108
Ãdróŋá zịjó ꞌbã ko ãma ãzã mẹ́rọ́ꞌbá kí ị́jọ́ sĩ
1 Ãdróŋá, áma ásị́ tu pá ũkpó ru!
Ma úngó ngo ãzíla ma ími ịcụ́ ásị́ pírí sĩ!
2 Mí angá ãngũ sãrã sĩ ãꞌdụ́ngụ́ colé ụ̃ꞌdị́ be!
Ma dó sĩ angá úngó ngolé!
3 Úpí, ma mụ míní ãwãꞌdĩfô fẽlé ꞌbá kí drị̃lẹ́ gá,
ma mụ úngó ngolé sĩ ími ịcụ́jó sụ́rụ́ kí drĩdríŋĩ gá,
4 ãꞌdusĩku lẽtáŋá mídrị́ jãꞌdâ rĩ alị ꞌbụ̃ kí agâ sĩ cákáꞌdá,
ị́jọ́ mgbã mídrị̂ ca kpere ụ̃rụ́ꞌbụ̃ ꞌba rụ̂lé.
5 Ãdróŋá, mi ꞌda ãmbõgõ mídrị̂ ꞌbụ̃ agâ ꞌda,
ãzíla dị̃zã mídrị̂ ꞌbã adru ụ̃nọ́kụ́ drị̃ gá ꞌdâ pírí.
6 Ípa ãma ãzíla íko ãma ãzã ũkpó mídrị̂ sĩ, mí umvi zịtáŋá ãmadrị̂ kî,
ị́jọ́ ꞌdĩ sĩ ꞌbá mí ãni míní lẽlé rĩ kí dó sĩ patáŋá ịsụ́.
7 Ãdróŋá ajọ́ ị́jọ́ angájó ãngũ ĩꞌdidrị́ ãlá rĩ gâlé
“Ma Sẹ̃kẹ́mụ̃ awa ãyĩkõ sĩ. Ma áꞌbụ ꞌa Sụ̃kọ́tị̃ drị̂ awa ꞌbá mádrị̂ ꞌbanî.
8 Gị̃lẹ́dị̃ mâ ni ãzíla Mãnásẽ vâ mâ ni,
Ịfụrayị́mụ̃ ĩꞌdi kõfíyã mádrị̂ ꞌi,
ãzíla Yụ́dã ĩꞌdi túré mádrị́ ũpĩ ãrĩ.
9 Wó Mụ̃wábụ̃ ĩꞌdi Kãláyã mádrị́ mání sĩ áma ũjĩjó rĩ ꞌi,
ma mụ ãko mádrị́ pá gá ri kí trũlé Ídõmũ gá.
Ma uzá ãyĩkõ sĩ mání ꞌbá Fị̃lị̃sị̃tị́nị̃ drị̂ kí ndẽjó rĩ sĩ.”
10 Ãdróŋá, ãꞌdi la dó mání áma agụ táwụ̃nị̃ andre celé bõrõ ũkpó sĩ rĩ gâlé nĩ yã?
Ãꞌdi la mání áma fẽ Ídõmũ ndẽlé nĩ yã?
11 Ãdróŋá, ãndá-ãndá ru ígã dó ãma úmgbé yã?
Mí icó dó mụlé ãꞌdị́gá ãsĩkárĩ ãmadrị̂ kí abe ku yã?
12 Íko ãma ãzã mẹ́rọ́ꞌbá kí ị́jọ́ sĩ,
ãꞌdusĩku ãzãkoma angálépi ꞌbá ꞌbá ru rĩ drị́ rĩ ĩꞌdi ãzị̂kó ru.
13 Ãzãkoma Ãdróŋá drị̂ sĩ, ãma ãꞌdị́ ndẽ rá;
ĩꞌdi mẹ́rọ́ꞌbá ãmadrị̂ kí ndẽ rá.