19
1 Anni ma Yicu medaji ondajing ngwujaꞌri ngwee, ngwüꞌdïꞌrï ngwugatani Jälïlïng ngwele Yäwüdïyä ngenone dambal giyaw yidi Ordoning.
2 A ngwüjï ngwonyadu gwujani ngwuje uꞌriyi nono ngenone.
Geꞌte dayu kay
(Murkuj 10.1–12)
3 A Ngwübärrïjï ngwoko elaca Yicung nunnu aar ïdäjï. Aar otacalu ndi ari, “Yädï gu ndi dur geꞌte dayu düngün kay giyiꞌral yere?”
4 Ngwuje ci, “Ngaa lima ꞌti ulu ngwujaꞌri kitabanu ndi ari ꞌtuꞌtu anaku gïꞌtïnä gu ngwong gïdïdlä, ‘ligeꞌta je Ngwaalu rom dur na daw.’
5 Ngwari, ‘Yäꞌtüdï giyee yanni yati gäbïcï duru ngwugatani papang na nanning gwüngün aar acidi daw de düngün, aar ru ngwanginu ngweꞌte po’?
6 No, ngindenga laꞌta be rüdï rom lima be ru leꞌte pu. Yäy gu no, yanni yima je Ngwaalu gekajidi gwüpäng, aaꞌti ya je dïjï dümnä ngedanu.”
7 Aar be otacalu aar ci, “Amne Müjä arra mung ari ma dur geꞌte dayu kay, ngwüllïjï ngwujaꞌri ngwuje ätädä ngwugeꞌte kay?”
8 A je Yicu ci, “Müjä gwaru gu no ndi ari yigor yalu yundu, ara je be ämnäcï ndi ari aang geꞌte ngwayu ngwalu kay. A be yaꞌti gu rüdï no ꞌtuꞌtu gwerre.
9 Nggwa je ci ndi ari gwere gwanni gwa geꞌte dayu düngün kay giyiꞌral yere manari mïꞌrï ngwäyänü gwäꞌtüdï, ngwube agu diꞌter, gwümïꞌrïdï ngwäyänü.”
10 A ngwooꞌra ngwüngün ci, “Ma be ari ngwujaꞌri ngwuru gu no ngwudi durnga daw de, ya jayani ndi dïjï jalu no ngwuꞌti agu!”
11 A je Yicu ci, “Ngwujaꞌri ngwee ngwaꞌti ngwa je ngwüjï ämnï ꞌdar, ngwa je ngwüjï ämnï ꞌdogo ngwanni ngwangidacaar je.
12 Ndi ari ngwüjï ngwoko ngwülïngïnä ngwuru yül a ngwoko ngwugwallana na ngwoko ngwuꞌdonya ndi agu gwani yeleny yidi gerala. Dïjï danni dadi ämnï ngwujaꞌri ngwee, ngwuje mine ämnï.”
A Yicu onjaci yïjü yanni yooko
(Murkuj 10.13–16; Luka 18.15–17)
13 Aar äpïjä yïjü nunnu ngwuje gu gatu guy nono ngwuje ütäcïjï Ngwaalingalu ngwuje onjaci a be ngwooꞌra ngwudi Yicu girinya ngwüjü dulu de ngwanni ngwapa je.
14 A je be Yicu ci, “Gäbïcär yïjü aar ila ꞌdünggüny aaꞌti ya je etaci, ndi ari yeleny yidi gerala yiru yidi ngindenga lanni liru nono yïjü giyee.”
15 Anni mung je gatu guy nono ngwuje onjaci, ngwüꞌtü ngwugatani ngwaalinga ngwoo ngwele.
Damal dïnänü
(Murkuj 10.17–31; Luka 18.18–30)
16 A damal deꞌte ila ndi Yicu ngwotacalu ngwuci, “Gwani doorta, yiru ange yanni yijaw ndi nje ärrï nunnu nyi mbuji miding gwudi gwurꞌtaling?”
17 A Yicu ci, “A gwarra nyi be otacalu jayi gwe? Nggwo ꞌdogo gweꞌte pu gwanni gwujaw. Ma be ari nga gwümïnä ndi ang mbuji miding gwudi gwurꞌtaling, ꞌdengenaca ngwujaꞌri ngwudi Ngwaalu.”
18 A damal otacalu ngwuci, “Ngwujaꞌri ngwïndï ne?”
A Yicu ci, “ ‘Aaꞌti nga gwa ꞌrinyidi, aaꞌti nga gwa mïꞌrï ngwäyänü, aaꞌti nga gwa eny yuꞌrimi, aaꞌti nga gwüꞌrïdä dïjü yiꞌduru nono,
19 dïnyädï papanga je nanni gwe gwunga,’ na ‘ang ämnï gwanggalu nono anaku ata gu ämnï ligoꞌro lunga.’”
20 A damal ci, “Ngwujaꞌri ngwee ꞌdar ngwärrï nje, na yiru ange mana yanni yïrnïdï?”
21 A Yicu ci, “Manari nga gwümïnü ndi ang ru dïjï dimbutu, ïndï ang ellang gola gunga ꞌdar nga gegenaci ngwüjü ngwanni ngwuru ngwuwayi, nga gwa be ätï yuꞌrina kerala. Nga be ila nyi gwujani.”
22 Anni ma damal ꞌdingini ngwujaꞌri ngwee no, ngwüꞌtü ngwele dikanu ndi ari dätï gola gonyadu.
23 A Yicu ci ngwoꞌra ngwüngün, “Nggwa je ci ꞌdidanu ndi ari yojema gwulleny ndi dïjï dïnänü änï giyelenyanu yidi gerala.
24 Na ꞌto nggwa je ci, Yajanalu torneny ndi damla änï kïy gidi yïbrä, ndi ari a dïjï dïnänü änï giyelenyanu yidi gerala.”
25 Anni ma ngwooꞌra ngwudi Yicu ꞌdingini ngwujaꞌri ngwee, a je le ngwaalu elalu aar utalu ndi ari, “Yärü gwuru mine gwa gïlängïdïnï?”
26 A je Yicu alliji ngwäy nono ngwuje ci, “Ngwäyänï ngwüjï, yiꞌral giyee yojema gwulleny a be ngwäyänü Ngwaalu yiꞌral ꞌdar yaꞌti ojema.”
27 A Butruj ci, “Änyängä lima gatana ngwonyalu ꞌdar lima ang gwujani, guꞌru gärï gadi ru ange?”
28 A je Yicu ci, “Nggwa je ci ꞌdidanu gaji ganni gadi ge yiꞌral ꞌtädïnälü ma Gïjï gidi Dïjï dümnä jalu gididuꞌralu didi yeleny gomon gidi näjï gwüngün, nga nga lanni ligwujani la jalu ꞌto ngwuduꞌrala ꞌdï na rom (12) ngaa pïcï ngwüjü ngwudi Yïjïräyïl yelenya ngwanni ngwuru gïïlü ꞌdï na rom (12).
29 Na gwere gwanni gwuma gatana ngwuꞌduna ngwüngün yaa ngwenggen ngwuru ngwur yaa yera na papa na nanni yaa yïjï yüngün yaa ngwuruny ngwüngün gwani ngwürïny ngwüny gwa mbujani yomonanu küüꞌrï tudini (100) gwonyadana na gwa mbuji miding gwudi gwurꞌtaling.
30 A be lonyadu lanni limadina laji la ji gwodan na lonyadu lanni liju gwodan laji la madini.”