119
Ãzị́táŋá Úpí drị̂ kî
1 ꞌBá gẹ̃rị̃ ĩꞌbadrị̂ ꞌbã kí sĩ adrujó kpị ãzíla ị́jọ́ ũnzĩ ngalépi ku,
ímbátáŋá Úpí drị̂ kí tã mbalépi rá rĩ kí drị̃lẹ́ba rú.
2 ꞌBá ãzị́táŋá Úpí drị̂ kí vú ũbĩlépi
ãzíla kí tãmbalépi ásị́ pírí sĩ rĩ kí drị̃lẹ́ba rú.
3 Idé kí ị́jọ́ ũnzí ku,
kí acị́ gẹ̃rị̃ Úpí drị̂ kí agâ sĩ.
4 Mí azị ándrá ãmaní sĩ ãzị́táŋá míní imbálé ãmaní ꞌdĩ
kí tã mbajó múké-múké.
5 Ị́jọ́ mání idélé rĩ kí agá ádrĩ tá ãzị́táŋá mídrị̂ kí tãmba rá la
ma tá pá tu mgbemgbe sĩ ị́jọ́ míní azịlé rĩ kí idéjó rá.
6 Ma icó dó adrulé drị̃nzá sĩ ku,
ádrĩ ãzị́táŋá míní azịlé mání ꞌdĩ kí tãmba pírí rĩ gá.
7 Ma ími ịcụ́ ásị́ mgbã sĩ
mání ị́jọ́ lịŋá mídrị́ pịrị rĩ kí ụ̃nị̃jó rĩ sĩ.
8 Ma ãzị́táŋá mídrị̂ kí tãmba rá,
mí aꞌbejõ ma ku fô!
9 ꞌBá kãrị́lẹ̃ rú rĩ la icó ru ídri tãmbalé ãlá ru rá rĩ gá íngoní ru yã?
Ĩꞌdiní ãzị́táŋá mídrị̂ kí vú ũbĩjó rĩ sĩ.
10 Ma ími ndrụ̃ áma ásị́ pírí sĩ,
ífẽ jõ ámụ mání abá trũ ãzị́táŋá mídrị̂ kí agá rĩ sĩ ãmvé ku fô!
11 Ámba ị́jọ́ mídrị̂ kí tã áma ásị́ gá rá,
má iza rú dó sĩ ị́jọ́ ími ụrụꞌbá gá ku.
12 Úpí, ma ími ịcụ́,
mí imbá ma ãzị́táŋá mídrị̂ kí sĩ.
13 Áma tị sĩ,
ma ãzị́táŋá mídrị́ pírí ãfũlépi ími tị gá rĩ kí la.
14 Ma ãyĩkõ sĩ mání ãzị́táŋá mídrị̂ kí vú ũbĩjó rĩ sĩ
cécé ꞌbá málĩ trũ rĩ ꞌbã uꞌájó ãyĩkõ sĩ rĩ áni.
15 Ma ị́jọ́ ũrã ãzị́táŋá mídrị̂ kí drị̃ gá
ãzíla áꞌbã ásị́ gẹ̃rị̃ mídrị̂ kí drị̃ gá.
16 Ma uꞌá ãyĩkõ sĩ ãzị́táŋá mídrị́ ꞌdĩ kí sĩ,
má icó ị́jọ́ ãvĩlé kí drị̃ gá ku
17 Mí adru ãtíꞌbó mídrị̂ be mũkẽ sĩ ãzíla ma dó sĩ uꞌá ídri rú,
ma dó sĩ ị́jọ́ mídrị̂ tã mba benĩ.
18 Ínzị̃ áma mịfị́ kí, ma dó sĩ
ị́jọ́ ũnĩ-ambamba ãzị́táŋá mídrị̂ agá rĩ kí ndre.
19 Ma uꞌá ụ̃nọ́kụ́ drị̃ gá ꞌdâ sáwã were,
lẽ ízị̃ mání ãzị́táŋá mídrị̂ kí ku.
20 Áꞌbã áma ásị́,
sĩ ị́jọ́ ụ̃nị̃jó ị́jọ́ lịŋá mídrị́ pịrị rĩ drị̃ gá sáwã pírí.
21 Mí uzá ꞌbá drị̃ ũnzí ãzíla wãlé rá
ãzíla ꞌbá fũlépi ãzị́táŋá mídrị̂ agá ãmvé rĩ kí drị̃ gá ꞌbo.
22 Mí anzé ma idemará ãzíla uꞌdáŋá ĩꞌbadrị̂ agâlé rá,
ãꞌdusĩku ámba ãzị́táŋá mídrị̂ kí tã rá.
