112
ꞌBá Ãdróŋá rulépi rĩ kí adru ũkpó ru jãꞌdâ
1 Ĩmi ịcụ́ Úpí ꞌi!
ꞌBá Úpí ní ãrútáŋá fẽlépi,
ãzíla ãzị́táŋá ĩꞌdidrị̂ kí vú ũbĩlépi rá rĩ la adru ãyĩkõ agá.
2 ꞌBá múké rĩ ꞌbã anzị kí adru ũkpó trũ ụ̃nọ́kụ́ gá ꞌdâ,
anzị ĩꞌdidrị̂ kí adru drị̃lẹ́ba rú.
3 ꞌBá ĩꞌdidrị̂ kí adru kápa trũ ãzíla málĩ trũ,
ị́jọ́ mgbã ĩꞌbadrị̂ kí adru jãꞌdâ.
4 Ị́nị́ sĩ dị̃zã la dị̃ ꞌbá múké rĩ ꞌbaní,
ĩꞌdi ásị́ ị̃gbẹ́ ru, ị́jọ́ múké rĩ ga kí ásị́ la gá ị́jọ́ pịrị rĩ be tré.
5 ꞌBá bĩsírã ngalépi ásị́ pịrị sĩ rĩ ꞌi,
ĩꞌdi séndẽ fẽ ꞌbá ꞌbaní mọ̃rị́ ru ásị́ mgbã sĩ rĩ la adru drị̃lẹ́ba rú.
6 ꞌBá múké rĩ ꞌbã ị́jọ́ icó ãvĩlé ku,
ála rĩ ĩꞌdi ị́jọ́ igálé jãꞌdâ.
7 Icó idélé ụ̃rị̃ sĩ ị́jọ́ akụ́lépi ũnzí rĩ kí sĩ ku,
ãꞌị̃táŋá ĩꞌdidrị̂ la pá tu ũkpó ru ãzíla ĩꞌdi ásị́ ꞌbã Úpí drị̃ gá.
8 Ásị́ lã icó umvúlé jõku icó idélé ụ̃rị̃ sĩ ku,
kpere ĩꞌdiní ndre agá la mẹ́rọ́ꞌbá ĩꞌdidrị̂ ꞌbaní ị̃lị̃kị̃ agá rá.
9 Ĩꞌdi ãko fẽ ꞌbá ãko kóru rĩ ꞌbaní ásị́ pírí sĩ,
ásị́ ị̃gbẹ̃ ĩꞌdidrị̂ icó ukólé ku,
ĩꞌdi adru ꞌbá ũkpó la ãzíla ála ĩꞌdiní ãrútáŋá fẽ rá.
10 ꞌBá ũnzí rĩ drĩ kí ị́jọ́ ĩꞌdi ꞌbã idélé rĩ kí ndre ꞌbo, kí acá ũmbã sĩ,
kí trị́trị́ na ãzíla kí ãvĩ rá,
ásị́ ꞌbãŋá ĩꞌbadrị̂ la ukó kpítã rá.