102
Kãrị́lẹ̃ ị́jọ́ ꞌbã ndẽlé rá rĩ ꞌbã Ãdróŋá zịjó rĩ
1 Úpí, mí are áma zịtáŋá,
mí are drĩ mãmálá mádrị̂ ꞌi!
2 Ị́jọ́ drĩ áma ịsụ́, mí aꞌbejõ ma ku fô!
Mí are ị́jọ́ mání zịlé rĩ ꞌi,
ãzíla ádrĩ ími umve sĩ ãzãkoma aꞌị́jó, mí umvi ma gbõŋáŋá ru fô,
3 ãꞌdusĩku ídri mádrị̂ la ãvĩ gbõŋá ru cécé ãcíkã áni,
ãzíla áma ĩfãkã la ve cécé ãcíkúlú áni.
4 Áma ásị́ ãzá-ãzá, ꞌi cécé ásé áni,
ãzíla ãkónã kí ãjị́ mání yụ.
5 Mání ãzá tajó rĩ sĩ,
ánzụ dó diri-diri, áma íní ace kí dó ĩfãkã be nĩ.
6 Má acá dó cécé íŋmáŋá kõtórõ agá rĩ áni,
cécé íŋmáŋá ĩmbíráŋá kõtórõ álị́ rĩ agá rĩ áni.
7 Ma áma la mịfị́ mgbọ rú,
má acá dó cécé ãríŋá jó drị̃ gá áꞌdụ̂sĩ rĩ áni.
8 Ụ́ꞌdụ́ pírí sĩ mẹ́rọ́ꞌbá mádrị̂ kí áma uꞌdá uꞌdâ;
ꞌbá áma ngụ̃lépi unzí rĩ kí áma rụ́ ayú sĩ áwãtáŋá wãjó.
9 Ị́jọ́ ꞌdĩ sĩ ma úfóró na íná ru,
áma mị́ndrẹ la dó dị ãko mání mvụlé rĩ agá,
10 ãꞌdusĩku adrã mídrị́ ãmbógó rĩ sĩ,
mí inga ma ụrụgá ãzíla mí aꞌbé ma vũ gá.
11 Ídri mádrị̂ la alị gbõŋá ru cécé índréléndri alịlépi ĩndró sĩ rĩ áni.
Ma nụ cécé ásé áni.
12 Wó Úpí mî rú rĩ, íri úmvúke ũpĩ drị̂ drị̃ gá jãꞌdâ,
ála ị́jọ́ ũrã rụ̂ kụma mídrị̂ drị̃ gá áꞌbị́ anzị pírí kí agá jãꞌdâ.
13 Mi mụ angálé ãzíla mi Zị̃yọ́nị̃ ꞌbã ízákĩzã ndre rá,
ãꞌdusĩku ꞌdĩ dó sáwã míní pẽlé sĩ lẽtáŋá iꞌdajó ĩꞌdiní rĩ ꞌi,
sáwã míní pẽlé sĩ ĩꞌdi ãzãkojó rĩ acá dó ꞌbo,
14 ãtiꞌbo mídrị̂ lẽ kí ĩꞌdi rá,
údrĩ táni ĩꞌdi andi rá tí,
kí ĩꞌdi ꞌbã ízákĩzã ndre rá,
drĩ táni andi rá tí.
15 Sụ́rụ́ kí mụ idélé ụ̃rị̃ sĩ rụ́ Úpí drị̂ sĩ,
ãzíla ũpi ụ̃nọ́kụ́ drị̃ gá ꞌdâ rĩ kí mụ ãrútáŋá fẽlé míní ũkpõ mídrị̂ sĩ rá,
16 ãꞌdusĩku Úpí la Zị̃yọ́nị̃ sị úꞌdí ru rá,
ĩꞌdi î ãmbõgõ íngõpí yã rĩ iꞌda ꞌbá ꞌbaní rá.
17 Ĩꞌdi zịtáŋá ꞌbá ị́jọ́ ꞌbá ndẽlé rá rĩ ꞌbadrị̂ umvi rá,
icó mãmálá ĩꞌbadrị̂ ꞌbã ị́jọ́ idelé ku.
18 Lẽ úsĩ ị́jọ́ ꞌdĩ ꞌbá mụlé tịlé drị̃lẹ́ gâlé rĩ ꞌbanî,
ị́jọ́ ꞌdĩ sĩ ꞌbá drĩ tịlé ku rĩ kí dó sĩ Úpî ịcụ́.
19 Úpí andré ãngũ angájó lị́cọ́ ĩꞌdidrị́ ãlá ꞌbụ̃ gâlé rĩ gá.
André ãngũ vũ gá ꞌdõlé angájó ꞌbụ̃ gâlé,
20 sĩ nuŋá ꞌbá sulé mãbụ́sụ̃ gá rĩ ꞌbadrị̂ kí arejó,
sĩ ꞌbá ị́jọ́ lịjó kí drị̃ gá ꞌbã drã kí rá rĩ kí trũjó.
21 Ị́jọ́ ꞌdĩ sĩ ála dó sĩ Úpí ꞌbã rụ́ ũlũ táwụ̃nị̃ Zị̃yọ́nị̃ drị̂gá,
ãzíla ĩꞌdi ịcụ́ Yẹ̃rụ́sãlẹ́mụ̃ gá,
22 sáwã sụ́rụ́ ꞌbã kí ru trajó ũpi abe ãngũ ãlu gá
ãzíla sĩ Úpí ị̃nzị̃jó rĩ sĩ.
23 Úpí fẽ mání acájó ũkpõ kóru mání adru agá kãrị́lẹ̃ rú ꞌdĩgá ꞌdâ,
lị dó sĩ ụ́ꞌdụ́ mádrị̂ kí ꞌbã kãlãfe ãlị́ŋá ru.
24 Wó ájọ dó Ãdróŋá mádrị̂ ní,
ífẽ ádrã drĩ ꞌdĩ sĩ ma kãrị́lẹ̃ rú ku fô!
Ílí mídrị̂ kí mụ drị̃ gá áꞌbị́ anzị vúsĩ áꞌbị́ anzị vúsĩ.
25 Íꞌbã ándrá ụ̃nọ́kụ̂ ꞌbã ị̃ndụ́ ídu,
ãzíla íꞌbã ándrá ꞌbụ̃ kí ími drị́ sĩ.
26 Ãko ꞌdĩ kí ãvĩ rá, wó mi mîngá ace jãꞌdâ;
kí mụ delé pírí cécé bõngó áni.
Mi kí uja cécé bõngó ujajó rĩ áni
ãzíla kí ãvĩ rá.
27 Wó mi ace ími vúŋá sĩ jõ ídu rĩ áni,
ãzíla mi mụ uꞌálé jãꞌdâ.
28 Anzị ãmadrị̂ kí mụ uꞌálé ími andre gá;
anzị ĩꞌbã drị̃lẹ́ka rú rĩ kí mụ mụlé pá tulé ími drị̃lẹ́ gá ũkpó ru.