23 Ũpi anzị drĩ kí táni tị icí ãzíla ị́jọ́ itú áma drị̃ gá rá tí,
ãtíꞌbó mídrị̂ la mụ ị́jọ́ ũrãlé ãzị́táŋá mídrị̂ kí drị̃ gá.
24 Ãzị́táŋá mídrị̂ kí mání ãyĩkõ fẽ,
kí áma imbá nĩ.
25 Má aꞌdé vũ gá pụ́trụ́ agá, áma ũkpó ukó dó rá,
ífẽ mání ũkpó ị́jọ́ mídrị̂ sĩ fô!
26 Má iꞌda míní ị́jọ́ pírí mání idélé rĩ kí rá ãzíla mí umvi ma rá.
Úꞌdîꞌda mí imbá dó ma ãzị́táŋá mídrị̂ kí sĩ.
27 Íko áma ãzã sĩ ãzị́táŋá mídrị̂ kí vãjó,
ãzíla ma dó sĩ ásị́ ꞌbã ímbátáŋá mídrị́ ụ̃sụ̃táŋá ru rĩ kí drị̃ gá.
28 Áma ásị́ gá ụ̃rị̃ fi kí ũcõgõ be nĩ,
ífẽ mání ũkpó ị́jọ́ mídrị̂ sĩ fô!
29 Ífẽ má acị́ gẹ̃rị̃ ũnzí rĩ kí agâ sĩ ku,
ãzíla mũkẽ mídrị̂ sĩ mí imbá mání ãzị́táŋá mídrị̂ ꞌi.
30 Ápẽ ị́jọ́ pịrị rĩ ꞌbo,
áꞌbã áma ásị́ sĩ ãzị́táŋá mídrị̂ tãmbajó.
31 Úpí, ma ãzị́táŋá mídrị̂ kí vú ũbĩ rá,
lẽ mí aꞌbe ma drị̃nzá ịsụ́lé ku.
32 Ma ãzị́táŋá mídrị̂ kí vú ũbĩ ásị́ pírí sĩ,
ãꞌdusĩku mi mání ị́jọ́ vãŋá fẽ rá.
33 Úpí, mí imbá mání ãzị́táŋá mídrị̂ kí ꞌbã ífí,
ãzíla ma dó sĩ kí vú ũbĩ sáwã pírí sĩ.
34 Mí icé mání ãzị́táŋá mídrị̂ ꞌi ãzíla ma dó sĩ ĩꞌdi ãꞌị̃,
ma ĩꞌdi tã mba áma ásị́ pírí sĩ.
35 Íce áma drị̃ ãzị́táŋá mídrị̂ kí sĩ
ãꞌdusĩku ma ãyĩkõ ịsụ́ kí agá.
36 Ífẽ mání ãvá sĩ ãzị́táŋá mídrị̂ kí lẽjó,
adru ãvá mání sĩ málĩ ndrụ̃jó áyụ rĩ ꞌi ku.
37 Ífẽ áꞌbã ásị́ ãko ãzị́ kóru rĩ kí drị̃ gá ku,
ãzíla ífẽ ị́jọ́ mídrị̂ ꞌbã fẽ mání ídri.
38 Ímba ị́jọ́ míní azịlé ãtíꞌbó mídrị̂ ní rĩ tã,
ị́jọ́ ꞌdĩ sĩ ála dó sĩ ími ụ̃rị̃ rá.
39 Ípa ma úꞌdáŋá sĩ áma uꞌdájó mání sĩ idéjó ụ̃rị̃ sĩ rĩ kí agá,
gẹ̃rị̃ míní ị́jọ́ lịjó rĩ ĩꞌdi múké.
40 Índre, álẽ ãzị́táŋá míní imbálé rĩ kí ãvá sĩ,
ífẽ mání ídri úꞌdí la ũnĩ mídrị̂ sĩ.
41 Úpí ífẽ mání lẽtáŋá mídrị́ ãmbógó rĩ sĩ,
ãzíla patáŋá míní ị́jọ́ la azịjó mání rĩ ꞌi.
42 ꞌDã ꞌbã ũngúkú gá, ma dó sĩ ị́jọ́ umvi ꞌbá áma uꞌdálépi rĩ kí tị gá rá
ãꞌdusĩku mání áma ásị́ ꞌbãjó ị́jọ́ mídrị̂ kí drị̃ gá rĩ sĩ.
43 Ífẽ sáwã pírí sĩ ájọ ị́jọ́ mgbã rĩ,
ãꞌdusĩku áꞌbã ásị́ ị́jọ́ lịŋá mídrị̂ drị̃ gá.
44 Ụ́ꞌdụ́ pírí sĩ ma ãzị́táŋá mídrị̂ kí vú ũbĩ,
jãꞌdâ ãzíla ãsị̃ŋá kóru.
