139
Ãdróŋá nị̃ ị́jọ́ pírí kí cé
1 Úpí, índrụ̃ asị́ mádrị̂ ꞌa ꞌbo
ãzíla ínị̃ ị́jọ́ mání adrujó ala gá rĩ kí pírí cé!
2 Ínị̃ sáwã mání rijó vũ gá ri kí mání angájó ụrụgá rĩ be rá;
ínị̃ ígátáŋá mádrị̂ kí mání adru agá álị́-álị́ ru pírí cé.
3 Mi áma ndre mání acị́ agá gẹ̃rị̃ gâsĩ ãzíla mání áma la agá vũ gá;
ínị̃ ị́jọ́ mání idélé rĩ kí pírí rá.
4 Átã ị́jọ́ ãfũ drĩ áma tị gá ku rú,
Úpí, ínị̃ ma mụ ãꞌdu ị́jọ́ jọlé yã rĩ cé.
5 Íce áma andre wókõ pírí gâsĩ,
mi áma tãmba ũkpó mídrị̂ sĩ.
6 Ị́jọ́ míní nị̃lé áma drị̃ gá rĩ ĩꞌdi ụ̃sụ̃táŋá ru ãzíla álị́ ambamba;
má icó dó sĩ ĩꞌdi vãlé ku!
7 Má icó dó áma zị̃lé Úríndí mídrị̂ sĩ íngõlé?
Má icó dó apálé mí sĩ íngõlé?
8 Ádrĩ tụ ꞌbụ̃ gâlé, mi ꞌdãá cí;
ádrĩ fi áma lalé ị̃nádrị̃ agá, mi ꞌdãá cí.
9 Ádrĩ tá nga ãngũ ị̃tụ́ ꞌbã sĩ agájó rĩ gâlé,
ádrĩ mụ uꞌálé ãngũ álị́ ị̃tụ́ ꞌbã ꞌdejó rĩ gá,
10 átã mi adru ꞌdãá cí sĩ áma drị̃ cejó
ãzíla mi adru ꞌdãá cí sĩ áma ãzãkojó.
11 Ádrĩ jọ la, “Ãngũ ịnị ꞌbã aku ma cí,
ãzíla dị̃zã áma andre gá rĩ ꞌba acá ị́nị́ ru,”
12 wó átã ị́nị́ icó ꞌbãngá áma zị̃lé míní ku;
ị́nị́ ĩꞌdi ꞌbãngá míní imve tárá-tárá ị̃tụ́ áni
ãꞌdusĩku ị́nị́ ají kí ꞌbãngá ru míní dị̃zã be ãlu.
13 Mí idé áma ụrụꞌbá ꞌa gâlé ru rĩ kí mi ꞌi;
mí icí ma ãko ãlu rú mâ ãndrẽ ꞌbã ꞌa gâlé mi ꞌi.
14 Ma ími ịcụ́, ãꞌdusĩku mí idé ma túlí-túlí ãzíla ũnĩ-ambamba rú.
Ãzị́ míní ngalé ri kí ụ̃sụ̃táŋá ru;
ánị̃ ị́jọ́ ꞌdĩ áma ásị́ pírí sĩ.
15 Sáwã áma ĩfãkã kí ũꞌbãjó ꞌdã sĩ,
ụ́ꞌdụ́ áma icíjó ũní-ũní ru mâ ãndrẽ ꞌa gâlé ꞌdãsĩ,
ãko ãzí ru zị̃lépi míní cí la ándrá ꞌdáyụ.
16 Índre ándrá áma ụrụꞌbá drĩ ũꞌbãlé ku ꞌdã kí cé;
ísĩ ándrá ụ́ꞌdụ́ mádrị̂ kí
ꞌbã kãlãfe bụ́kụ̃ mídrị̂ agá pírí cí
ꞌdĩ sĩ ụ́ꞌdụ́ ãzíla alị drĩ ãlu ku rú.
17 Ãdróŋá, ígátáŋá mídrị́ áma drị̃ gá ri kí mání ụ̃rọ̃drị́ ru!
Má icó kí kãlãfe lãlé ku!
18 Ádrĩ tá kí lã yã áni,
ndẽ kí kãlãfe sĩ cínákí rá!
Ádrĩ angá ụ́ꞌdụ́ gá rĩ sĩ,
ma isụ́ la mi drĩ ngá má be cí!
19 Ãdróŋá, ídrĩ tá ꞌbá ị́jọ́ ũnzí ngalépi rĩ kí ụꞌdị́ rá la múké fô!
Ĩmi ꞌbá ꞌbá kí ụꞌdị́lépi ꞌdĩ, ĩmi ĩdã ĩmi áma andre gá rĩ sĩ rá.
20 Kí ị́jọ́ jọ ími ụrụꞌbá gá ígátáŋá ũnzí sĩ;
mẹ́rọ́ꞌbá mídrị̂ kí ími rụ́ iza.
21 Úpí, ángụ̃ ꞌbá ími ngụ̃lépi ũnzí ri kí ũnzí!
Ángụ̃ ꞌbá ị́jọ́ mídrị̂ kí lẽlépi ku rĩ kí ũnzí!
22 Ángụ̃ kí ũnzí ãndá ãndá ru;
Ma kí lã mâ mẹ́rọ́ꞌbá ru.
23 Ãdróŋá, índrụ̃ áma ásị́ ꞌa, mi dó sĩ ị́jọ́ áma ásị́ gá rĩ kí nị̃!
Mí ụ̃ꞌbị̃ ma ãzíla ínị̃ dó sĩ ị́jọ́ mání ũcõgõ fẽlépi rĩ kî!
24 Índre drĩ ị́jọ́ ãzí ũnzí la kí nõ áma ꞌa gá cí yã áni,
ãzíla íce áma drị̃ gẹ̃rị̃ sĩ ídri ukólépi ku rĩ ịsụ́jó rĩ gá.