138
Ĩfẽ ãwãꞌdĩfô Úpí nî
1 Ma ãwãꞌdĩfô fẽ Úpí míní áma ásị́ pírí sĩ;
ma úngó ngo sĩ ími ịcụ́jó ãdroŋa kí drị̃lẹ́ gá.
2 Ma ãvụ̃ jó mídrị́ ãlá rĩ gâlé ru
sĩ ãwãꞌdĩfô fẽjó rụ́ mídrị̂ ní
ãꞌdusĩku lẽtáŋá mídrị́ ãmbógó rĩ ĩꞌdi jãꞌdâ ãzíla ị́jọ́ mídrị̂ kí ị́jọ́ mgbã rĩ kî,
mí inga rụ́ mídrị̂ ꞌi
ị́jọ́ mídrị̂ kí abe ụrụgá ãko pírí ꞌbaní ãndânĩ.
3 Ụ́ꞌdụ́ mání ími zịjó ꞌdã sĩ, mí umvi ma rá;
ífẽ mání ũkpó ũkpõ mídrị̂ sĩ.
4 Ũpi ụ̃nọ́kụ́ drị̃ gá ꞌdâ rĩ kí pírí mụ Úpí míní ãwãꞌdĩfô fẽlé,
ãꞌdusĩku are kí ị́jọ́ ãfũlépi ími tị gá rĩ kí rá.
5 Kí mụ úngó ngolé ị́jọ́ Úpí míní ngalé rĩ kí drị̃ gá,
ãzíla dị̃zã Úpí mídrị́ ãmbógó rĩ drị̃ gá,
6 Úpí ꞌbã táni adru agá ụrụgá wị́lị́wị́lị́ rá tí, ĩꞌdi ꞌbá ru irilépi vũ gá ri kí tãmba rá,
wó ĩꞌdi ru ịgbọ́ ꞌbá ãfó ru rĩ ꞌbarụ́ rĩ sĩ rá-rá ru.
7 Ị́jọ́ ũkpó-ũkpó ri drĩ kí táni áma andre ce agâ nĩ rá tí,
mi mụ áma tãmbalé ũmbã mẹ́rọ́ꞌbá mádrị̂ ꞌbadrị̂ agá rĩ sĩ rá.
Mi ãꞌdị́ ꞌdị mẹ́rọ́ꞌbá mádrị́ adrulépi mání ũmbã sĩ rĩ kí abe,
ãzíla mi áma pa ũkpõ mídrị̂ sĩ rá.
8 Úpí la mụ ị́jọ́ ĩꞌdi ꞌbã itúlé mání ri kí ngalé rá;
ãꞌdusĩku lẽtáŋá ĩꞌdidrị́ ãmbógó rĩ ĩꞌdi jãꞌdâ.
Úpí, mí aꞌbejõ ãzị́ míní ngalé ꞌbo rĩ ku.