Bụ́kụ̃ Mãlákĩ drị̂
Bụ́kụ̃ ꞌdĩ sĩ ị́jọ́ nábị̃ Mãlákĩ ꞌbã ụndrị́lé rĩ kî. Mãlákĩ ꞌbã ífí tị Ĩbũrãníyã drị̂ sĩ, “ꞌBá má ãni ụ́ꞌdụ́kọ́ tị ujílépi rĩ ꞌi jõku ụ̃pị́gọ́ŋá,” Ị́jọ́ ꞌdĩ sĩ, ꞌbá ụ̃nị̃táŋá Bĩbĩlíyã drị̂ trũ ụrụgá rĩ kí ꞌbã ãzí ãꞌị̃ kí rá rụ́ Mãlákĩ ꞌdĩ ĩꞌdi bụ́kụ̃ ꞌbã rụ́ adru ꞌbá ꞌbã rụ́ ku. Gẹ̃rị̃ ꞌdĩ áni rĩ sĩ ála ĩꞌdi ayú sĩ Nábị̃ kí ũꞌbĩjó. Ị́jọ́ ụndrị́lé bụ́kụ̃ ꞌdĩ agá rĩ ásị́sị́ŋá la ágbárị́ rĩ ándrá ꞌbá Ịsịrayị́lị̃ drị̂ ꞌbaní ãgõjó angájó Bãbụ̃lọ́nị̃ gá mãbụ́sụ̃ gâlé rĩ sĩ ãzíla ĩꞌbaní dó Jó Ãdróŋá drị̂ dejó sịjó úꞌdí ru ꞌbo rĩ gá.
Ị́jọ́ Mãlákĩ ꞌbã ụndrị́lé rĩ agá ala gá ãꞌdị́ ꞌbá Ịsịrayị́lị̃ drị̂ kí drĩdríŋĩ gá Ãdróŋâ be tre. Ị́jọ́ ụndrị́lé rĩ kí agá, Ãdróŋá iꞌda ị́jọ́ ꞌbá Ịsịrayị́lị̃ drị̂ ꞌbã kí adrujó ãꞌị̃táŋá kóru sĩ ãko ũnzí rĩ kí fẽjó ídétáŋá ru rĩ ꞌi 1:8 ãzíla ĩꞌbã kí ũkú ãdroŋa ĩnzõ rú rĩ kí ị̃nzị̃lépi rĩ kí ꞌdụjó ĩꞌbaní ũkú ru rĩ sĩ 2:11. Kị́rị́tị́ ꞌbá Ịsịrayị́lị̃ rú were la uja kí ásị́ nị̃. Ị́jọ́ Mãlákĩ ꞌbã ụndrị́lé rĩ jọ ụ́ꞌdụ́ Úpí drị́ sĩ ị́jọ́ lịjó ri la amụ́ rá. Ụ́ꞌdụ́ ꞌdã sĩ ꞌbá ãlá rĩ kí adru ãyĩkõ sĩ, wó ꞌbá ũnzĩkãnã ngalépi rĩ kí ála kí ivé rá.
1
Ãdróŋá lẽ Yãkóꞌbõ áyụ, ngụ̃ Ị́sãwụ̃ ũnzí
1 ꞌDĩ ị́jọ́ Úpí Ịsịrayị́lị̃ drị̂ ꞌbã jọlé Mãlákĩ ní ꞌbã jọ ĩꞌdi ꞌbá Ịsịrayị́lị̃ drị̂ ꞌbaní rĩ ꞌi.
2 Úpí jọ, “Álẽ ĩmi rá,” wó ĩmi zị la, álẽ ĩmi rá la íngoní-íngoní ru? Úpí jọ, “Ị́sãwụ̃ adru ándrá Yãkóꞌbõ ꞌbã ádrị́pị ku yã? Wó álẽ Yãkóꞌbõ anzị ĩꞌdidrị̂ kí abe rá,
3 ángụ̃ Ị́sãwụ̃ ꞌi anzị ĩꞌdidrị̂ kí abe ũnzí ãzíla má uja ãngũ ĩꞌdidrị́ ꞌbé ꞌa rú rĩ ãngũ ru izalépi rá la rú ãzíla áfẽ ãwítã ĩꞌdidrị̂ ũbaligo kõtórõ agá rĩ ꞌbaní.”
4 Sụ́rụ́ Ídõmũ drị́ Ị́sãwụ̃ ꞌbã drị̃lẹ́ka rú rĩ kí icó jọlé la, “Údrĩ táni ãma iꞌị́ rá tí, ãma mụ táwụ̃nị̃ ãmadrị́ andilé rá rĩ sịlé úꞌdí ru.”
Wó Úpí Ũkpó ꞌdị́pị jọ: “Kí icó táwụ̃nị̃ sịlé úꞌdí ru rá, wó ma mụ ĩꞌdi anulé vụ̃rụ́ ị̃dị́. ꞌBá kí mụ Ídõmũ umvelé sụ́rụ́ ũnzí Úpí ꞌbã adrã ní sĩ adrujó drị̃ la gá jãꞌdâ rĩ ꞌi.
