129
Ãdróŋá zịjó mẹ́rọ́ꞌbá kí ị́jọ́ sĩ
1 Ịsịrayị́lị̃ ꞌbã jọ,
“Mẹ́rọ́ꞌbá iꞌdó kí áma ĩcõcõŋãlé angájó kãrị̃lẹ̃ sĩ,
2 ĩcõcõŋã kí ma ũnzí ũnzí,
wó ndẽ kí drĩ ma ku.
3 Co kí áma ũngúkú,
áma ũngúkú ũsĩ dó sĩ ru cécé ámvụ́ sõlé ãcó tị́ drị̂ sĩ rĩ ꞌbã ru ũsĩjó rĩ áni.”
4 Wó Úpí ĩꞌdi múké,
ãtrũ ma ꞌbá ũnzí rĩ kí drị́gá rá.
5 Lẽ ꞌbá pírí Zị̃yọ́nị̃ ngụ̃lépi ũnzí rĩ kí
ꞌba ịsụ́ kí drị̃nzá ãzíla ꞌba uja kí tị sĩ apájó.
6 Lẽ ꞌba adru kí cécé ásé angálépi jó drị̃ gá rĩ áni,
ásê la ꞌi rá ꞌdĩ sĩ zo drĩ ku rú.
7 ꞌBá ámvụ́ sõlépi rĩ drĩ kí unze,
icó kí galé ĩꞌdidrị́ gá ku.
8 ꞌBá ãzí alịlépi ĩꞌdi andre gâsĩ rĩ icó kí jọlé la,
“Úpí ꞌbã fẽ míní drị̃lẹ́ba,
ãzíla ãwi míní sụ̃sụ́ rụ́ Úpí drị̂ sĩ.”