105
Ãdróŋá kí ꞌbá ĩꞌdidrị̂ kí abe
1 Ífẽ ãwãꞌdĩfô Úpí ní, mí ũlũ ãmbõgõ ĩꞌdidrị̂ ꞌbã ị́jọ́,
ífẽ sụ́rụ́ pírí ꞌbã nị̃ kí ị́jọ́ ĩꞌdĩ ꞌbã ngalé rĩ kî.
2 Ĩngo úngó ĩꞌdiní, ĩngo úngó sĩ ĩꞌdi ịcụ́jó rĩ ꞌi,
ĩmi ũlũ ị́jọ́ ĩꞌdiní ngalé ụ̃sụ̃táŋá ru rĩ kí ꞌbá pírí ꞌbanî.
3 Dị̃zã ꞌba adru rụ́ ĩꞌdidrị́ ãlá rĩ nî,
lẽ ꞌbá Úpî ndrụ̃lépi rĩ kí ꞌbã ásị́ ꞌbã uꞌá ãyĩkõ sĩ.
4 Ĩndre ãngũ Úpí rụ́ sĩ ãzãkoma ịsụ́jó,
ĩmi ịcụ́ ĩꞌdi sáwã pírí sĩ.
5 Ĩmi agá ị́jọ́ ĩꞌdi ꞌbã idélé ụ̃sụ̃táŋá rũ rĩ kí,
ị́jọ́ tálí ru rĩ kí, ị́jọ́ lịŋá ĩꞌdiní fẽlé rĩ kí abe.
6 Ĩmi anzị Ịbụrahị́mụ̃ drị́ ĩꞌdĩ ꞌbã ãtíꞌbó ru ꞌdĩ,
ĩmi anzị Yãkóꞌbõ drị́ ĩꞌdiní pẽlé ꞌdĩ.
7 Ĩꞌdi Úpí Ãdróŋá ãmadrị̂ ꞌi,
ãzị́táŋá ĩꞌdidrị̂ ĩꞌdi ꞌbá ụ̃nọ́kụ́ gá ꞌdĩ ꞌbaní pírí.
8 Ĩꞌdi ị́jọ́ ĩꞌdiní azịlé rĩ tãmba jãꞌdâ,
ị́jọ́ ĩꞌdiní azịlé rĩ ĩꞌdi áꞌbị́ anzị álĩfũ álĩfũ ꞌbaní pírí.
9 Mba tị icíma Ịbụrahị́mụ̃ be rĩ tã rá,
ãzíla mba ũyõ ĩꞌdiní nalé Ĩsákã be rĩ tã rá.
10 ꞌBã ị́jọ́ la ũkpó rũ Yãkóꞌbõ ní ãzị́táŋá ru,
ꞌbã vâ ĩꞌdi ꞌbá Ịsịrayị́lị̃ drị̂ ꞌbaní ãzị́táŋá jãꞌdâ rĩ rú.
11 “Ma ãngũ kãnánĩ drị̂ fẽ ĩminí,
ĩꞌdi adru ãko ĩminí ꞌdụlé ĩmĩ ãni la rú rĩ ꞌi.”
12 ꞌBá Ãdróŋá drị̂ kí ꞌbã kãlãfe were rú,
ĩꞌbaní adru agá ãmị́yọ́ŋá ru Kãnánĩ gá ꞌdãá.
13 Ĩꞌbaní wãyá co agá sụ́rụ́ ãzí rĩ gá cajó sụ́rụ́ ãzí gá,
angájó sụ́rụ́ ãlu gá cajó sụ́rụ́ ãzí rĩ gá.
14 Wó Ãdróŋá aꞌbe ꞌbá ãzí kí kí ĩkpãjó ku,
kí ị́jọ́ sĩ, uzá ũpi kí drị̃ gá rá.
15 “Ĩmi aló ꞌbá má ãni mání sĩ ãdu ũsũjó kí drị̃ gá rá rĩ kí ku;
ĩmi idé ị́jọ́ ũnzí nábị̃ mádrị̂ ꞌbarụ́ ku.”
