143
Ãzãkoma aꞌị́jó Ãdróŋá drị́
1 Úpí, mí are áma áwáŋá fô,
mí are mãmálá mání ꞌbãlé ími drị̃lẹ́ gá ꞌdĩ ꞌi!
Mí umvi ma mũkẽ mídrị̂ sĩ;
mí amụ́ áma ãzãkolé.
2 Íꞌbã ãtíꞌbó mídrị̂ ị́jọ́ lịŋá gá ku,
ãꞌdusĩku ꞌbá ãzí ụ̃nọ́kụ́ drị̃ gá ꞌdâ ídri rú ími drị̃lẹ́ gá ãlá ru la ꞌdáyụ.
3 Mẹ́rọ́ꞌbá kí áma ndrụ̃,
andi kí ma kpékpé;
ꞌbã kí ma mãbụ́sụ̃ gá ãngũ ịnị gá,
ma dó sĩ cécé ꞌbá drãlépi ídu rĩ áni.
4 Ị́jọ́ ꞌdĩ úríndí mádrị̂ aꞌdé dó rá,
má acá dó sĩ ásị́ agá ũkpó kó ru.
5 Má agá ị́jọ́ ándrá ụ́ꞌdụ́ alịlépi ꞌbo rĩ sĩ ri kí,
má ũrã ị́jọ́ ãko pírí míní idélé ri kí drị̃ gá,
ãzíla áꞌbã ásị́ ãzị́ míní ngalé ri kí drị̃ gá.
6 Má aja áma drị́ kí ími drị̃lẹ́ gá mání ími zị agâ;
áma ídri lẽ mi cécé ãngũ ãꞌí rĩ ꞌbá uzogó lẽjó rĩ áni.
7 Mí umvi ma gbõrú, Úpí,
ásị́ ꞌbãŋá mádrị̂ ukó rá,
Ízị̃ mi mání ku fô,
jõ íni ku ma mụ adrulé cécé ꞌbá filépi ĩnádrị̃ gá ri kí áni!
8 Ífẽ má are ị́jọ́ lẽtáŋá mídrị́ ukólépi ku rĩ drị̂ ụ̃ꞌbụ́tị sĩ
ma dó sĩ ásị́ ꞌbã ími drị̃ gá.
Mí iꞌda mání gẹ̃rị̃ mání sĩ mụjó rĩ,
ãꞌdusĩku áfẽ áma ídri pírí mídrị́.
9 Úpí, ípa ma mẹ́rọ́ꞌbá mádrị̂ kí drị́ gá
ãꞌdusĩku mi ãngũ mání sĩ áma zị̃jó rĩ ꞌi.
10 Mí imbá ma ị́jọ́ míní lẽlé rĩ idéjó,
ãꞌdusĩku mi Ãdróŋá mádrị̂ ꞌi,
úríndí mídrị́ Ãlá rĩ
ꞌbã ce ámadrị̃ ãngũ ãngũ múké rĩ agâ sĩ.
11 Úpí, ímba áma ídri tã sĩ dị̃zã fẽjó rụ́ mídrị̂ ní,
mũkẽ mídrị̂ sĩ, mí anzé ma ũcõgõ agá rĩ sĩ rá fô!
12 Lẽtáŋá mídrị́ aꞌdélépi ku rĩ sĩ, ífẽ mẹ́rọ́ꞌbá mádrị̂ ꞌbã ĩyãŋã kí tú,
mí ị̃lị̃kị̃ mẹ́rọ́ꞌbá mádrị̂ kí pírí,
ãꞌdusĩku ma ãtíꞌbó mídrị̂ ꞌi.