106
Ĩfẽ ãwãꞌdĩfô Úpí ní ãꞌdusĩku ĩꞌdi múké
1 Ĩmi ịcụ́ Úpí ꞌi!
Ĩfẽ ãwãꞌdĩfô ĩꞌdinî, ãꞌdusĩku ĩꞌdi múké,
lẽtáŋá ĩꞌdidrị̂ ĩꞌdi lẽtáŋá mgbã rĩ ꞌi ãzíla jãꞌdâ rĩ ꞌi.
2 Ãꞌdi icó dó ị́jọ́ ãmbogo ãmbogo Úpí ní ngalé rĩ kí vú nzelé rá la nĩ yã,
jõku ãꞌdi icó ĩꞌdi ịcụ́lé calépi rĩ sĩ rá la nĩ yã?
3 ꞌBá ãzị́táŋá ĩꞌdidrị̂ kí tãmbalépi rĩ kí,
ꞌbá ụ́ꞌdụ́ pírí sĩ ị́jọ́ pịrị rĩ ngalépi rĩ kí adru drị̃lẹ́ba rú.
4 Úpí, mí ũrã áma ị́jọ́ ĩndĩ míní lẽtáŋá iꞌda agá ꞌbá mídrị̂ ꞌbanî,
míní kí pa agâ, íꞌbã ma kí agá ĩndĩ.
5 Ífẽ má ịsụ́ málĩ ꞌbá míní pẽlé rĩ ꞌbã kí ịsụ́lé rĩ kí ĩndĩ,
ma dó sĩ adru ĩꞌba abe ãyĩkõ gá,
ãzíla ífẽ má ịcụ́ mi ꞌbá mídrị̂ kí abe ĩndĩ.
6 Ãma idé ị́jọ́ ũnzí cécé ãmã átẹ́pịka ꞌbã kí adrá idélé rĩ áni,
ãma ꞌbá ũnzí ãzíla vâ ũnzĩkãnã idélépi la kî.
7 Ãma áyị́pịka ꞌbã kí ándrá adrujó Mị̃sị́rị̃ gá rĩ sĩ,
ꞌbã kí ándrá ásị́ tálí míní idélé rĩ kí drị̃ gá ku,
ãvĩ kí ándrá ị́jọ́ lẽtáŋá míní kí lẽjó rĩ drị̃ gá rá,
mĩrĩ ika rĩ gá ꞌdãá, gã kí ándrá Úpí ꞌbã tị úmgbé.
8 Wó ípa kí rá sĩ ãrútáŋá rụ́ mídrị̂ drị̂ tã mbajó,
ꞌbã nị̃ kí rú dó sĩ ũkpõ mídrị̂ ꞌi.
9 Uzá dó mĩrĩ Ika rĩ drị̃ gá ãzíla mĩrĩ awa dó sĩ ru ꞌa ị̃rị̃,
ꞌde kí drị̃ mĩrĩ mgbi rĩ agâ sĩ cécé ãngũ ãꞌí kõtórõ agá rĩ áni.
10 Pa kí mẹ́rọ́ꞌbá ĩꞌbadrị̂ kí drị́gá rĩ sĩ rá;
ãzíla unze kí mẹ́rọ́ꞌbá kí drị́ gá rá.
11 Mĩrĩ ꞌbã ị̃yị́ ãgõ vúlé iti mẹ́rọ́ꞌbá ĩꞌbadrị̂ kí mụ̃ꞌdụ̃,
kí ãzí ãlu la pa ru ku.
12 ꞌDã ꞌbã ũngúkú gá, ꞌbá ĩꞌdidrị̂ ãꞌị̃ kí ándrá ị́jọ́ ĩꞌdi ꞌbã azịlé rĩ rá,
ngo kí dó úngó sĩ ĩꞌdi ịcụ́jó.
13 Wó ꞌdã ꞌbã vúlé gá ãvĩ kí ándrá ị́jọ́ ĩꞌdi ꞌbã ngalé rĩ kí mbẽlẽŋá ru
ãzíla nga kí ị́jọ́ ĩꞌdi tị kó ru.
14 Ũlẽ ga dó ándrá kí ꞌa gá kõtórõ gâlé,
rĩ kí dó sĩ Ãdróŋâ ụ̃ꞌbị̃lé kõtórõ agá ꞌdãá.
15 Ị́jọ́ ꞌdĩ sĩ fẽ ĩꞌbaní ãko ĩꞌbã kí aꞌị́lé rĩ kí rá,
wó ají jụ́wẹ̃ ũnzí la ꞌbá kí drị̃ gá.
