6
Ndi ätä ngwüjü ngwuru ngwuwayi
1 “Arnganar ndi ari aaꞌti ngaa la ärrï yiꞌral yidi dünälü ngwäyänü ngwüjï ara je engga ndi ari ngaa lïdünälü. Manari ngaa lima gu arri no, ngaa laꞌti la mbuji guꞌru galu ndi Papa gwalu gwudi gerala.”
2 Ngwuje ci, “Manari nga gwuma ätädä dïjü diru diwayi, aaꞌti nga gwa mïꞌrï dula yiꞌral ye a gu ngwüjï lenge, nono ati gu ngwumurꞌtuny arri ngwämrä na ngwayalu nunnu a je ngwüjï ortada. Nggwa je ci ꞌdidanu, ngindenga lima ape guꞌralu gegen ꞌdar.
3 A be manari nga gwuma ätädä dïjü diru diwayi, aaꞌti gwa ang gäbïcï gwanni gwujicanga kängïr ngwulenge yiꞌral yanni yärrïjä je ngindeng gwanni gwujicanga kaama.
4 No, yiꞌral yanni yärrä je ya be ru yujimid a be Papa gwunga gwanni gwati engga yiꞌral yanni yati ärrïnï yujimida, gwa ang be ätädä guꞌru gunga.”
Otaci Ngwaalingalu
(Luka 11.2–4)
5 Ngwuje ci, “Ma aang otaci Ngwaalingalu, aaꞌti ngaa la ru nono ngwumurꞌtuny ndi ari lati jada ndi dünädälä aar otaci Ngwaalingalu ngwämrä na ngwayalu a je ngwüjï engga, nggwa je ci ꞌdidanu ngindenga lima ape guꞌru gegen.
6 A be nga, ma ang otaci Ngwaalingalu, ändï gïdrü ꞌdunggunga ang längïtïnï, a be otaci Papangalu gwanni gwati ꞌti enggana. A be Papa gwanni gwati engga yujimida gwa ang be ätädä guꞌru.
7 Na ma ang otaci Ngwaalingalu, aaꞌti nga gwa gwäꞌrïꞌtäjï ngwujaꞌranu nono ati gu ngwüjü arri ngwanni ngwaꞌti lïngïdï Ngwaalinga. Ngindenga lati geꞌtaji ndi ari la aar je ꞌdingini ngwujaꞌri ngwe ngwegen ngwanni ngwonyadu.
8 Aaꞌti la je oꞌrani, ndi ari Ngwaalu ngwülïngïdï yiꞌral yanni yibupa je gwerre gwerre ndi ang otacalu.”
Otacalu gwanni gwaru gwe Deleny
9 Ngwuje ci, “Otacar Ngwaalingalu aang ari no,
‘Papa gwärï gwanni nggwo kerala,
a ngwürïny ngwunga jüꞌrïnï,
10 ndi ari a yeleny yunga ru
na bupi gwunga ärrïnï ngene gïdïyängälü
anaku rung gu kerala.
11 Ätädï nje yona yidi eny gilingen.
12 Düdänïjï njänü ndi ke gwärï
nunnu nje düdänïjänü ꞌto lanni lati nje äpïjï gwuki.
13 Aaꞌti nga gwunje oktada ndi ïdäjï,
nje be ꞌtüyï giyiꞌralanu yidi dijegoꞌrr.’
14 Ndi ari manari ngaa lima düdänïjï ngwüjänü ndi ke gwegen, Papa gwalu gwudi gerala gwa je düdänïjänü ꞌto ndi ke gwalu.
15 Ma be ari ngaa lima ꞌti düdänïjä ngwüjänü ndi ke gwegen, Papa gwalu gwudi gerala gwaꞌti gwa je düdänïjänü ꞌto ndi ke gwalu.”
Määtä ngwädä
16 Ngwuje ci, “Ma aang määtä ngwädä, aaꞌti ngaa la undi ngwäyänü nono ati gu ngwumurꞌtuny arri lanni lati ïrïngïnï, ndi ari lati gwurli ngwäyänü aar ru ꞌter nunnu a je ngwüjï engga ndi ari lïmätï ngwädä. Nggwa je ci ꞌdidanu ndi ari ngwüjï ngwanni ngwuru gu no, ngwuma ape guꞌru gegen.
17 A be nga ma ang määtä ngwädä, unu ngwäyänü nga brütïnä yila ye kiꞌranu,
18 nunnu aaꞌti ngwüjï ngwa lenge ndi ari nga gwümätï ngwädä, a be Papa gwunga ru gweꞌte pu gwanni gwaꞌti enggana, na Papa gwunga, gwanni gwati engga yujimida, gwa ang be ätädä guꞌru gunga.”