45 Ma dó sĩ mụ adrulé drị̃lẹ́mgbọ agá
ãꞌdusĩku má ụ̃ꞌbị̃ ímbátáŋá mídrị̂ kí vú ũbĩlé rá.
46 Ma ãzị́táŋá mídrị̂ kí vú nzelé ũpi ꞌbaní
ãzíla má icó adrulé drị̃nzá sĩ ku.
47 Má ịsụ́ ãyĩkõ mání ãzị́táŋá mídrị̂ kí vú ũbĩjó rĩ sĩ
ãꞌdusĩku álẽ kí rá.
48 Áfẽ ãrútáŋá ãzị́táŋá mídrị́ mání lẽlé rĩ ꞌbaní rá,
ma ị́jọ́ igá ímbátáŋá mídrị̂ kí drị̃ gá.
49 Mí agá drĩ ị́jọ́ ándrá míní azịlé ãtíꞌbó mídrị̂ ní rĩ ꞌi,
ị́jọ́ ꞌdĩ fẽ mání ásị́ ꞌbãŋá rá.
50 Drị̃cịŋá mádrị̂ agá, má ịsụ́ ásị́ ũŋmĩŋá rá
ãꞌdusĩku ị́jọ́ míní azịlé rĩ fẽ mání ídri rá.
51 ꞌBá ãfó ru rĩ kí idemará idé mâsĩ ambamba,
wó má uja ma bụ́lụ́ gá sĩ ãzị́táŋá mídrị̂ kí aꞌbejó ku.
52 Úpí, ma ị́jọ́ igá ị́jọ́ míní lịlé ándrá ídu rĩ kí drị̃ gá,
kí áma ásị́ ũŋmĩ nĩ.
53 Ádrĩ ꞌbá ũnzí rĩ kí ndre ãzị́táŋá mídrị̂ kí anu agá,
ma acá ũmbã sĩ.
54 Sáwã mádrị́ wereŋá mání sĩ uꞌájó ụ̃nọ́kụ́ drị̃ gá ꞌdâ ídri rĩ kí agá,
ma úngó ãzị́táŋá mídrị̂ kí drị̃ gá rĩ kí ngo.
55 Úpí, ị́nị́ sĩ ma ị́jọ́ ũrã ími drị̃ gá,
ị́jọ́ ꞌdĩ sĩ ma dó sĩ ãzị́táŋá mídrị̂ kí tã mba.
56 Má ịsụ́ ãyĩkõ mádrị̂
mání ãzị́táŋá mídrị̂ kí vú ũbĩjó rĩ sĩ.
57 Úpí mi ãko mání lẽlé ídri mádrị̂ agá pírí rĩ ꞌi,
ána ũyõ sĩ ị́jọ́ mídrị̂ kí vú ũbĩjó.
58 Ma ími ndrụ̃ áma ásị́ pírí sĩ.
Ími ásị́ ꞌba adru mání ị̃gbẹ́ ru cécé míní ị́jọ́ lã azịjó ꞌbo rĩ áni.
59 Mání ị́jọ́ ũrã agá ị́jọ́ mání ngalé rĩ kí drị̃ gá,
má uja dó ma sĩ ãzị́táŋá mídrị̂ kí vú ũbĩjó.
60 Sáwã izaŋá kóru,
ma áma afụ sĩ ãzị́táŋá mídrị̂ kí vú ũbĩjó.
61 ꞌBá ũnzí rĩ ụ̃ꞌbị̃ kí ímbá ꞌbelé sĩ áma agụjó ị́jọ́ ũnzí,
wó má ãvĩ ị́jọ́ ãzị́táŋá mídrị̂ kí drị̃ gá ku.
62 Má angá ími ị̃nzị̃lé ị́nị́ ágágá,
ãꞌdusĩku ị́jọ́ lịŋá mídrị̂ kí pịrị.
63 ꞌBá pírí ãzị́ ngalépi míní rĩ kí mâ wọ̃rị́ka kî
ãzíla ꞌbá ãzị́táŋá mídrị̂ kí vú ũbĩlépi rĩ kí abe.
64 Úpí, ụ̃nọ́kụ̂ ga tré lẽtáŋá mídrị́ ãmbógó rĩ sĩ,
mí imbá mání ãzị́táŋá mídrị̂ kî.
65 Úpí, mí idé ị́jọ́ ãtíꞌbó mídrị̂ be múké ꞌbo,
cécé míní jọlé ị́jọ́ mídrị̂ agá rĩ áni.
66 Ífẽ mání ũndũwã ãzíla ị́jọ́ nị̃ŋá,
ãꞌdusĩku áꞌbã ásị́ ãzị́táŋá mídrị̂ kí drị̃ gá.
67 Míní drĩ mání drị̃rịma fẽjó ku rĩ sĩ, ári ị́jọ́ ũnzí kí idélé,
wó úꞌdîꞌda ma dó ị́jọ́ mídrị̂ vú ũbĩ rá.