16 ꞌBá kámbĩ agá ꞌdãá rĩ idé kí Mụ́sã ꞌbaní Ãrọ́nị̃ be ãjã sĩ,
ꞌbání kí ꞌbãjó ndú Úpí ní rĩ sĩ.
17 Vũ nzị̃ dó sĩ ru tị mgbọ ãzíla ti Dátãnĩ rá;
ãzíla ị̃sị̃ vâ Ãbị̃rámụ̃ kí ꞌbá ũꞌbí kí abe.
18 Ãcí aꞌdé ándrá ꞌbá kí vú bĩlépi rĩ kí drị̃ gá,
ãcí idraká tị ivé ándrá ꞌbá ũnzí rĩ kí kícíkící.
19 ꞌBá idé kí ándrá kãjóŋá ꞌbé Hõrébũ gá ꞌdãá
ãzíla ị̃nzị̃ kí ándrá ãdróŋá íꞌdá ru idélé gólũdĩ sĩ rĩ.
20 Uja kí ándrá dị̃zã Ãdróŋá ĩꞌbadrị́ gá rĩ drị̂,
íꞌdá mọ́nị̃gọ́ drị́ ãzíla ãnãkpá ị̃rẹ́bị́ nalépi rĩ ꞌba drị̂ kí sĩ.
21 Ãvĩ kí ị́jọ́ Ãdróŋá kí palépi,
ị́jọ́ ãmbogo ãmbogo kí idélépi Mị̃sị́rị̃ gá,
22 tálí idélépi ãngũ Hámũ drị̂gá,
ãzíla ị́jọ́ ụ̃sụ̃táŋá ru rĩ kí idélépi mĩrĩ Ika rĩ gá rĩ drị̃ gá rá.
23 Ị́jọ́ ꞌdĩ sĩ Ãdróŋá jọ ándrá dó sĩ, “Ma mụ kí ị̃lị̃kị̃lé rá
ꞌbá ĩꞌdiní pẽlé pẽpẽ Mụ́sã
drĩ ájẹ́ pá tu agá kí drĩdríŋĩ gá Má be
sĩ mãmálá ꞌbãjó ũmbã Mání lẽjó kí ị̃lị̃kị̃jó rĩ atrijó ku rĩ gá.”
24 ꞌBá ꞌdĩ gã kí ándrá dó filé ãngũ ũnĩ-ambamba ꞌdã gâlé úmgbé,
ãꞌdusĩku ãꞌị̃ kí ándrá ị́jọ́ Ãdróŋá ꞌbã azịlé rĩ ku.
25 Unu kí ĩꞌbadrị́ hémã agâlé
ãzíla gã kí Úpí ꞌbã tị arelé úmgbé.
26 Ị́jọ́ ꞌdĩ sĩ Ãdróŋá na dó ándrá ũyõ jọ, ãndá ãndá ru
ꞌI mụ kí ụꞌdị́lé ãngũ kõtórõ rú rĩ agâlé rá,
27 ãzíla ꞌI mụ anzị ĩꞌbadrị́ mụlé tịlé drị̃lẹ́ gâlé rĩ kí iré sụ́rụ́ ãzí kí agá,
ãzíla ꞌI kí dro ãmị́yọ́ŋá ãngũ gá.
28 ꞌDã ꞌbã ũngúkú gá, Pẹ̃yọ́rị̃ gá ꞌdãá, ꞌbá Ãdróŋá drị̂ fi kí dó Bãálĩ ị̃nzị̃ŋá gá,
ãzíla na kí íná fẽlé ídétáŋá ru ãdroŋa ídri kọ́lị rĩ ꞌbaní rĩ kí,
29 inga kí Úpí ꞌbã ũmbã ị́jọ́ ũnzí ĩꞌbaní idélé rĩ kí sĩ,
ãzíla jụ́wẹ̃ aꞌdé dó kí drị̃ gá.
30 Wó Fẽnásĩ tu dó pá ụrụgá ãzíla fẽ dó ꞌbá ịsụ́lé ị́jọ́ ũnzí trũ rĩ ꞌbání drị̃rịma rá,
Ãdróŋá atrị dó sĩ jụ́wẹ̃ ꞌdã rá.
31 Ị́jọ́ ꞌdĩ sĩ úlã dó ĩꞌdi ꞌbá ãlá la ru
iꞌdójó sáwã ꞌdã sĩ mụjó drị̃ gá ãsị̃ŋá kóru.
