115
Ãdróŋá mgbã rĩ lú ãlu
1 Dị̃zã ꞌba adru ãmaní ku Úpí, ꞌbã adru ãmaní ku,
ꞌbã adru lú rụ́ mídrị̂ ní áꞌdụ̂sĩ,
ãꞌdusĩku lẽtáŋá mídrị̂ ukó ku ãzíla ími ásị́ ị̃gbẹ́ ru.
2 Sụ́rụ́ kí ị́jọ́ zị,
“Ãdróŋá ĩꞌbadrị̂ íngõlé la ãꞌdusĩ yã?”
3 Ãdróŋá ãmadrị̂ gá ꞌbụ̃ gâlé ꞌdã,
ĩꞌdi ị́jọ́ ĩꞌdiní lẽlé rĩ idé cécé ĩꞌdiní lẽlé rĩ áni.
4 Ãdroŋa ĩꞌbadrị̂ kí ãdroŋa idélé gólũdĩ sĩ ãzíla sílĩvã sĩ rĩ kî
ꞌbá ꞌbã kí idélé drị́ sĩ nĩ rĩ kî.
5 Kí tị trũ, wó jọ kí ị́jọ́ ku,
kí mịfị́ trũ wó ndre kí ãngũ ku.
6 Kí bị́lẹ́ trũ wó icó kí ị́jọ́ arelé ku,
kí ũmvu trũ wó icó kí ãko ãzí ãjị́ ngụ̃lé ku.
7 Kí drị́ trũ wó icó kí ị́jọ́ ngalé kí drị́ sĩ ku,
kí pá trũ wó icó kí acị́lé ku,
icó kí ị́jọ́ jọlé ụ́ꞌdụ́kọ́ sĩ ku.
8 Lẽ ꞌbá ãdroŋa ꞌdĩ áni rĩ kí idélépi rĩ ꞌbã adru kí ũkpó kóru,
ãzíla ꞌbá ásị́ ꞌbãlépi kí drị̃ gá rĩ ꞌbã adru kí vâ ũkpó kóru.
9 Ịsịrayị́lị̃, ĩꞌbã ĩmi ásị́ Úpí drị̃ gá,
ĩꞌdi ĩmi ãzãko ãzíla ĩꞌdi ĩmi tã mba nĩ.
10 Ĩmi ãtalo Ãrọ́nị̃ drị́ jó gá ꞌdĩ, ĩꞌbã ĩmi ásị́ Úpî drị̃ gá
ĩꞌdi ꞌbá ĩmi ãzãkolépi ãzíla ĩmi tãmbalépi nĩ rĩ ꞌi.
11 Ĩmi ꞌbá Úpí ụ̃rị̃lépi ꞌdĩ, ĩꞌbã ĩmi ásị́ ĩꞌdi drị̃ gá,
ĩꞌdi ꞌbá ĩmi ãzãkolépi ãzíla ĩmi tãmbalépi nĩ rĩ ꞌi.
12 Úpí igá ãma ị́jọ́ ꞌbo ãzíla ĩꞌdi ãmaní sụ̃sụ́ wi rá,
ĩꞌdi Ịsịrayị́lị̃ ní sụ̃sụ́ wi rá,
ĩꞌdi sụ̃sụ́ wi lị́cọ́ Ãrọ́nị̃ drị̂ ní rá.
13 Úpí la ꞌbá ĩꞌdiní ãrútáŋá fẽlépi rĩ ꞌbaní sụ̃sụ́ wi rá,
ꞌbá ãmbógó rú rĩ kí ꞌbá adrulépi ãmbógó ru ku rĩ kí abe.
14 Úpí ꞌbã fẽ ĩminí tịlé ãzíla kpẹ̃lé kpẹ̃kpẹ̃,
ĩmi ꞌi ãzíla anzị ĩmidrị̂ kí abe.
15 Úpí ꞌbụ̃ kí ꞌbãlépi ụ̃nọ́kụ́ be rĩ
ꞌbã wi ĩminí sụ̃sụ́.
16 ꞌBụ̃ ụrụgá wị́lị́wị́lị́ rĩ Úpí ãni,
wó fẽ ụ̃nọ́kụ̂ ꞌbá ꞌbanî.
17 ꞌBá drãlépi rá rĩ ịcụ́ kí Úpí ꞌi ku,
ꞌbá filépi ị̃nádrị̃ gá ꞌbo rĩ ịcụ́ kí Úpí ꞌi ku.
18 Wó ãma icó Úpî rụ́ ịcụ́lé rá la ãma ꞌi,
iꞌdójó úꞌdîꞌda ãzíla jãꞌdâ.
Ĩmi ịcụ́ Úpî rụ́.