20
Ngwäänü gidaartanu didi yügïrï
1 A je Yicu ci, “Yeleny yidi Ngwaalu yiru nono gur gätï daarti didi yügïrï ngwube ꞌtü ꞌtuꞌtu dilu danu ndi mïnï ngwäänä aar ape yiiru gidaartanu didi yügïrï düngün.
2 Aar ngwe gekajidi ngwujaꞌri ndi ari aar äpïjï yiiru ngwuje be ätädä dinar gilingen ngwuje dinga aar ele gidaartanu düngün didi yügïrï.
3 Anni ma aar ele, a gaji ele ꞌdi ngwuru tudini kwoꞌrongo dilu danu ngwoꞌre ngwüꞌtü ngwengga ngwüjü ngwuꞌter mana ngwüdünädälä ngwaalu ngwudi ngwiliny ngwaꞌti ätï yiiru.
4 Ngwuje ci, ‘Nga nga ꞌto, ïndär aang ape yiiru gidaartanu düny didi yügïrï nyi be aji nyi ila a je ätädä guꞌru galu.’
5 No aar ele.
Ngwoꞌre mana ngwüꞌtü lingen le lïdünälä na gaji ganni giru täꞌrïl (3) digera de ngwumbuji ngwüjü ngwuꞌter ngwoꞌre ngwuje gu ci.
6 Ngwoꞌre ngwüꞌtü mana gaji giru tudini digera de ngwuje mbuji ngwuꞌter ngwüdünädälä. Ngwuje otacalu, ‘Ngaa larra ma aang ji ndi dünälä ngene gangin gangin laꞌti apu yiiru yere?’
7 Aar be ci, ‘Dïjï dere daꞌti dükäjï nje ndi äpïjï yiiru.’
Ngwuje ci, ‘Ïndär ꞌto ngaa ape yiiru gidaartanu düny did yügïrï.’
8 Anni ma ngwaalu ru digera, a gur ila gidi daarti didi yügïrï ngwurnidi guru giru giꞌra güngün ngwuci, ‘Urnidar ngwäänä ngaa je gegenaci guꞌru gegen, ngaa le aalu lanni lïndälü gäꞌtïgänü ꞌdi ngaa gu obani lanni lübïnädï kay.’
9 Ngwäänü ngwanni ngwapu yiiru kaji giru tudini, aar ila ati aar ätä dïjü dinar.
10 A be anni ma ngwäänü ngwanni ngwübïnädï giyiiranu, aar ji ndi ari ladi aar je be ätädä gwonyadana. Ati aar be ätädä dïjü dinar.
11 Anni ma aar ape, aar äbïngïnädä guru gidi daarti giyinenanu.
12 Aar ari, ‘Ngwüjï ngwee ngwapu yiiralu gwodan gaji geꞌte pu, nje le be übïdänü änyängä lanni lapu yiiru gangin gangin a nje deja eny nono gangin gangin.’
13 Ngwube ci deꞌte ꞌdenggenanu, ‘Gwani dimaad, äny gwaꞌta je ärräjü. A laꞌti gekajidu ndi ari aang ape yiiru dinar de?
14 Apa guꞌru gunga ang ele. Äny gwümïnä ndi ätädä dïjü danni dïndälü gwodan guꞌru geꞌte geꞌte anaku ätädä gu.
15 Yüny yäꞌtüde ndi nje ärrï anaku mïnïny gu ngwong ngwe ngwünye? Nga gwuru diꞌrinya ndi ari äny gwujaw ligure?’
16 Yäy gu no, lanni liju gwodan laji la ji gweere na lanni liju gweere, laji la ji gwodan.”
A Yicu pälü yiꞌrany ye yüngün
(Murkuj 10.32–34; Luka 18.31–34)
17 Anni ma Yicu ji ndi ele gwadi allu Üräjälïm, ngwapa ngwoꞌra ngwüngün ngwuru ꞌdï na rom (12) kay ꞌter ngwuje ci,
18 “A ladi allu Üräjälïm na la gwurlanu Gïjï ge gidi Dïjï dümnä ga aar ätädä ngwurꞌdala ngwanni ngwuru ngweleny na ngwoorta ngwudi yobo. Ga aar ge obalu giyiꞌrany
19 ga aar ätädä ngwüjü ngwuru Garany ga aar ärrï yïdäpängä, ga aar pï lacal le ga aar pädä küꞌrï ga ayi. A be ga jalu yomon täꞌrïl (3) ga aar ꞌdïꞌrïyälü gimidu!”
