142
Ãzãkoma aꞌị́jó Ãdróŋá drị́
1 Má awá rere Úpí drị́ ãzãkoma aꞌị́jó,
áꞌbã mãmálá Úpí drị̂ sĩ ásị́ ị̃gbẹ̃ aꞌị́jó.
2 Má ají ununuŋá mádrị̂ ĩꞌdi drị̃légá,
Ánze ị́jọ́ mádrị́ cãndí fẽlépi rĩ kí ĩꞌdi nî.
3 Ị́jọ́ ní áma ndẽjó ꞌbo rĩ sĩ,
ínị̃ gẹ̃rị̃ mádrị̂ cé la mi ꞌi.
Gẹ̃rị̃ mání acị́jó rĩ gá,
mẹ́rọ́ꞌbá mádrị̂ ũꞌbã kí ma mãtégõ sĩ.
4 Ándrụ̃ ꞌbá ãzí amụ́lé ãzíla áma ãzãkolé,
ꞌbá ãzí asílépi áma ị́jọ́ sĩ la yu.
ꞌBá ãzí áma tã mbalépi la yu,
ꞌbá ãzí áma ídri tã mbalépi la yu.
5 Má awá mí ru Úpí;
Ájọ míní, “Mí ãngũ mání sĩ áma zị̃jó rõ.
Mi mání ãko pírí mání lẽlé ídri ꞌdĩ agá ꞌdâ rĩ kí fẽ nĩ.”
6 Mí are áma áwáŋá fô,
ãꞌdusĩku ị́jọ́ ndẽ ma rá;
ípa ma mẹ́rọ́ꞌbá mádrị̂ áma ndrụ̃lépi rĩ ꞌbadrị́,
ãꞌdusĩku kí mání ũkpó ru ãndá nĩ.
7 Mí anzé ma ũcõgõ agá rĩ sĩ,
ma dó sĩ ími ịcụ́ ꞌbá mídrị́ ãlá ru tralépi rĩ kí drĩdríŋĩ gá,
mũkẽ mídrị́ ídri mádrị̂ agá rĩ sĩ.