16 Ají rílẽ ãngũ kãnánĩ drị̂ drị̃ gá,
iza dó sĩ ãkónã ĩꞌbadrị̂ kí rá,
17 pẽ ꞌbá ãzí tị kí drị̃lẹ́ gâlé
ꞌdĩ Yụ̃sụ́fụ̃ uzịlé ãtíꞌbó ru rĩ ꞌi.
18 Mãbụ́sụ̃ gâlé ící ĩꞌdi pá ímve sĩ cí, pá la kụ̃ kí dó sĩ rá,
ãzíla úsụ̃ dó ĩꞌdi imbe gá aya,
19 kpere ị́jọ́ ándrá ĩꞌdi ꞌbã jọlé rĩ ꞌbã ru idé agá,
Ị́jọ́ Úpí drị̂ ụ̃ꞌbị̃ dó Yụ̃sụ́fụ̃ ꞌi, ịsụ́ ĩꞌdi pịrị.
20 Úpí Mị̃sị́rị̃ drị̂ pẽ dó ꞌbá tị ãzíla anzé dó ĩꞌdi rá,
ãmbógó ꞌbá ꞌbadrị̂ trũ dó ĩꞌdi rá.
21 ꞌBã Yụ̃sụ́fụ̃ ãmbógó ru ãko úpí drị́ lị́cọ́ gá rĩ kí drị̃lẹ́ gá,
Úpí ꞌbã vâ ĩꞌdĩ ãmbógó ru ãko ĩꞌdidrị̂ kí drị̃lẹ́ gá pírí
22 sĩ ꞌbá úpí ꞌbã pálégá rĩ kí imbájó ĩꞌdiní lẽlé rĩ áni,
ãzíla vâ sĩ ꞌbá ĩyõ rĩ ꞌbaní ũndũwã imbájó.
23 ꞌDã ꞌbã ũngúkú gá, Ịsịrayị́lị̃ acá dó Mị̃sị́rị̃ gá;
Yãkóꞌbõ ri dó uꞌálé ãmị́yọ́ŋá ru ãngũ Hámũ drị̂gá.
24 Úpí fẽ ꞌbá ĩꞌdidrị̂ tị kí dó ũꞌbí ru,
fẽ ꞌbá ꞌdĩ acá kí dó ũkpó trũ ndẽ kí mẹ́rọ́ꞌbá ĩꞌbadrị̂ kí rá.
25 Fẽ ꞌbá Mị̃sị́rị̃ drị̂ ngụ̃ kí dó ꞌbá Ịsịrayị́lị̃ drị̂ kí ãjị́ ũnzí,
itú kí ị́jọ́ ũnzí ãtiꞌbo ĩꞌdidrị̂ ꞌbarụ́.
26 Úpí Pẽ ãtíꞌbó ĩꞌdidrị́ Mụ́sã kí tị
Ãrọ́nị̃ be, ꞌdi kí ꞌbá ĩꞌdiní ándrá ũpẽlé rĩ kî.
27 Idé kí tálí ĩꞌdidrị́ ícétáŋá ru rĩ kí ꞌbá kí drĩdríŋĩ gá,
ị́jọ́ Úpí drị́ ụ̃sụ̃táŋá ru rĩ kí ꞌbá Mị̃sị́rị̃ drị̂ kí drĩdríŋĩ gá.
28 Ãdróŋá Pẽ dó ị́nị́ tị, ãngũ Mị̃sị́rị̃ drị̂ nị dó sĩ ị̃tụ́ sĩ kpákpá,
ãꞌdusĩku uga kí ꞌbá Ịsịrayị́lị̃ drị̂ ꞌbaní mụlé úmgbé.
29 Uja ị̃yị́ ĩꞌbadrị̂ kí ãrí ru,
fẽ sĩ ị̃ꞌbị ĩꞌbadrị́ ị̃yị́ agá rĩ ꞌbaní ũdrãlé rá.
30 Ụ́drụ́gọ́ ga kí dó tré ãngũ Mị̃sị́rị̃ drị̂gá,
ufí kí jọ ꞌa ãmbógó ĩꞌbadrị̂ drị̂ kí agâ sĩ, ụtụ kí gbọ́lọ́ sị́ gâsĩ sĩ ĩndĩ.