68 Mi ꞌbá múké la ãzíla mi ị́jọ́ múké rĩ kí nga,
Mí imbá mání ãzị́táŋá mídrị̂ kî fô!
69 ꞌBá ãfó ru rĩ kí ĩnzõ jọ áma ụrụꞌbá gá,
wó ma ãzị́táŋá mídrị̂ kí vú ũbĩ áma ásị́ pírí sĩ.
70 Vã kí ị́jọ́ ku,
wó ma ãyĩkõ ịsụ́ ãzị́táŋá mídrị̂ agá.
71 Ĩꞌdi múké míní mání drị̃rịma fẽjó rĩ sĩ,
ãꞌdusĩku fẽ mání ãzị́táŋá mídrị̂ kí ụ̃nị̃jó.
72 Ãzị́táŋá míní fẽlé rĩ kí mání ũnĩ-ambamba rú,
ndẽ kí gólũdĩ ãzíla sílĩvã álĩfũ-álĩfũ kí rá.
73 Íꞌbã ma rá ãzíla mi áma tã mba múké,
ífẽ mání ị́jọ́ vãŋá, ị́jọ́ ꞌdĩ sĩ ma dó sĩ ãzị́táŋá mídrị̂ kí ụ̃nị̃.
74 ꞌBá míní ãrútáŋá fẽlépi rá rĩ kí adru ãyĩkõ sĩ drĩ kí áma ndre,
ãꞌdusĩku áꞌbã ásị́ ị́jọ́ míní jọlé rĩ drị̃ gá.
75 Úpí, ánị̃ rá ị́jọ́ míní lịlé rĩ kí ꞌbãngá pịrị,
ãzíla ífẽ mání drị̃rịma ãꞌdusĩku ími ásị́ ꞌbã adrujó mgbã rĩ sĩ.
76 Ífẽ lẽtáŋá mídrị́ ãmbógó rĩ ꞌbã ũmŋĩ áma ásị́,
cécé míní ị́jọ́ lã azịjó ãtíꞌbó mídrị̂ ní rĩ áni.
77 Ími ásị́ ꞌba adru mání ị̃gbẹ́ ru ãzíla ma dó sĩ uꞌá ídri rú,
ãꞌdusĩku má ịsụ́ ãyĩkõ ãzị́táŋá mídrị̂ agá.
78 Ífẽ ꞌbá ãfó ru rĩ ꞌba ịsụ́ kí drị̃nzá ĩꞌbã kí márụ́ ị́jọ́ usújó ĩnzõ rú rĩ sĩ,
wó ma ꞌi rĩ gá ma ímbátáŋá mídrị̂ kí drị̃ gá ị́jọ́ ũrã.
79 Ífẽ ãma icí ãma ꞌbá ími ị̃nzị̃lépi rá rĩ kí abe,
kí ꞌbá pírí ãzị́táŋá mídrị̂ kí nị̃lépi rá rĩ kî.
80 Ífẽ áma ásị́ ꞌbã adru ãlá ru ãzị́táŋá mídrị̂ kí vú ũbĩjó,
ãzíla ífẽ má ịsụ́ drị̃nzá ku.
81 Mání ími tẽ agá sĩ áma pajó Úpí, áma ũkpó de ru rá
ãꞌdusĩku áꞌbã ásị́ ị́jọ́ mídrị̂ drị̃ gá.
82 Áma mịfị́ ãndẽ kí dó ị́jọ́ míní azịlé rĩ ꞌbã ru idéjó rĩ drị̃ tẽjó ndrejó rĩ gá rá,
ájọ, “Mi dó amụ́ áma ãzã kolé ãꞌdụtụ́rị̃?”
83 Ma dó ãzị́ kóru cécé íníríkó wáyĩnĩ drị́ ꞌbelé ásé gá rĩ áni,
wó má ãvĩ ị́jọ́ ãzị́táŋá mídrị̂ kí drị̃ gá ku.
84 Ma dó ími tẽ sáwã íngõpí yã?
Mi dó ꞌbá áma ĩcõcõŋãlépi rĩ kí drị̃ gá ị́jọ́ lị ãꞌdụtụ́ yã?
85 ꞌBá ãfó ru ãzị́táŋá mídrị̂ kí ãꞌị̃lépi ku rĩ
ga kí ꞌbụ́ sĩ áma ũgĩjó.
86 Ãzị́táŋá mídrị̂ kí sĩ pírí ála ꞌbãngá ásị́ tị̃ rá,
ípa ma ãꞌdusĩku ꞌbá kí áma ĩcõcõŋã ĩnzõ sĩ.
87 Apá kí tí dó áma ꞌdị sĩ rá,
wó má aꞌbe ãzị́táŋá mídrị̂ kí ku.
