109
Ununuŋá ꞌbá ị́jọ́ ꞌbã ịsụ́lé rĩ drị̂
1 Ãdróŋá ma ími ịcụ́,
mí ĩyãŋã jõ mání tú ku fô.
2 ꞌBá ũnzí rĩ kí ꞌbá ĩnzó ꞌbá rĩ kí abe
kí ị́jọ́ jọ áma ụrụꞌbá gá,
kí ĩnzõ ũtrã áma ụrụꞌbá gá tị ĩꞌbadrị̂ sĩ.
3 Ce kí áma andre trộkị́lịrị kí ị́jọ́ ꞌbá ngụ̃jó ũnzí rĩ kí jọ
kí áma ụ̃ndrụ̃ ị́jọ́ ífí kó ru.
4 Álẽ kí rá ãzíla ma ĩꞌbaní Ãdróŋá zị,
wó kí kẹ̃jị́ la gá áma tõ áyụ.
5 Ma mũkẽ idé ĩꞌbaní, wó kí áma ũfẽ ị́jọ́ ũnzí sĩ
álẽ kí ambamba, wó ngụ̃ kí ma ũnzí.
6 Ípẽ ꞌbá ãzí ũnzí la sĩ ãgátã gajó ĩꞌdi be,
ífẽ mẹ́rọ́ꞌbá ĩꞌdidrị̂ ꞌbã tõ ĩꞌdi nĩ.
7 Údrĩ ị́jọ́ lị drị̃ la gá, lẽ ị́jọ́ ꞌbã rụ ĩꞌdi rá,
Ãdróŋá ĩꞌdiní zịlé rĩ ꞌbã adru ị́jọ́ ũnzí la rú.
8 Lẽ ụ́ꞌdụ́ ĩꞌdidrị̂ ꞌbã adru kí were rú,
Lẽ ꞌbá ãzí ꞌbã ꞌdụ drĩ vâ ãmbõgõ ĩꞌdidrị̂ nĩ.
9 Ífẽ anzịŋá ĩꞌdidrị̂ ꞌba acá kí drĩ vâ ĩmvú ru,
ãzíla ũkú ĩꞌdidrị̂ ꞌba acá drĩ vâ ãwụ́zị́ ru.
10 Ífẽ anzịŋá ĩꞌdidrị̂ ꞌba acá kí lị́cọ́ kóru ꞌbá ãko aꞌị́lépi la kí,
mí andi lị́cọ́ ĩꞌbadrị̂ kí rá ãzíla ídro kí ala gá ꞌdãá rá.
11 Ífẽ ꞌbá ĩꞌdiní dẹ́nọ̃ fẽlépi rĩ ꞌbã ꞌdụ kí ãko ĩꞌdidrị̂ kí pírí,
ãzíla ífẽ ãmị́yọ́ŋá ꞌbã ꞌdụ kí ãko ĩꞌdiní ãzị ngalé rĩ kí nĩ.
12 Ífẽ ꞌbá ãzí ãlu la ꞌba iꞌda ĩꞌdiní ásị́ ị̃gbẹ̃ ku,
ífẽ ꞌbá ãzí ꞌba iꞌda ásị́ ị̃gbẹ̃ ĩmvú anzị ĩꞌdiní aꞌbelé rĩ ꞌbaní ku.
13 Ma ími zị sĩ anzị ĩꞌdi ꞌbã drị̃lẹ́ ru ri kí fẽjó ũdrãjó pírí,
ífẽ anzị ĩꞌdi ꞌbã drị̃lẹ́ ru rĩ ũdrã kí pírí ꞌbá ãzí agá ị́jọ́ ĩꞌdi drị̃ gá ị̃dị́ ku.
14 Lẽ Úpí ꞌba agá ị́jọ́ ũnzí ĩꞌdi ꞌbã áyị́pịka ꞌbadrị̂ kí,
ãzíla lẽ ꞌba trũ ị́jọ́ ũnzí ĩꞌdi ꞌbã ãndrẽ drị̂ kí ku.