5 Ĩmi mụ ị́jọ́ ꞌdĩ ndrelé ĩmĩ mịfị́ sĩ ãzíla ĩmi jọ la, ‘Úpí ĩꞌdi ãmbógó ru alị átã lõkókõrí Ịsịrayị́lị̃ drị̃ gâsĩ cákáꞌdá.’ ”
Úpí ꞌbã uzájó ãtalo kí drị̃ gá rĩ
6 Úpí Ũkpó ꞌdị́pị jọ ãtalo ꞌbaní, “Ngọ́tị́ŋá la ãrútáŋá fẽ átẹ́pị̃ nî, ãzíla ãtíꞌbó la vâ ãrútáŋá fẽ ãmbógó ĩꞌdidrị̂ ní ꞌdã ꞌbã áni. Ádrĩ dó adru ĩmĩ átẹ́pị, ĩfẽ dó mání ãrútáŋá átẹ́pị drị̂ ku la ãꞌdu ị́jọ́ sĩ?” Ádrĩ adru ãmbógó ĩmi drị̂ ꞌi, ĩfẽ dó mání ãrútáŋá ãmbõgõ drị̂ ku la ãꞌdu ị́jọ́ sĩ? Ãtalo ꞌdĩ ĩmi ꞌbá áma rụ́ izalépi rĩ kî. Wó ĩmi zị la ãma ími rụ́ iza íngoní ru yã?
7 “Ĩmi ãkónã ãndị́ ru rĩ kí ꞌbã ãlĩtárĩ mádrị̂ drị̃ gá.”
“Wó ĩmi zị la, ‘ãma ími rụ́ iza íngoní ru?’ Ĩmi áma rụ́ iza ĩminí ãrútáŋá fẽjó ãlĩtárĩ Úpí drị̂ ní ku rĩ sĩ.
8 Úpí Ũkpó ꞌdị́pị zị, ĩdrĩ ãnãkpá mịfị́ kóru rĩ kí ají ídétáŋá ru, ꞌdã adru ị́jọ́ ũnzí la ku yã? Ãzíla ĩdrĩ ãnãkpá ãcá trũ jõku ãyánĩ rú la ají ídétáŋá ru, ꞌdã adru vâ ị́jọ́ ũnzí la ku yã? Ĩmi ụ̃ꞌbị̃ drĩ kí fẽlé gávũnã ĩmidrị̂ ní, ĩꞌdi nõ icó uꞌálé ĩminí ãyĩkõ ãzíla sĩ ĩmi ãꞌị̃lé rá yã áni?”
9 Úpí Ũkpó ꞌdị́pị jọ, “Ĩmụ drị̃ gá, ĩmi aꞌị́ Ãdróŋá ꞌi, ꞌba uꞌá ĩminí ásị́ ị̃gbẹ̃ sĩ! Wó ĩdrĩ dó fẽtáŋá ũnzí rĩ kí ají fẽlé ĩꞌdiní, ĩꞌdi dó ĩminí ásị́ ị̃gbẹ̃ iꞌda íngoní ru?”
10 Úpí Ũkpó ꞌdị́pị jọ, “Má adru ĩmi sĩ ãyĩkõ sĩ ku. Ĩꞌdi tá adru múké la ĩmĩ ãzí ãlu la drĩ tá kẹ̃jị́ tị ãlĩtárĩ drị̂ ũpĩ cí, ĩmi icó tá dó sĩ ãcí tị ꞌbãlé mádrị́ ãlĩtárĩ drị̃ gá ku. Má icó fẽtáŋá ĩmidrị̂ kí ãꞌị̃lé ku.
11 Áma rụ́ la mụ adrulé ãmbógó ru sụ́rụ́ kí drĩdríŋĩ gá, angájó ị̃tụ̂ ꞌbã agâ agálé cajó kpere ị̃tụ̂ ꞌbã ꞌde agá. Ãngũ pírí gâsĩ ãko ãjị́ ngụ̃lépi vĩrĩ rĩ kí fẽtáŋá ãlá rĩ kí abe, ála mụ kí ajílé áma rụ́ sĩ ãꞌdusĩku áma rụ́ ꞌbã adrujó ãmbógó ru sụ́rụ́ kí drĩdríŋĩ gá rĩ sĩ.”
12 Úpí Ũkpó ꞌdị́pị jọ, “Ĩmi ị̃nzị̃ ma ku la ĩminí jọjó la, ‘ãlĩtárĩ mádrị̂ ĩꞌdi ãndị́ ru ãzíla ĩminí ãkónã ũnzí rĩ kí ꞌbãjó drị̃ la gá rĩ sĩ.’ ”
13 Úpí Ũkpó ꞌdị́pị jọ, “Ĩmi jọ la, ‘ãzị́ ngajó Úpí ní rĩ ĩꞌdi ị́jọ́ ũkpó la.’ Ĩmi tị upí ãzị́táŋá mádrị̂ kí sĩ, ĩmi ãnãkpá ụ̃gụ̃lé ụ̃gụ̃ ụ̃gụ̃ rĩ kí ají ãnãkpá ãcá trũ jõku ãyánĩ trũ rĩ kí abe fẽlé mání ídétáŋá ru. Ĩminí ũrãjó la rĩ sĩ má icó kí ãꞌị̃lé rá yã?”
14 Úpí Ũkpó ꞌdị́pị jọ, “ꞌBá áma ũnzãlépi jọlépi la ꞌi ãnãkpá múké la fẽ mání ídétáŋá ru rá wó vúlé vúlé ru ãnãkpá acálépi rá rĩ ajílépi ídétáŋá ru áyụ rĩ úwã ĩꞌdi rá, ãꞌdusĩku ma Úpí ãmbógó la ãzíla sụ́rụ́ pírí kí mání ãrútáŋá fẽ rá.”