120
Ãzãkoma zịjó Úpí drị́
1 Sáwã ị́jọ́ ní ándrá áma ịsụ́jó rĩ sĩ, má umve Úpí ꞌi,
Úpí umvi ma rá.
2 Úpí, ípa ma
ꞌbá ĩnzõ alị́lépi ri kí drị́gá ꞌbá ị́jọ́ jọlépi mũlũmbẽ sĩ rĩ kí abe.
3 Ĩmi ꞌbá ĩnzõ alị́lépi ꞌdĩ, Ãdróŋá la mụ ĩmi rụ́ ãꞌdu idélé yã?
Ĩꞌdi mụ ĩminí drị̃rịma fẽlé íngoní yã?
4 Ĩꞌdi mụ ĩminí drị̃rịma fẽlé ꞌé sị́ ãcí ãsĩkárĩ ꞌbadrị̂ sĩ,
ĩꞌdi mụ ĩminí drị̃rịma fẽlé ãcí kúlú ika rĩ sĩ.
5 Áma drị̃lẹ́ ũnzí mání uꞌájó ꞌbá Mẹ̃sẹ́kị̃ gá rĩ kí drĩdríŋĩ,
jõku Kédã gá rĩ kí drĩdríŋĩ gá rĩ sĩ.
6 Má uꞌá sáwã ãzo rú
ꞌbá ásị́ ị̃gbẹ̃ ngụ̃lépi ũnzí rĩ kí abe.
7 Ma mâ ngá ꞌbá ásị́ ị̃gbẹ̃ lẽlépi la,
Wó ádrĩ ị́jọ́ jọ kí lẽ ãꞌdị́ ꞌdịlé má be.