa? Rüdär ngwümündä giyigoꞌro yalu, ngaa jajidalu ladatalu.”