32 Ị̃yị́ Mẹ̃rị́bã drị̂gá ꞌdãá iza kí ándrá Úpí ꞌbã ásị́, fẽ kí dó sĩ Úpí uꞌá dó ũmbã sĩ,
ị́jọ́ ꞌdã ají dó Mụ́sã ní ũcõgõ ãmbógó la.
33 Iza kí Músã ásị́,
Músã mụ dó sĩ ị́jọ́ ujọ́ trũ aza rú.
34 Úpí fẽ ándrá ãzị́táŋá ꞌbá Ịsịrayị́lị̃ drị̂ ꞌbaní sĩ ꞌbá sụ́rụ́ Kãnánĩ gá ꞌdãá rĩ gá rĩ kí ụꞌdị́jó rá,
wó ụꞌdị́ kí kí ĩꞌdi ꞌbã jọlé ĩꞌbaní rĩ áni ku.
35 Kẹ̃jị́ la gá ri kí ru ĩgbãlé ꞌbá Ãdróŋá nị̃lépi ku rĩ kí abe
ãzíla andré kí dó sĩ lãꞌbĩ ĩꞌbadrị́ ũnzíkãnã ꞌdã kî.
36 Ị̃nzị̃ kí ãdroŋa ĩꞌbãni ĩnzõ rú rĩ kí,
fẽ dó sĩ kí ũdrãjó.
37 Fẽ kí anzị ĩꞌbadrị̂ kí izonzi kí abe ídétáŋá ru
úríndí ũnzí ꞌbanî.
38 Asu kí ꞌbá ị́jọ́ kọ́lị rĩ kí ꞌbã ãrí,
ãrí anzị ãzíla izonzi ĩꞌbadrị̂ ꞌbadrị̂ kí,
ꞌbá uꞌdị́ŋá ga ãngũ Kãnánĩ drị̂ gá tre,
ãzíla ãngũ izaru ãrí ĩꞌbadrị̂ sĩ.
39 Andị́ kí ándrá ru ị́jọ́ ĩꞌbaní idélé ũnzí rĩ kí sĩ rá
ị̃nzị̃ kí ándrá ãdroŋa ndú la kí áyụ.
40 Ị́jọ́ ꞌdĩ sĩ Úpí acá dó ũmbã sĩ ꞌbá ĩꞌdidrị̂ ꞌbaní,
ãzíla gá dó sĩ ꞌbá ĩꞌdi ãmgbã rĩ kí úmgbé.
41 Fẽ dó sĩ kí sụ́rụ́ Ãdróŋâ nị̃lépi ku rĩ kí drị́ gá,
ãzíla mẹ́rọ́ꞌbá ĩꞌbadrị̂ ri kí dó sĩ ũpĩ nalé nĩ.
42 Mẹ́rọ́ꞌbá ĩꞌbadrị̂ ĩkpã kí kî
ãzíla acá kí dó sĩ kí pálégá.
43 Pá alé wẽwẽ rú Úpí ri kí apálé,
wó ri kí mvulé ĩꞌdi rụ́ ꞌdãá rá
ãzíla ri kí dó sĩ filé ị́jọ́ ũnzí gá ị̃dị́-ị̃dị́.
44 Wó tí Úpí are kí rá ĩꞌbaní awá agá ĩꞌdi rụ́,
ꞌbã dó ásị́ ĩꞌbã áwáŋá drị̃ gá rá.
45 Tị icíma ĩꞌdidrị́ ĩꞌba abe rĩ ꞌbã ị́jọ́ agá ándrá dó ĩꞌdiní rá
ãzíla lẽtáŋá ĩꞌdidrị́ ãmbógó rĩ sĩ uja ru ásị́ rá.
46 Fẽ ꞌbá kí ĩkpãlépi rĩ ꞌbaní
kí tãmbajó ásị́ ị̃gbẹ̃ sĩ.
47 Ípa ãma, Úpí, Ãdróŋá ãmadrị̂,
sụ́rụ́ ãzí ꞌdã kí agâlé rĩ sĩ mí uja ãma vúlé,
ãma dó sĩ ãwãꞌdĩfô fẽ míní,
ãzíla ãma dó sĩ rụ́ mídrị́ ãlá rĩ ịcụ́ ãyĩkõ sĩ fô.
48 Ị́cụ́ kí Úpí, Ãdróŋá Ịsịrayị́lị̃ drị̂ ꞌi,
ị́cụ́ ĩꞌdi ãndrũ ãzíla ãsị̃ŋá kóru.
Lẽ ꞌbá pírí ꞌbã jọ kí “Ámĩnã”
Ícụ́ Úpí, ꞌI!