15 Lẽ Úpí ꞌba agá ị́jọ́ ũnzí ĩꞌbadrị̂ kí ụ́ꞌdụ́ pírí sĩ,
ãzíla ꞌbá ꞌbã ãvĩ kí ị́jọ́ lị́cọ́ ĩꞌbadrị̂ kí drĩ gá ụ̃nọ́kụ́ drị̃ gá ꞌdâ rá,
16 ãꞌdusĩku abị́ ásị́ ị̃gbẹ̃ iꞌdalé gẹ̃rị̃ sĩ ku;
ri ꞌbá lẽmẽrí, ꞌbá ãzãkoma lẽlépi, ãzíla ꞌbá ĩꞌbã ꞌbá ãzí ãzãkoma fẽlépi la ꞌbã sĩ adrujó yụ rĩ kí,
ĩkpãlé ãzíla uꞌdị́lé.
17 Lẽ ru áwãtáŋá sĩ
lẽ wãŋá lékõ ꞌbã bĩ ĩꞌdi vú,
ngụ̃ sụ̃sụ́ wiŋá ũnzí
lẽ ꞌbá ãzí ꞌbã wi ĩꞌdiní sụ̃sụ́ ku.
18 Sụ̃ áwãtáŋá ĩꞌdi ụrụꞌbá gá cécé bõngó áni,
áwãtáŋá la dị ĩꞌdi ụrụꞌbá gá cécé ị̃yị́ áni
ãzíla áwãtáŋá ufí ĩfãkã la gá cécé ãdu áni.
19 Lẽ áwãtáŋá ꞌbã ãgõ kí ĩꞌdi akulé cécé bõngó áni,
ãzíla lẽ ꞌbã sụ̃ kí ĩꞌdi ụ́pị́cẹ́ gá cécé sẹ́rị̃ áni.
20 Úpí, lẽ ị́jọ́ ꞌdĩ ꞌba adru ị́jọ́ míní sĩ ꞌbá áma tõlépi ri kí ũfẽjó
ꞌbá ị́jọ́ ũnzí jọlépi áma ụrụꞌbá gá rĩ kí abe rĩ ꞌi.
21 Wó Úpí Ũkpó ꞌDị́pị,
ípa ma rụ́ mídrị̂ ꞌbã ị́jọ́ sĩ,
lẽtáŋá mídrị́ ãmbógó rĩ sĩ, ípa ma míní adrujó múké rĩ sĩ,
22 ãꞌdusĩku ma ꞌbá lẽmẽrí la ãzíla álẽ mání ãzãkoma rá,
áma ásị́ la dó sĩ azá agá agá ru.
23 Ma úgólé ãvĩlé cécé índríléndri ị̃tọ́lọŋá sĩ rĩ áni,
ma cécé nzénzéŋá ãlụ́kụ́kụ̃ ꞌbã ꞌdụlé ꞌdụ̃-ꞌdụ rĩ áni.
24 Áma ãja aco kí dó ru rá mání ĩsãyĩmũjó rĩ sĩ,
áma íní ace kí lú ru ĩfãkã be nĩ.
25 ꞌBá drĩ kí áma ndre, kí áma gụgụ̃,
kí ru drị̃ aya mâsĩ aya-ayâ.
26 Úpí Ãdróŋá mádrị̂, íko áma ãzã fô!
Ípa ma lẽtáŋá mídrị́ ãmbógó rĩ sĩ!
27 Ífẽ mẹ́rọ́ꞌbá mádrị̂ ꞌbã nị̃ kí rá
mi Úpí áma palépi rĩ ꞌi!
28 Kí áma wã rá, wó mi mání sụ̃sụ́ wi rá,
Kí angá ãꞌdị́ ꞌdịlé má be, mi ĩꞌbaní drị̃nzá fẽ rá,
wó ãtíꞌbó mídrị̂ la uꞌá ãyĩkõ sĩ.
29 Ífẽ ꞌbá áma tõlépi rĩ ꞌba ịsụ́ kí drị̃nzá,
lẽ ꞌbã sụ̃ kí drị̃nzá ụrụꞌbá gá jũrũ cécé kánzũ áni.
30 Ma Úpí ní ãwãꞌdĩfô fẽ ụ́ꞌdụ́kọ́ mgbọ sĩ;
má ĩꞌdi rụ́ ịcụ́ ãngũ ũꞌbí ꞌbã kí sĩ ru trajó rĩ agá,
31 ãꞌdusĩku ĩꞌdiní ꞌbá lẽmẽrí ri kí ũngúkú ãtị̃jó rĩ sĩ,
ĩꞌdi ꞌbá ꞌbá sĩ kí pajó ꞌbá ị́jọ́ lịlépi kí drị̃ gá ri kí drị́gá.