88 Lẽtáŋá mídrị́ ãmbógó rĩ sĩ, ífẽ mání ídrĩ rá,
ị́jọ́ ꞌdĩ sĩ ma dó sĩ ãzị́táŋá mídrị̂ kí vú ũꞌbĩ.
89 Úpí, ị́jọ́ mídrị̂ la adru jãꞌdâ,
uja ꞌbãngá ru ꞌbụ̃gâlé ku.
90 Ị́jọ́ mgbã mídrị̂ uja ru ꞌbá ílí pírí kí agá rĩ ꞌbaní ku,
íꞌbã ándrá ụ̃nọ́kụ̂ rá ãzíla tu pá ãngũ la gá.
91 Ãko pírí ace kí drĩ kpere ãndrũ ĩꞌbadrị́ ãngũ gá ãzị́táŋá mídrị̂ sĩ,
ãꞌdusĩku kí pírí ãtiꞌbo mídrị̂ kî.
92 Ãzị́táŋá mídrị̂ drĩ tá adru agá ị́jọ́ mání sĩ ãyĩkõ ịsụ́jó rĩ ꞌi ku la,
ádrã tá nõ ũcõgõ mádrị̂ agá ꞌbo.
93 Má icó ímbátáŋá mídrị̂ kí ãvĩlé ku,
ãꞌdusĩku kí ị́jọ́ sĩ ímba áma tã ídri rú.
94 Ma mí áni, ípa ma!
Má ụ̃ꞌbị̃ ãzị́táŋá mídrị̂ kí vú ũbĩlé rá.
95 ꞌBá ũnzí rĩ kí áma ũtẽ ꞌdịlé,
wó ma ị́jọ́ ũrã ãzị́táŋá mídrị̂ kí drị̃ gá.
96 Ị́jọ́ mání ụ̃nị̃lé rĩ agá átã ị́jọ́ pírí rĩ kí ꞌbã ãsị̃ŋá cí,
wó ãzị́táŋá mídrị̂ ꞌbãngá ãsị̃ŋá kóru.
97 Álẽ ãzị́táŋá mídrị̂ kí ãvá ãmbógó la sĩ!
Ma ị́jọ́ ũrã kí drị̃ gá ị̃tụ̂rụ̃.
98 Ị́jọ́ mídrị̂ fẽ kí má acá ũndũwá ru ndẽ mẹ́rọ́ꞌbá mádrị̂ kí rá,
ãꞌdusĩku kí áma drị̃ ce sáwã pírí sĩ.
99 Ma ị́jọ́ vã ndẽ ꞌbá áma imbálépi rĩ kí pírí rá,
ãꞌdusĩku sáwã pírí sĩ ma ị́jọ́ ũrã ị́jọ́ mídrị̂ kí drị̃ gá.
100 Ma ị́jọ́ vã ndẽ ꞌbá ãmbogo rú rĩ kí rá,
ãꞌdusĩku ámba ãzị́táŋá mídrị̂ kí tã rá.
101 Ásu áma pá ị́jọ́ ũnzí pírí rĩ kí agá ku,
ãꞌdusĩku álẽ ãzị́táŋá mídrị̂ kí tãmbalé rá.
102 Ágã drĩ ãzị́táŋá mídrị̂ kí ku,
ãꞌdusĩku mi ímbápị mádrị̂ ꞌi.
103 Ị́jọ́ mídrị̂ kí ãjị́ ambamba rú
ndẽ kí átã ãnụ́ ãjị́ sĩ rá!
104 Má ịsụ́ ũndũwã ãzị́táŋá mídrị̂ kí agá,
ị́jọ́ ꞌdĩ sĩ ángụ̃ dó sĩ ị́jọ́ ũnzí rĩ kí pírí ũnzí
105 Ị́jọ́ mídrị̂ ĩꞌdi lámbãŋá áma pá drị̂ ꞌi
ãzíla ĩꞌdi dị̃zã rú gẹ̃rị̃ mání acị́jó rĩ agá.
106 Ma ũyõ mání nalé rĩ tãmba,
sĩ ãzị́táŋá mídrị̂ kí tãmbajó.
107 Úpí, drị̃cị́rị̃ mání ịsụ́lé rĩ dó ambamba,
ífẽ má adru ídri rú cécé míní azịlé rĩ áni.
108 Úpí, mí ãꞌị̃ ịcụ́ŋá mání sĩ ími ịcụ́jó rĩ ꞌi,
ãzíla mí imbá mání ãzị́táŋá mídrị̂ kî.
109 Áma ídri sáwã pírí sĩ drị́lẹ́ ũnzĩ agá,
wó má ãvĩ drĩ ị́jọ́ ãzị́táŋá mídrị̂ kí drị̃ gá ku.
