101
Ị́jọ́ úpí Dãwụ́dị̃ ꞌbã azịlé rĩ
1 Ma úngó ngo lẽtáŋá mídrị̂ drị̃ gá ãzíla ị́jọ́ lịŋá mídrị́ pịrị rĩ drị̃ gá,
Úpí, ma úngó sĩ ími ịcụ́jó rĩ ngo.
2 Álẽ adrulé múké múké sĩ uꞌájó ídri mgbã rĩ sĩ.
Mi dó amụ́ áma ãzãkolé ãꞌdụtụ́?
Álẽ uꞌálé ídri mgbã rĩ sĩ
lị́cọ́ mádrị̂ agá.
3 Ãlẽ filé ị́jọ́ ị́jọ́ ũnzí ngaŋá gá ku,
ángụ̃ ꞌbá ị́jọ́ ũnzí ngalépi ri kí ũnzí.
Álẽ áma icílé ĩꞌba abe ku.
4 Ãlẽ filé ị́jọ́ ũnzí ngaŋá gá ku,
ma áma se ꞌbá ị́jọ́ ũnzí ngalépi rĩ ꞌbarụ́ rĩ sĩ rá rá ru.
5 ꞌBá káláŋá ujílépi ĩꞌdi ꞌbã jĩránĩ rụ́ rĩ,
ma ĩꞌdi ꞌdị rá,
má icó ꞌbá ãfó ru rĩ
ꞌbã ị́jọ́ talé ku.
6 Ma ásị́ ꞌbã ꞌbá ãꞌị̃táŋá trũ ãngũ drị̃ gá ꞌdâ rĩ kí drị̃ gá,
ma kí ãꞌị̃ uꞌájó má be rá,
ꞌbá ị́jọ́ mgbã rĩ ngalépi ri
kí ãzị́ nga mání nĩ.
7 ꞌBá ĩnzó ꞌbá ru rĩ
icó uꞌálé mádrị́ jó agá ku,
ꞌbá ĩnzõ jọlépi rĩ icó
pá tulé áma andre gá ku.
8 Ụ́ꞌdụ́ ãlu ãlu sĩ, ma mụ ꞌbá ũnzí ri kí
ị̃lị̃kị̃lé ãngũ drị̃ gá ꞌdâ rá,
ma ꞌbá ũnzí ri kí adro
táwụ̃nị̃ Úpí drị̂ agá rĩ sĩ rá.