3
Ũcõgõ aꞌdélépi Nị̃nẹ́vẹ̃ drị̃ gá rĩ
1 Nị̃nẹ́vẹ̃, mi táwụ̃nị̃ ãmbógó sĩ ꞌbá kí ãrí asujó rĩ ꞌi,
íga tré ĩnzõ sĩ,
íga tré ãrátáŋá sĩ,
mi ũcõgõ ãmbógó la ịsụ́ rá.
2 Ĩmi are drĩ kũrũbáyĩ ꞌbã ụ́ꞌdụ́kọ́ cũwã-cũwã ꞌdĩ ꞌi,
gárĩ ãꞌdị́drị̂ kí ꞌbã wị́lị̃ ꞌbã cẹ̃ŋá wị̃rị̃-wị̃rị̃ rĩ ꞌi,
fãrásĩ ꞌbã kpụ̃cụ̃kụ̃-kpụ̃cụ̃kụ̃ cẹ̃jó rĩ,
ãzíla gárĩ ãꞌdị́drị̂ kí ꞌbã ngõlõ-ngõlõ sĩ ãcẹ̃jó rĩ kí abe!
3 Ãsĩkárĩ ụ̃cẹ̃lépi fãrásĩ ãꞌdị́drị̂ kí sĩ rĩ kí kí ũŋmĩ drị̃ gá drị̃ gá,
ménéŋá ĩꞌbadrị́ ãꞌdị́drị̂ kí sị́ la dị̃ lẽrẽ-lẽrẽ,
ãjụ́ ãꞌdị́ drị̂ kí sị́ la dị̃ pãrã-pãrã!
ꞌBá adrálépi rá rĩ kí ũꞌbí ru,
ûdrõ dó ãvũ nguru,
ꞌbá ũdrãlépi rá rĩ kí ála kãlãfe la kí lã tí,
ꞌbá ri kí ru pá ụ̃sị̃lé ãvũ ụrụꞌbá gá.
4 Táwụ̃nị̃ Nị̃nẹ́vẹ̃ drị̂ ĩꞌdi cécé ũkú ãwụ́ꞌbá ru rĩ áni.
Ĩꞌdi ꞌbá kí asé ĩꞌdi rụ́ ũnĩ ĩꞌdidrị̂ sĩ,
ꞌbã sụ́rụ́ kí ãtíꞌbó ru ãwụ̃ ĩꞌdidrị̂ sĩ,
ãzíla ãndrị́kẹ ĩꞌdidrị̂ sĩ.
5 Úpí ũkpó ꞌdị́pị jọ, “Má acá dó mî mẹ́rọ́ꞌbá ru,
ma bõngó mídrị̂ kí wị rá.
Ma ími pílípílí iꞌda sụ́rụ́ ꞌbanî,
ãzíla sụ́rụ́ pírí kí ími pílípílí ndre rá.
6 Ma ími drị̃ gá Kórõná ũsũ,
ma ími drị̃ inzá,
ãzíla ma ími fẽ nị̃lé ꞌbá ꞌbanî.
7 ꞌBá pírí ími ndrelépi rĩ kí apá mí rụ́ ꞌdâ rá ãzíla kí jọ la,
‘Táwụ̃nị̃ Nị̃nẹ́vẹ̃ mí asu dó rá, ãꞌdi la dó ími awá nĩ yã?’
Ãꞌdi la dó ími ásị́ ũŋmĩ nĩ yã?”
8 Nị̃nẹ́vẹ̃, índẽ mũkẽ sĩ Tẹ̃bẹ́sị̃
táwụ̃nị̃ Mị̃sị́rị̃ drị́ mĩrĩ Náyĩlĩ tị gá rĩ rá yã?
Mĩrĩ ĩꞌdi bõrõ ĩꞌdi tãmbalépi rĩ,
Ị̃yị́ mĩrĩ Náyĩlĩ drị̂ ce andre la nĩ.
9 Tẹ̃bẹ́sị̃ ĩꞌdi táwụ̃nị̃ ãmbógó úpí Ị̃tọ́pị̃yã ꞌbadrị́ Mị̃sị́rị̃ be rĩ ní uꞌájó rĩ ꞌi,
Pụ́tị̃ kí Lị́bị̃yã be ĩꞌdi ꞌbã wọ̃rị́ka kî.
