11
Ásị́ tị̃jó Úpî drị̃ gá
1 Úpí ĩꞌdi ꞌbá mání sĩ apájó áma zị̃jó ĩꞌdi rụ́ rĩ ꞌi;
ĩmi icó dó sĩ jọlé la mání,
“Ínga apálé ãríŋá áni ꞌbé agâlé íngoní ru,
2 ãꞌdusĩku ꞌbá ũnzí rĩ ꞌbã kí ꞌé ụ́sụ ĩbá tị gá
ãzíla ãnzã kí ụ́sụ ꞌbo,
sĩ ꞌbá ị́jọ́ pịrị trũ ásị́ gá rĩ gbẹjó ị́nị́ sĩ,
3 Ãzị́táŋá pírí drĩ kí ru iza rá,
ị́jọ́ ãzí ꞌbá ãlá rĩ ꞌba kí icólé idélé la cí yã?”
4 Úpí ĩꞌdi jó ĩꞌdidrị́ ãlá rĩ agá;
ĩꞌdĩ ꞌbã úmvúke ꞌbụ̃ gâlé ꞌdã;
ĩꞌdi ꞌbá kí undré ãngũ pírí kí agá,
ãzíla nị̃ ị́jọ́ ĩꞌbã kí idélé rĩ kí pírí rá.
5 Úpí la ꞌbá mgbã rĩ kí ụ̃ꞌbị̃,
wó ngụ̃ ꞌbá ãgọ̃bị̃ ndrụ̃lépi rĩ kí ũnzí.
6 Ĩꞌdi ꞌbá ũnzí rĩ kí drị̃ gá,
ãcí kúlú kí fẽ ꞌdịlé bãrụ́tị̃ be,
ĩꞌdi ĩꞌbaní drị̃rịma fẽ ãlụ́kụ́kụ̃ ãcí rĩ sĩ.
7 Úpí ĩꞌdi ꞌbá ị́jọ́ mgbã ngalépi rĩ ꞌi,
lẽ ị́jọ́ ngalé ãlá rĩ kî;
ꞌbá ị́jọ́ múké rĩ ngalépi rĩ kí amụ́ ĩꞌdi drị̃lẹ́ gá rá.