110 ꞌBá ũnzí rĩ ꞌbe kí ímbá sĩ áma rụjó,
wó má icó ị́jọ́ mídrị̂ kí aꞌbelé ku.
111 Ãzị́táŋá mídrị̂ kí málĩ míní fẽlé mání jãꞌdâ rĩ kî,
ãꞌdusĩku kí áma ásị́ ní ãyĩkõ fẽ.
112 Ma ãzị́táŋá mídrị̂ kí vú ũbĩ ásị́ pírí sĩ
kpere mání drã agâ.
113 Ángụ̃ ꞌbá ásị́sị́ŋá ị̃rị̃ trũ rĩ kí ũnzí,
wó álẽ ãzị́táŋá mídrị̂ kí rá.
114 Mi ꞌbá áma tãmbalépi ãzíla áma andre tẽlépi rĩ ꞌi,
áꞌbã ásị́ ị́jọ́ míní azịlé rĩ drị̃ gá.
115 Ĩmi ĩdã ĩmi márụ́ ꞌdâ rá, ĩmi ꞌbá ũnzí ꞌdĩ.
Ma dó sĩ ãzị́táŋá Ãdróŋá mádrị̂ drị̂ kí vú ũbĩ.
116 Ímba áma tã cécé míní azịlé rĩ áni ãzíla ma dó sĩ uꞌá ídri rú,
lẽ ífẽ má ịsụ́ drị̃nzá ásị́ ꞌbãŋá mádrị̂ agá ku.
117 Mí ĩdrẽ ma ụrụgá ma dó sĩ áma pa,
ãzíla ma dó sĩ ụ́ꞌdụ́ pírí sĩ ásị́ ꞌbã ãzị́táŋá mídrị̂ kí drị̃ gá.
118 Ígã ꞌbá ãlu ãlu ãzị́táŋá mídrị̂ kí gãlépi sĩ rĩ kí pírí úmgbé,
ãꞌdusĩku ị́jọ́ ĩꞌbã kí itúlé rĩ acá kí dó ãzị́ kóru.
119 Mi ꞌbá ụ̃nọ́kụ́ gá ꞌdâ ũnzí rĩ kí ũsũ ásé gá cécé kórõná ũsũjó rĩ áni,
ị́jọ́ ꞌdĩ sĩ álẽ ãzị́táŋá mídrị̂ kí rá.
120 Áma ụrụꞌbá la yã ími ị́jọ́ sĩ yã-yã,
ma idé ụ̃rị̃ sĩ ị́jọ́ míní lịlé rĩ kí sĩ.
121 Má idé ị́jọ́ pịrị ãzíla múké rĩ kí rá,
lẽ mí aꞌbe jõ ma mẹ́rọ́ꞌbá mádrị̂ kí drị́lẹ́ gá ku.
122 Lẽ ína úyó ru mi ãtíꞌbó mídrị̂ ãzãko rá,
mí aꞌbe jõ ma ꞌbá ásị́ ũnzí áma ĩkpãlépi rĩ kí drị́ gá ku.
123 Áma mịfị́ la ũrõ mání ãzãkoma ũtẽ agá,
patáŋá míní azịlé rĩ be mídrị̂ lé.
124 Mí idé ị́jọ́ ãtíꞌbó mídrị̂ rụ́ lẽtáŋá mídrị́ ãmbógó rĩ sĩ
ãzíla mí imbá ma ãzị́táŋá mídrị̂ kí sĩ.
125 Ma ãtíꞌbó mídrị̂ ꞌi, ífẽ mání ị́jọ́ vãjó,
ị́jọ́ ꞌdĩ sĩ ma dó sĩ ị́jọ́ míní imbálé rĩ kí nị̃
126 Úpí, sáwã míní sĩ ị́jọ́ idéjó rĩ acá dó ꞌbo,
ãꞌdusĩku ꞌbá lẽ kí ãzị́táŋá mídrị̂ kí vú ũbĩlé ku.
127 Álẽ ãzị́táŋá mídrị̂ kí gólũdĩ ní ãndânĩ,
ndẽ átã gólũdĩ ãlápítí ãndânĩ rá.
128 Ãndá-ãndá ru ãzị́táŋá mídrị̂ kí pírí rĩ gá pịrị,
ángụ̃ gẹ̃rị̃ ũnzí rĩ kí pírí ũnzí.
129 Ãzị́táŋá mídrị̂ kí ụ̃sụ̃táŋá ru,
ma kí vú ũbĩ ásị́ pírí sĩ.
130 Údrĩ ị́jọ́ mídrị̂ kí imbá rá, kí adru dị̃zã rú,
ãzíla ĩꞌdi ũndũwã fẽ ꞌbá ũndũwá kóru rĩ nî.
