8
A Yicu iye ngwüjü ngwüüꞌrï kwoꞌrongo (4,000)
(Mätä 15.32–39)
1 Giyomon giyoo, a ngwüjï ngwonyadu ngwuꞌter oꞌrajidalu mana. A be anni ma aar ꞌti mbuju ngwony ngwere ngwudi eny, a Yicu urnida ngwoꞌra ngwüngün ngwuje ci,
2 “Ngwüjï ngwee ngwïnädïny ngwuma ji ngene ꞌdünggüny yomon giyee täꞌrïl ngwaꞌti ïtï ngwonyalu ngwere.
3 Manari ngwuminje gwäꞌrï ꞌdunu ꞌdenggen ngwamu ngwe, ngwa miꞌri yigor kay, ndi ari ngwoko ngwo ngwïndï ngwaalu ngwolanu.”
4 A ngwooꞌra ngwüngün ci, “A be ngwadi ar je äpïjä yona ne aar je iye aar je mbuti ngwaalu ngwee ngwuru yiluꞌri?”
5 A je Yicu otacalu, “Ngaa lätï yona ümïn?”
Aar ci, “Kwoꞌra täꞌrïl.”
6 Ngwondaci ngwüjü aar jalu gïdïyängälü ngwube ape yona giyoo yiru kwoꞌra täꞌrïl ngwuci Ngwaalinga yäy ꞌtu ngwuje be üꞌrïꞌtänü ngwuje ätädä ngwoꞌra ngwüngün aar je gïꞌtïjï ngwüjälü, aar je gu ärrï.
7 Aar ätädä ꞌto ngwuuma ngwookoꞌriny ngwanni ngwooko ngwuje ape ꞌto ngwuci Ngwaalinga yäy ꞌtu ngwuje be ätädä ngwoꞌra ngwüngün aar je gegenaci ngwüjü.
8 A ngwüjï eny ꞌdi aar pe a ngwooꞌra ngwudi Yicu uti yonalu na ngwuuma ngwanni ngwuma ïꞌdälü ngwüꞌrïꞌtïnänü ꞌdi aar je onjaji yiꞌramala kwoꞌra täꞌrïl (7).
9 Ngwüjï ngwanni ngwïtï ngwuru ngwüüꞌrï kwoꞌrongo (4,000). Anni mung je geꞌte kay aar ele,
10 ngwüꞌdïꞌrï ngwallu gïbälükälä aar ele ngwooꞌra ngwe ngwüngün ngwaalu ngwani Dälmänütä.
Ngwübärrïjï ngwümïnä yiima yiralu ꞌter
(Mätä 16.1–4)
11 A Ngwübärrïjï ila aar otaci Yicungalu nunnu aar ïdäjï aar otacalu ndi ari ngwuje enggaci giꞌremna gere giru yiima ꞌter gïndï kerala.
12 Ngwugatu düwä dipa ngwari, “Ngwüjï ngwudi gimaad nggee ngwarra aar be mïnï giꞌremna giru yiimalu ꞌter gïndï kerala? Nggwa je ondaci ꞌdidanu ndi ari, yiima yere yaꞌti ya ara je enggaci.”
13 Ngwube ꞌdïꞌrï ngwuje gatani ngwoꞌre ngwallu gïbälükälä ngwele ngwudambu dambal.
Arngani ngwujaꞌri ngwudi Ngwübärrïjï na Yïrüdïj
(Mätä 16.5–12)
14 A ngwooꞌra ngwudi Yicu dudanu ndi apani yona a be yon ru yeꞌte pu ꞌdogo yanni yätäär gïbälükänü.
15 A Yicu ci ngwoꞌra ngwüngün, “Geꞌtar ngwäyälü ngaa arnganar, mama ngwüꞌrïdü ngwudi Ngwübärrïjï na ngwudi Yïrüdïj.”
16 Aar ondajidi aar ari, “Yiru gu ndi ari a laꞌti ätï yona.”
17 A Yicu lenge ngwujaꞌri ngwanni ngwondajidaar je ngwuje otacalu ngwuje ci, “Ngaa larra ngaa be ondajidi ndi ari ngaa laꞌti ätï yona? Ngaa gilona laꞌti änggädï ngaa lenge? Yiꞌra yalu giyona yïne?
18 Ngaa lätï ngwäy ngaa ꞌti be ombajidalu ngaa ätï ngwänï ngaa ꞌti be ꞌdingina? Ngaa lima ꞌti diwayina?
19 Gaji ganni giminyi ge üꞌrïꞌtïjï ngwüjü yonanu yiru ꞌtudini a je ngwüjï eny ngwuru ngwüüꞌrï tudini (5000) yanni yima je utalu yüꞌrïꞌtïnänü, yima je ape yiꞌramanu ümn?”
Aar ci, “Yiꞌramanu ꞌdï na rom (12).”
