116
Ãwãꞌdĩfô fẽjó Ãdróŋá ní ĩꞌdiní ꞌbá pajó drã agá rĩ sĩ
1 Álẽ Úpî rá, ãꞌdusĩku are ma mání ĩꞌdi umve agá,
umvi ị́jọ́ mání zịlé ĩꞌdi tị gá rĩ rá.
2 Sáwã pírí sĩ mání ĩꞌdi zị agâ,
Ĩꞌdi áma tị are rá.
3 Ĩbáká drã drị̂ ce ma ágágá,
ãzá drãjó ꞌbụ́gá rĩ rụ ma rá,
má ịsụ́ ũcõgõ ãzíla ụ̃rị̃ rụ dó ma rá.
4 ꞌDã ꞌbã ũngúkú gá, má umve dó rụ́ Úpí drị̂,
“Úpí, má aꞌị́ mi, ípa mání ma fô!”
5 Úpí ꞌbã ásị́ ị̃gbẹ́ ru ãzíla ãlá ru,
Ãdróŋá ãmadrị̂ ꞌbã ásị́ ndrĩ ãmaní rá.
6 Úpí la ꞌbá ũkpõ kóru rĩ kí tãmba rá,
mání ándrá adrujó drã sị́gá rĩ sĩ, pa ma rá.
7 Ásị́ mádrị̂, mí adru ũkpó ru
ãꞌdusĩku Úpí ri adrulé má be múké.
8 Úpí pa ma drã agá rá,
fẽ áma mị́ndrẹ ní ụngụ́jó rá
ãzíla mba áma tã mání sĩ aꞌdéjó ku.
9 Ị́jọ́ ꞌdĩ sĩ ma dó acị́ Úpí drị̃lẹ́ gá,
ãngũ ꞌbá ídri rĩ ꞌbadrị̂ agá.
10 Má ãꞌị̃ mi rá ị́jọ́ ꞌdĩ sĩ ájọ dó sĩ míní,
“Îkpã dó ma ambamba.”
11 Mání táni uꞌá gá ụ̃rị̃ sĩ rá tí ájọ,
“ꞌBá ãzí sĩ icójó ásị́ ꞌbãjó drị̃ la gá rá la ꞌdáyụ.”
12 Ma dó Úpí ní ãꞌdu fẽ
mũkẽ pírí ĩꞌdiní idélé mání rĩ kî sĩ?
13 Ma Úpí ní wáyĩnĩ ají fẽlé fẽtáŋá ru,
sĩ ĩꞌdiní ãwãꞌdĩfô fẽjó ĩꞌdiní áma pajó rĩ sĩ.
14 Ma ũyõ mání nalé rĩ kí ꞌbã ị́jọ́ idé Úpí ní rá,
ma kí idé ꞌbá ĩꞌdidrị̂ kí drị̃lẹ́ gá pírí.
15 ꞌBá ãlá rĩ kí Úpí ní ãko ãjẹ̃ rú rĩ áni,
ĩꞌbã ãzí ãlu la drĩ drã ꞌbo ĩꞌdi Úpí ásị́ gá ũcõgõ ají ndẽ rá.
16 Úpí, ma ãtíꞌbó mídrị̂ ꞌi,
ãtíꞌbó mídrị́ ũkú ru rĩ ꞌbã ngọ́pị ꞌi.
Ítrũ ma ị́jọ́ áma umbélépi rĩ kí agá ꞌbo.
17 Ma ídétáŋá ãwãꞌdĩfô rú rĩ idé mínî,
ãzíla ma dó rụ́ Úpí drị̂ umve.
18 Ma ũyõ mání sõlé Úpí ní rĩ tã mba rá,
ꞌbá pírí ĩꞌdidrị̂ kí drị̃lẹ́ gá ma kí idé rá.
19 Ĩmi ꞌbá Yẹ̃rụ́sãlẹ́mụ̃ gá ꞌdĩ,
Ĩmi ịcụ́ Úpí ꞌi
Lị́cọ́ ꞌa Jó Úpí drị̂ andregá.