31 Ãdróŋá jọ dó ị́jọ́, ụ́nụ́ ũꞌbí ãkpẹ̃ kí dó,
ãzíla údrániŋá tị kí dó ãngũ Mị̃sị́rị̃ drị̂ drị̃ gá pírí.
32 Uzogó kẹ̃jị́ gá ãpẽ
sí kí tị ãvi be ãngũ Mị̃sị́rị̃ drị̂ agá pírí,
33 co zãbíbũ ĩꞌbadrị̂ kí úlúgó ife abe vụ̃rụ́,
ãzíla anu ife sụ́rụ́ ĩꞌbadrị̂ agá rĩ kí vụ̃rụ́.
34 Ãdróŋá jọ ị́jọ́, úmbí ãkpẹ̃ kí dó ũꞌbí ru
íse abe lãŋá kóru.
35 Na kí dó ãko dụlépi ãngũ drị̃ gá ꞌdãá rĩ kí pírí,
mbe kí ãko ãkónã rú ĩꞌbaní salé rĩ kí pírí.
36 ꞌDã ꞌbã ũngúkú gá, ụꞌdị́ dó anzị kãjãní ꞌbá Mị̃sị́rị̃ gá rĩ ꞌbadrị̂ kí rá,
ãfó ãzíla ãyĩkõ ĩꞌbadrị́ lị́cọ́ drị̂ anụ́ dó rá.
37 Anzé ꞌbá Ịsịrayị́lị̃ drị̂ kí rá, ãzíla aꞌdụ́ kí sílĩvã kí gólũdĩ trũ ĩndĩ,
angájó sụ́rụ́ ĩꞌbadrị̂ agâlé kí ũkpó ru ãyánĩ kóru rụꞌbá ãlá sĩ.
38 ꞌBá Mị̃sị́rị̃ drị̂ uꞌá kí dó ãyĩkõ sĩ ĩꞌbaní ãngũ ĩꞌbadrị̂ aꞌbejó rĩ sĩ,
ãꞌdusĩku ụ̃rị̃ rụ kí ꞌbá Ịsịrayị́lị̃ drị̂ kí sĩ rá.
39 Aja ụ̃rụ́ꞌbụ̃ sĩ kí drị̃ akujó,
ãzíla ji ĩꞌbaní ãngũ ị́nị́ sĩ ãcí sĩ.
40 Ãꞌị́ kí ĩꞌdidrị́ ĩzá, ãfẽ ĩꞌbaní ãlíꞌboŋá nalé,
ãzíla fẽ ãbírí ĩꞌbadrị̂ ní ukójó mãnã sĩ, ꞌdĩ mũkátĩ angálépi ꞌbụ̃gá rĩ ꞌi.
41 Nzị̃ ándrá ĩꞌbaní írã, ãzíla ị̃yị́ agbẹ́ dó ala gâlé;
ị̃yị̂ dị dó ãngũ kõtórõ rú rĩ agâ sĩ cécé ị̃yị́ dịlépi dị̃-dị̃ rĩ ꞌbã dị̃jó rĩ áni,
42 ãꞌdusĩku agá ándrá tị icíma ĩꞌdiní icílé
ãtíꞌbó ĩꞌdidrị́ Ịbụrahị́mụ̃ be rĩ ꞌbã ị́jọ́ rá.
43 Ají dó ꞌbá ĩꞌdidrị̂ kí ãmvé ꞌdõlé ãyĩkõ trũ,
ꞌbá ĩꞌdi ãni ĩꞌdiní pẽlé pẽpẽ rĩ ngo kí dó úngó ãyĩkõ sĩ.
44 Fẽ dó ãngũ ꞌbá ãzí ꞌbadrị̂ ĩꞌbanî,
ãzíla fẽ ĩꞌbaní ãkónã ꞌbá ãzí ꞌbã kí salé nĩ rĩ kî.
45 Ị́jọ́ ꞌdĩ sĩ ꞌbá ĩꞌdidrị̂ kí dó sĩ ãzị́táŋá ĩꞌdidrị̂ kí tã mba,
ãzíla ị́jọ́ pírí ĩꞌdi ꞌbã ãzị́táŋá fẽjó ꞌbã mba kí kí tã rĩ kí kí tãmba rá.
Ị́cụ́ Úpí ꞌi!