131 Mání ãzị́táŋá mídrị̂ kí vị́ tajó rĩ sĩ,
ma tị ãfũ mgbọ ãzíla ma yã yã.
132 Mí amụ́ ãzíla mí iꞌda mání ásị́ ị̃gbẹ̃
cécé míní idélé ꞌbá pírí ími lẽlépi rĩ ꞌbaní rĩ áni.
133 Cécé míní azịlé mi áma atrị aꞌdé agá rá rĩ áni,
mí aꞌbe ma ndẽlé ꞌbá ũnzí rĩ ꞌbaní ku.
134 Ípa ma ꞌbá áma ĩkpãlépi rĩ kí drị́ gá rĩ sĩ,
ma dó sĩ ãzị́táŋá mídrị̂ kí vú ũbĩ.
135 Mí ajá tị ãtíꞌbó mídrị̂ rụ́ ꞌdõlé lẽtáŋá sĩ
ãzíla mí imbá ma ãzị́táŋá mídrị̂ kí sĩ.
136 Áma mị́ndrẹ la asu cécé ị̃yị́ áni,
ãꞌdusĩku ꞌbá ũbĩ kí ãzị́táŋá mídrị̂ kí vú ku.
137 Úpí, mi ãlá ru
ãzíla ãzị́táŋá mídrị̂ kí ꞌbãngá pịrị.
138 Ãzị́táŋá míní ꞌbãlé rĩ kí ꞌbãngá
múké ãzíla pịrị.
139 Áma ásị́ ve ũmbã sĩ cécé ãcí áni,
ãꞌdusĩku mẹ́rọ́ꞌbá mádrị̂ gã kí ị́jọ́ mídrị̂ kí úmgbé.
140 Ị́jọ́ míní azịlé rĩ kí ꞌbãngá pịrị,
ị́jọ́ ꞌdĩ sĩ álẽ ãzị́táŋá mídrị̂ kí ambamba.
141 Ádrĩ táni adru were rú ãzíla ꞌbá ꞌbá drĩ kí táni áma ꞌbã idemará ru tí,
wó má aꞌbe drĩ ímbátáŋá mídrị̂ kí ku.
142 Ãlãpĩtĩ mídrị̂ ĩꞌdi ukólépi ku la,
ãzíla ãzị́táŋá mídrị̂ kí sáwã pírí sĩ pịrị.
143 Ũcõgõ ãzíla cãndí afí áma ásị́ gá,
wó ãzị́táŋá mídrị̂ ají kí áma ásị́ gá ãyĩkõ.
144 Ãzị́táŋá mídrị̂ kí sáwã pírí sĩ pịrị,
ífẽ mání ị́jọ́ mídrị̂ kí vãlé ãzíla ma dó sĩ uꞌá ídri rú.
145 Ma ími umve ásị́ pírí sĩ,
Úpí, mí umvi ma ãzíla ma dó ãzị́táŋá mídrị̂ kí vú ũbĩ rá!
146 Ma ími umve, ípa ma
ma dó sĩ ãzị́táŋá mídrị̂ kí tãmba.
147 Ma angá ãngũsãrã sĩ ãzíla ma awá sĩ ãzãkoma aꞌị́jó,
áꞌbã áma ásị́ ị́jọ́ míní azịlé rĩ drị̃ gá.
148 Ábĩ mịfị́ ku ị́nị́ ãrã,
ári ãzị́táŋá mídrị̂ kí ꞌa amvilé.
149 Lẽtáŋá mídrị̂ ꞌbã ru ujajó ku rĩ sĩ, Úpí, mí are ma,
mí iꞌda mání ásị́ ị̃gbẹ̃ ãzíla ímba ídri mádrị̂ tã!
150 ꞌBá ũnzí rĩ kí áma andre gá ãni rú,
kí ꞌbá ãzị́táŋá mídrị̂ kí tãmbalépi ku rĩ kî
151 Wó Úpí, mi áma andre gá ãnirú,
ãzíla ãzị́táŋá mídrị̂ kí pírí adru jãꞌdâ.
152 Má ụ̃nị̃ ị́jọ́ ãzị́táŋá mídrị̂ kí drị̃ gá ándrá ídu,
ífẽ ĩꞌbaní adrujó jãꞌdâ.
153 Índre drĩ ũcõgõ mání adrujó ala gá ꞌdĩ ꞌi ãzíla ípa ma,
ãꞌdusĩku má aꞌbe ãzị́táŋá mídrị̂ kí ku.
154 Ãdróŋá, Ílị ị́jọ́ mádrị̂ ꞌi ũnĩ mídrị́ gá rĩ sĩ ãzíla ítrũ ma rá,
ípa ma cécé míní azịlé rĩ áni
155 ꞌBá ũnzí rĩ icó kí ru palé ku
ãꞌdusĩku mba kí ãzị́táŋá mídrị̂ kí tã ku.
