111
Ãdróŋá ịcụ́jó mũkẽ ĩꞌdidrị̂ sĩ rĩ
1 Ĩmi ịcụ́ Úpí ꞌi!
Ma ãwãꞌdĩfô fẽ Úpí ní áma ásị́ pírí sĩ,
ãngũ ꞌbá ĩꞌdidrị́ ãlá rĩ ꞌbaní ru trajó rĩ gá.
2 Ị́jọ́ Úpí míní idélé rĩ kí ụ̃sụ̃táŋá ru,
ꞌbá pírí ásị́ ꞌbãlépi kí drị̃ gá rĩ kí kí vã rá.
3 Ị́jọ́ ĩꞌdi ꞌbã idélé rĩ kí pírí ãrútáŋá ãzíla dị̃zã ĩꞌdidrị̂ iꞌda,
mũkẽ ĩꞌdidrị̂ la adru jãꞌdâ.
4 Úpí fẽ ꞌbání ị́jọ́ ụ̃sụ̃táŋá ru ĩꞌdi ꞌbã idélé rĩ kí agájó rá,
Úpí ãmadrị̂ ꞌbã ásị́ ị̃gbẹ́ ru!
5 Ĩꞌdi ãkónã fẽ ꞌbá ãrútáŋá fẽlépi ĩꞌdiní rĩ ꞌbanî,
ĩꞌdi tị icíma ĩꞌdidrị̂ ị́jọ́ agá jãꞌdâ.
6 Iꞌda ũkpõ ĩꞌdidrị̂ ꞌbá ĩꞌdidrị̂ ꞌbaní,
ĩꞌdiní ãngũ sụ́rụ́ ãzí ꞌbadrị̂ kí fẽjó ĩꞌbaní rĩ sĩ.
7 Ãzị́ ĩꞌdi ꞌbã ngalé rĩ kí ĩꞌdi kí nga ị́jọ́ mgbã sĩ ãzíla ị́jọ́ pịrị rĩ sĩ,
ãzị́táŋá ĩꞌdidrị̂ kí drị̃ gá pírí ála ásị́ ꞌbã rá.
8 Ãzị́táŋá ĩꞌdidrị̂ kí ꞌbã ngá sáwã pírí sĩ adru cí,
ãzíla fẽ kí ị́jọ́ kpị ãzíla mgbã rĩ kí sĩ.
9 Trũ ị́jọ́ ũnzí ꞌbá ĩꞌdidrị̂ ꞌbadrị̂ kí rá,
ãzíla idé tị icíma ukólépi ku rĩ ĩꞌba abe.
Ĩꞌdi Ãlápítítí ru ãzíla Ũkpó ru.
10 Úpí ní ãrútáŋá fẽjó rĩ ĩꞌdi ũndũwá ꞌbã iꞌdóŋá
ĩꞌdi ị́jọ́ lịŋá pịrị rĩ fẽ ꞌbá pírí ãzị́táŋá ĩꞌdidrị̂ kí ãꞌị̃lépi rá rĩ ꞌbanî.
Lẽ ícụ́ ĩꞌdi jãꞌdâ.