20 Ngwuje ci, “Na anni minyi üꞌrïꞌtïjï ngwüjü ngwüüꞌrï kwoꞌrongo (4000) yonanu yiru kwoꞌra täꞌrïl (7) yanni yüꞌrïꞌtïnänü yima je utalu yima je ape yiꞌramanu ümn?”
Aar ci, “Kwoꞌra täꞌrïl.”
21 A je Yicu ci, “A be awa ngaa gilona laꞌti lïngïdï?”
A Yicu uꞌriyi guru nono gïrïmü ngwäy kündär gani Bid Jäyïdä
22 Aar ila kündär gani Bid Jäyïdä a ngwüjï apa guru gïrïmü ngwäy aar päcï Yicungalu nunnu ngwapa yiima.
23 A Yicu määtä kuy ngwokta ngge ꞌtü poor ngwuꞌdunanu. Anni mung gwonynya ngwäy, ngwügwüꞌrübäjï ngwuy ngwäy ngwuje äbrï ngwotacalu ngwuci, “Ngaa gwänggädï gony gere?”
24 Ngwombajidalu ngwuci, “Äny gwänggädï ngwüjü ngwuru nono ma ngwaꞌri ele.”
25 Ngwoꞌre mana ngwügwüꞌrübäjï ngwuy ngwäy a ngwäy ngwüngün ïgïtïnï aar oꞌradi ngwengga ngwonyalu wiir ꞌdar.
26 A Yicu dinga ngwoꞌre ꞌdunu ngwucani, “Aaꞌti nga gwa änï ngwuꞌdunanu.”
A Butruj ꞌtäjï Yicungalu
(Mätä 16.13–20; Luka 9.18–21)
27 A Yicunga ngwooꞌra ngwe ngwüngün ꞌdïꞌrï aar elada ngwuꞌdunanu ngwaalu ngwani Gäyïjärïyä Bïlïpï. Ngwotaci ngwoꞌralu ngwüngün kay ngwuje ci, “Ngwüjï ngwati ari äny gwuru gwani yärü?”
28 Aar ci, “Ngwüjï ngwoko ngwati ari nga gwuru gwani Yuwana Almamadan, na loko ari, nga gwuru gwani Ïlïyä na loko ari, nga gwuru dïjïr deꞌte.”
29 Ngwuje be otacalu, “A be nga nga laru äny gwani yärü?”
A Butruj ci, “Nga gwuru gwanni Gwubrutaar yelenya.”
30 A je Yicu girinya ndi ari aaꞌti la gu ci dïjü dere.
Yicu gwondaja yiꞌrany ye na ꞌdïꞌrï gwe gwüngün
(Mätä 16.21–28; Luka 9.22–27)
31 Ngwuje be enggaci ndi ari Gïjï gidi Dïjï dümnä gadi yiꞌrendeny mbuji yonyadu ga mbumbunga na ngwurꞌdal ngwanni ngwuru ngweleny na ngwoorta ngwudi yobo ꞌdonya ga aar ꞌrinye, ga jalu yomon täꞌrïl ga ꞌdïꞌrä mana.
32 A nginde ondajalu gilingenalu, a Butruj odada gay geꞌte ngwugirinya.
33 A be anni ma Yicu gwurlalu ngwombaji ngwoꞌra ngwüngün, ngwugirinya Butrujing ngwuci, “Oꞌraciny gwodan gwuru dijegoꞌrr ndi ari nga gwaꞌti ïrïjä ngwäy giyiꞌral yidi Ngwaalu nga gwïrïjä ngwäy giyiꞌral yidi ngwüjï ngwümnä.”
Üpïnä güüꞌrï nga gwuji Yicung
(Mätä 16.24–27; Luka 9.23–26)
34 A Yicu urnidi ngwüjü na ngwooꞌra ngwüngün ngwuje ci, “Manari dïjï dere dima nani ndi aar nyi gwujani, gäbïcär ngwudodani ligoꞌro lüngün, ngwüpïnï güüꞌrï gimamindanu güngün aar nyi gwujana.
35 Na dïjï danni dima mïnï ndi gïlängïdïyï ligoꞌro lüngün ngwududiyi. A be gwanni gwadi dudiyi ligoꞌro lüngün gwani äny na gwani ngwujaꞌri ngwanni ngwujaw, ling gïlängïdïyï.
36 Dïjï daꞌti da mbuji gonyalu gere gijaw manari dima bile dïdläyälü pipiꞌriꞌti ngwube geraji linginalu lüngün.
37 Yaꞌti yanni yadi ye dïjï üꞌrä linginalu lüngün.
38 Manari yaaru yima ape dïjü dere gwani äny na gwani ngwujaꞌri ngwüny kimaadanu nggee giki gïmïꞌrïdï ngwäyänü gidi dïdlä ndee, yaaru ya ape Gïjü gidi Dïjï dümnä gwani nginde ma ji ma aar ila yïꞌrr ye yanni yijuꞌru ndi näjï gwudi Papa.”