Bupi gwudi nanni gwudi Yagub na Yuwana
(Murkuj 10.35–45)
20 A nanni gwudi yïjï yidi Jäbädï apa yïjü yüngün ngwuye ila ndi Yicu, ngwukwucalu yirku ye ngwuci ngwujayi ngwäy.
21 A Yicu ci, “Yiru ange yïmïnä je?”
Ngwuci, “Aru ndi ari a yïjü yüny giyee, geꞌte aar ang jicalu kaama na geꞌte aar ang jicalu kängïr giyelenyanu yunga.”
22 A be Yicu ci, “Ngaa lutalu ngwujaꞌri ngwe ngwaꞌti aang ngwe lïngïdädï yorto ye ngwaalinga.” Ngwuje ci, “Ngaa la burni ndi ïyï dïrbä danni dadi nyi mbuje?”
Aar ci, “Nyängä la burni.”
23 A je Yicu ci, “Nga la burni ndi ïyï dïrbä düny ꞌdidanu, a be ngwujaꞌri ngwani jalu kaama na kängïr, ngwäꞌtüdï ngwüny ndi nje ätädä dïjü. Ngwaalu ngwee ngwuru ngwudi ngwüjï ngwanni ngwuma je Papa gwüny gïꞌtïjälü.”
24 Anni ma gu ngwooꞌra ngwudi Yicu ngwoo ꞌdï (10) ꞌdingini, aar kïjï yïjänü giyoo yengga rom.
25 A je Yicu urnidi gwüpäng ngwuje ci, “Ngaa lïlïngïdï ndi ari ngweleny ngwudi dïdlä ngwati ruyi ngwüjü yelenya yiima ye na lanni liru yiꞌra yegen lati je gu pä yelenyala.
26 A be ꞌdanggalu, ngaa läꞌtüdï ladi gu ape yelenya no. A manni gwanni gwümïnä ndi pani ꞌdanggalanu, ngwuru dïnäd dalu
27 na gwanni gwuma mïnï ndi ru giꞌra, ngwuru dïnäd dalu.
28 Nono ru gu Gïjï gidi Dïjï dümnä ndi ari gaꞌti ïndädï ndi aar äpïjï yiiru, ngwube ilada ndi ape yiiru ngwududiyi ligoꞌro lüngün lani üꞌrä ngwüjälü ngwonyadu.”
Uꞌriyi ngwüjï nono rom ngwürïmü ngwäy
(Murkuj 10.46–52; Luka 18.35–43)
29 Anni ma Yicunga ngwooꞌra ngwe ngwüngün ji ndi ele ladi gatani ngwaalinga ngwani Ariya, a je ngwüjï ngwonyadu gwujani.
30 A ngwüjï rom ngwürïmü ngwäy aar ji ndi jalu gay gïlänï, anni ma aar ꞌdingini ndi ari Yicu gwadi ila gay ge nggoo, aar ürrï dula aar ari, “Gwani Deleny, Gïjï gidi Däwüd, aar ang ïnä!”
31 A je ngwüjï girinya dulu de aar je ci gwugwundar, aar be mïꞌrïdänï dula aar ari, “Gïjï gidi Däwüd, aar ang ïnä.”
32 A Yicu dünï ngwuje urnidi ngwuje ci, “Nga nga lïmïnä nda je ärrïjï ange?”
33 Aar ci, “Gwani Deleny, nyängä lïmïnägä nje uꞌriyi ngwäy.”
34 Aar ïnä Yicung, ngwudinga guy ngwuje akani ngwäy nono ngwegen kaji nggoo, aar uꞌri ngwäy aar ꞌdïꞌrï aar gwujani aar le ele.