12
ꞌBá ãꞌị̃táŋá trũ rĩ ukó kí dó rá
1 Íko ãma ãzã Úpí, ãꞌdusĩku ꞌbá ãzí múké acelépi la dó ꞌdáyụ;
ꞌbá ãꞌị̃táŋá trũ rĩ ukó kí ũꞌbí kí agá pírí rá.
2 ꞌBá pírí kí ĩnzõ alị́ ĩꞌbã jĩránĩ ꞌbaní;
kí pírí ị́jọ́ jọ tị ũré sĩ ãzíla ásị́ ị̃rị̃ sĩ.
3 Úpí, mí ụ̃pị̃ ꞌbá ị́jọ́ jọlépi tị ũré sĩ rĩ kí tị
ĩdra ãfó ru rĩ kí abe cí,
4 mí ụ̃pị̃ ꞌbá jọlẹ́pi la, “Ị́jọ́ ãmaní jọlé rĩ la ãma fẽ adrulé ũkpó trũ,
ãma ị́jọ́ cí ãmaní lẽlé jọlé rĩ jọ rá, ãꞌdi la ãma atrị nĩ yã rĩ kí tị cí.”
5 Úpí jọ, ĩkpãŋá ꞌbá ũkpó kóru rĩ kí ĩkpãjó rĩ sĩ
ãzíla ununuŋá ꞌbá ãzãkoma lẽlépi rĩ ꞌbã kí unujó rĩ sĩ,
Ma dó angá rá,
ma dó sĩ ꞌbá ĩcõcõŋãlé rĩ kí tãmba ãngũ ũcõgõ kóru rĩ gá.
6 Ị́jọ́ Úpí ꞌbã azịlé ri kí ꞌbãngá ãlá ru;
cécé sílĩvã ũꞌbĩjó ãcí fúrúnũ gá rĩ sĩ
pâlé ázị̂rị̃ rĩ áni.
7 Úpí, mi ãma tãmba rá,
mi ãma tãmba ꞌbá ũnzí rĩ kí sĩ jãꞌdâ.
8 ꞌBá ũnzí rĩ kí ãngũ pírí agá,
ꞌbá pírí kí ị́jọ́ ũnzí rĩ ịpị́-ịpị̂ ũꞌbí kí drĩdríŋĩ gá.