156 Wó Úpí, ími ásị́ ndrĩ ambamba,
mí iꞌda mání ásị́ ị̃gbẹ̃ ãzíla ípa ma.
157 Mẹ́rọ́ꞌbá mádrị̂ kí ꞌbá áma ĩkpãlépi rĩ kí abe ũꞌbí ru,
wó má aꞌbe ãzị́táŋá mídrị̂ kí vú ũbĩŋá ku.
158 Ádrĩ ꞌbá ũnzí rĩ kí ndre, ma adru ũcõgõ sĩ,
ãꞌdusĩku mba kí ị́jọ́ mídrị̂ kí tã ku.
159 Úpí, índre drĩ álẽ ãzị́táŋá mídrị̂ kí íngõpí yã rĩ ꞌi.
Lẽtáŋá mídrị̂ icó ru ukólé ku, ị́jọ́ ꞌdĩ sĩ ípa ma.
160 Ãzị́táŋá mídrị̂ kí ꞌbãngá pírí pịrị,
ãzíla ị́jọ́ lịŋá mídrị̂ kí ꞌbãngá pírí pịrị ãzíla jãꞌdâ
161 Drị̃lẹ́ka kí áma ĩcõcõŋã wó má idé ị́jọ́ ãzí ku rú,
wó má ụ̃sụ̃ ị́jọ́ mídrị̂ sĩ ụ̃sụ̃-ụ̃sụ̃.
162 Ma ãyĩkõ sĩ ãzị́táŋá mídrị̂ kí sĩ,
cécé ꞌbá málĩ ịsụ́lépi ãꞌdị́ gá ĩyõ rú rĩ ꞌbã adrujó ãyĩkõ sĩ rĩ áni.
163 Ángụ̃ ị́jọ́ ĩnzõ rú rĩ kí pírí ũnzí,
wó álẽ ãzị́táŋá mídrị̂ kí rá.
164 Ụ́ꞌdụ́ ãlu ãlu sĩ ma ími rụ́ ịcụ́ pâlé ázị̂rị̃,
ãꞌdusĩku ị́jọ́ lịŋá mídrị̂ kí pịrị.
165 ꞌBá ãzị́táŋá mídrị̂ kí tãmbalépi rá rĩ kí adru ásị́ ị̃gbẹ̃ agá
ãzíla ị́jọ́ ãzí icó kí pá sị̃lé ku.
166 Úpí, ma patáŋá mídrị̂ ũtẽ,
ãzíla ma ãzị́táŋá míní azịlé rĩ kí tã mba rá.
167 Ámba ãzị́táŋá míní imbálé rĩ kí tã rá,
álẽ kí áma ásị́ pírí sĩ.
168 Ámba ãzị́táŋá mídrị̂ kí tã ímbátáŋá mídrị̂ kí abe rá,
ãꞌdusĩku ínị̃ ị́jọ́ ãlu ãlu mání idélé rĩ kí rá.
Ãzãkoma zịjó Úpí tị gá rĩ
169 Úpí lẽ áwáŋá mání sĩ ãzãkoma zịjó ími tị gá rĩ ꞌbã ca mí rụ̂lé rá fô!
Ífẽ mání ị́jọ́ kí vãlé cécé míní azịlé rĩ áni.
170 Mí are ị́jọ́ mání zịlé ími tị gá rĩ ꞌi,
ípa ma cécé míní ị́jọ́ la azịjó rĩ áni!
171 Ma ụ́ꞌdụ́ pírí sĩ ími ịcụ́,
ãꞌdusĩku mí áma imbá ãzị́táŋá mídrị̂ kí sĩ mi ꞌi.
172 Ma ãzị́táŋá mídrị̂ kí ngo úngó ru,
ãꞌdusĩku ãzị́táŋá mídrị̂ kí pịrị.
173 Mí adru sáwã pírí sĩ bábá sĩ áma ãzãkojó,
mání ãzị́táŋá míní imbálé ꞌdĩ kí vú ũbĩjó rĩ sĩ.
174 Úpí ma patáŋá mídrị̂ vị́ ta,
má ịsụ́ ãyĩkõ ãzị́táŋá mídrị̂ kí agá rá.
175 Ífẽ má adru ídri rú ma dó sĩ ími ịcụ́,
ífẽ ãzị́táŋá mídrị̂ ꞌbã ko kí áma ãzã rá fô.
176 Má ãvĩ gẹ̃rị̃ mídrị̂ rá cécé kãbĩlõ ãvĩlépi rá rĩ áni,
índrụ̃ ma ãꞌdusĩku ma ãtíꞌbó mídrị̂ ꞌi,
má ãvĩ ị́jọ́ ãzị́táŋá mídrị̂ kí drị̃ gá ku.