Yuꞌrin kerala
(Luka 12.33–34)
19 Ngwuje ci, “Aaꞌti ngaa la adaci yigoꞌro yalu yuꞌrina ngene gïdïyängälü, ngwaalu ngwa je gu ngwudogoꞌrol ꞌdigiꞌriyi aar dïbäꞌrï aar geradalu na ngwaalu ngwa je gu ngwuꞌram kiyi aar je ape.
20 Ngaa be adaci yigoꞌro yalu yuꞌrina kerala ngwaalu ngwanni ngwati je gu ꞌti ngwudogoꞌrol ꞌdigiꞌriya aar gu ꞌti dïbäꞌrü aar geradalu a je gu ꞌti ngwuꞌram kiya aar ape.
21 Ngwaalu ngwanni ngwata gu ada yuꞌrina yunga, nga gwati gu geꞌtaji ꞌto ligor lunga.”
Läy liru buri gwudi ngwanginu
(Luka 11.34–36)
22 Ngwuje ci, “Läy liru lamba lidi ngwanginu. Manari ngwäy ngwunga ngwujaw nono, ngwanginu ngwunga ꞌdar ngwa ru buri.
23 Ma be ari ngwäy ngwunga ngwuma ꞌti jaw nono, a ngwanginu ngwunga ꞌdar ngwa ru dïrïm. Ma be ari buri gwanni nggwo ꞌdunggunga gwuru dïrïm, dïrïm da be ru danni dikalu gikidang.”
Ru yigoranu rom
(Luka 16.13)
24 Ngwuje ci, “Dïjï dere daꞌti danni dati ru dïnäd didi ngwoorta rom. Ndi ari ding obedalu deꞌte ding ämnï deꞌte. Ngaa laꞌti la burni ndi ru ngwïnäd ngwudi Ngwaalu na ngwïnäd ngwudi ngwüꞌrïny.”
Aaꞌti yigor ya je pänü
(Luka 12.22–31)
25 Ngwuje ci, “Yäy gu no, nggwa je ci, aaꞌti yigor ya je pänü gwani midi gwalu ndi ari ngaa ladi eny ange na ngaa ladi ïyï ange, yaa gwani ngwanginu ngwalu ndi ari ngaa ladi genne ange. Ngaa laꞌti lïngïdï ndi ari midi gwojemana ndi enye? Na ndi ari ngwanginu ngwojemana ngwurede?
26 Ombajar ꞌdi yïꞌräyü yidi gerala, yati ꞌti kwüdï yati ꞌti unu na yati ꞌti ütädï gïyïlänü, ati je be Papa gwalu gwudi gerala iye. A be ngaa laꞌti pana guꞌru ꞌdenggene?
27 Yärü ꞌdanggalanu gwanni gwa ligor pänü gwa burni ndi gendaci miding gwüngün gaji geꞌte pu ngwujalu gwumidu?
28 Na ngaa larra ati ara je be yigor pänü gwani genne? Ombajar ꞌdi yibobo yidi ngwüdäny yati ꞌtü awa. Yati ꞌti apu yiiru na aar ïrïyï.
29 Nggwa je ci ꞌdi deleny dani Jiliman giyelenyanu yüngün ꞌdar, gwaꞌti genna ngwureda ngwujaw yiꞌrura nono yibobo giyee.
30 Ma be ari Ngwaalu ngwati gu giki yanya no yidi ngwüdäny yanni yati ji gwene aar be undi bïgänü aar gätïnï gïlïgä, gwaꞌti gwa je gikani nga nga lanni lätï ämnïnïng Ngwaalu gwooko?
31 No, aaꞌti yigor ya je pänü ndi ari, ‘A ladi eny ange?’ na ‘A ladi ïyï ange?’ yaa ‘A ladi genne ange?’
32 Ndi ari ngwüjï ngwanni ngwaꞌti lïngïdï Ngwaalinga, ngwuru ngwati linynyi yiꞌral giyee ꞌdar a be Papa gwalu gwudi gerala gwülïngïdï ndi ari yïmïnä je giyee ꞌdar.
33 A be utaralu yeleny ye yidi Ngwaalu gwerre gwerre na dünälü gwüngün, ya ara je be gendaca giyee ꞌdar ꞌto.
34 Yäy gu no, aaꞌti yigor ya je pänü gwani bïgänü, ndi ari bïgänü gwati ligor pänü gwani ligoꞌro lüngün. Yomon ꞌdar, gomon gati ligor pänü gwani ligoꞌro lüngün.”