10 Wó âgụ ĩꞌdi ãmị́yọ́ŋá ru ãngũ ãzí gá
mãbụ́sụ̃ rú.
Âco ũrekeŋá ĩꞌdidrị̂ kí írã gá káyĩ-káyĩ,
gbọ̃kộ kí agâsĩ.
Úꞌbe jẽgê sĩ ãmbogo ĩꞌdidrị̂ kí awajó,
ãzíla ící ãmbogo ĩꞌdidrị̂ kí pírí nõrórõ sĩ.
11 Nị̃nẹ́vẹ̃, mi mụ adrulé cécé ꞌbá ĩmẽrãlépi íwá sĩ acị́lépi pãrã-pãrã rĩ áni;
mi mụ gẹ̃rị̃ ndrụ̃lé sĩ ími zị̃jó
mẹ́rọ́ꞌbá amụ́lépi mí rụ́ ãꞌdị́gá rĩ kí sĩ rá.
12 Bõrõ mídrị̂ kí pírí mụ uꞌdelé rá.
Kí mụ uꞌdelé cécé úlúgó ãka drị̃drị̃ nịlépi rá rĩ ꞌbã zõjó rĩ áni;
aꞌdélépi ꞌbá ifê ayalépi rĩ ꞌbã tị gá rĩ ꞌbã kí
ãka la najó rĩ áni.
13 Índre drĩ ãsĩkárĩ mídrị̂ kí,
kí acá pírí ũkpó kóru cécé ũkúŋâ áni!
Sụ́rụ́ mídrị̂ icó dó ru tãmbalé
mẹ́rọ́ꞌbá mídrị̂ kî sĩ ku;
ála kí ãcí su, kí ve rá.
14 Ĩmi akó ị̃yị́ tãmbalé cí, ãꞌdị́ acá ꞌbo,
ĩmi itú mére kí ũkpó ru!
Ĩga ũdrí sĩ bị̃rị́kị̃ ꞌbejó,
Ĩtu ũdrí bị̃rị́kị̃ drị̂,
ĩmi ãzụ̃ sĩ ãngũ mgbọ rĩ kí cí!
15 Ĩdrĩ táni ị́jọ́ íngõ idé rá tí, ĩmi mụ velé ãcí sĩ rá;
ménéŋá la ĩmi ụlị́ ãꞌdị́ gâlé pírí rá
cécé úmbí ꞌbã kí ãkónã ámvụ́ agá rĩ kí najó pírí rĩ áni.
Ĩkpẹ̃ cécé íse ꞌbã
kí kpẹ̃jó úmbí abe rĩ áni!
16 ꞌBá ĩmidrị́ bĩsírã ngalépi rĩ kí ꞌbã kãlãfe ꞌbã tụtụ̃
kpere kãlãfe ĩꞌbadrị̂ ꞌbaní lẽlẽgó ꞌbụ̃ agá rĩ kí ndẽ agá,
wó cécé úmbí ꞌbã kí ãko ãngũ drị̃ gá rĩ kí mbejó
ãzíla ĩꞌbã kí ngajó rá rĩ áni.
17 ꞌBá mídrị́ ãngũ tẽlépi rĩ kí cécé úmbí ũꞌbí ru tralépi ãngũ ãlu gá ãngũ ị̃gbẹ́ sĩ rĩ áni.
Wó kí cécé úmbí ungalépi sáwã ị̃tụ́ ꞌbã agájó rĩ sĩ rĩ áni,
ꞌbá ãzị́ icó nị̃lé la nga kí íngõlé yã rĩ gá ku.
18 Úpí Ãsụ́rị̃yã drị̂,
ꞌbá ãmbogo mídrị̂ ũdrã kí rá.
ꞌBá mídrị̂ kí iré ꞌbé kí drị̃ gâsĩ
ꞌbá ãzí kí atrálépi la la adru ꞌdáyụ.
19 Ãko ãzí ãkõzá mídrị̂ ꞌbã sĩ jajó rá la la adru ꞌdáyụ;
adráŋá míní adrájó ũnzíkãnã rú rĩ sĩ,
ꞌbá pírí ị́jọ́ ími drị̃ gá rĩ arelépi rĩ,
kí drị́ sa míní aꞌdéjó rĩ sĩ,
ãꞌdusĩku ꞌbá ãzí ásị́ ũnzĩ mídrị́ ukólépi ku rĩ
ĩtrĩkálépi ku la ꞌdáyụ.