147
Úpí la ꞌbá kí ásị́ ũmŋĩ nĩ
1 Ĩmi ịcụ́ Úpí ꞌi!
Ĩꞌdi múké ãmaní úngó ngojó sĩ Ãdróŋá ãmadrị̂ ịcụ́jó,
ĩꞌdi ị́jọ́ ãyĩkõ rú la ãzíla mgbã la sĩ ĩꞌdi ịcụ́jó.
2 Úpí la Yẹ̃rụ́sãlẹ́mụ̃ sị úꞌdí ru nĩ,
ĩꞌdi ꞌbá Ịsịrayị́lị̃ drị́ ãsĩkárĩ Bãbụ̃lọ́nị̃ drị̂ ꞌbã kí ándrá ꞌdụlé mãbụ́sụ̃ rú rĩ kí ají vúlé rá.
3 Ĩꞌdi ꞌbá ũcõgõ rú ri kí ásị́ ũŋmĩ rá
ãzíla ĩꞌdi ãkõzá kí ásị́ gá rĩ fẽ jalé rá.
4 Ĩꞌdi lẽlẽgó kí ꞌbã kãlãfe lã nĩ,
fẽ lẽlẽgó ãlu ãlu ní rụ́ pírí cí.
5 Úpí ãmadrị̂ ĩꞌdi ãmbógó ru ãzíla ũkpõ ĩꞌdidrị̂ ãmbógó ru,
ꞌbá ãzí icó ị́jọ́ vãŋá ĩꞌdidrị̂ ụ̃ꞌbị̃lé ku.
6 Úpí la ꞌbá ru irilépi vũ gá ri kí inga ụrụgá,
wó ĩꞌdi ꞌbá ị́jọ́ ũnzí ngalépi rĩ kí ịsị́ vũ gá.
7 Ĩngo úngó ãwãꞌdĩfô fẽjó ri kí Úpí ní,
ĩco úngó Ãdróŋá ãmadrị̂ ní ụ̃ꞌdị́ sĩ!
8 Aku ꞌbụ̃ kí ị́rị́tị sĩ cí,
ĩꞌdi uzogó fẽ ꞌdịlé ụ̃nọ́kụ́ drị̃ gá nĩ;
ĩꞌdi ásé fẽ dụlé ꞌbé kí drị̃ gá nĩ.
9 Ĩꞌdi ãkónã fẽ ãnãkpá ásé agá rĩ ꞌbaní nĩ,
ĩꞌdi ãkónã fẽ kúrúke mvaka ꞌbaní drĩ kí awá ãbị́rị́ sĩ rĩ gá.
10 Adru ãyĩkõ sĩ ũkpõ fãrásĩ drị̂ sĩ la ku,
jõku adru ãyĩkõ la ĩꞌdi fụ ãsĩkárĩ ásị́ ũkpó ri kí sĩ la ku,
11 wó Úpí la uꞌá ãyĩkõ sĩ la ꞌbá ĩꞌdi ụ̃rị̃lépi rá rĩ kî sĩ,
ĩꞌdi uꞌá ãyĩkõ sĩ la ꞌbá ásị́ tị̃lépi lẽtáŋá ĩꞌdidrị́ ãmbógó rĩ drị̃ gá rĩ kî sĩ.
12 Yẹ̃rụ́sãlẹ́mụ̃, mí ịcụ́ Úpí ꞌi!
Zị̃yọ́nị̃, mí ịcụ́ Ãdróŋá mídrị̂ ꞌi,
13 ãꞌdusĩku fẽ kẹ̃jị́tị mídrị̂ ꞌbaní adrujó ũkpó ru
ãzíla fẽ drị̃lẹ́ba ꞌbá bõrõ mídrị̂ agá ꞌdâ ꞌdĩ ꞌbaní nĩ.
14 Ĩꞌdi ásị́ ị̃gbẹ̃ ají sụ́rụ́ mídrị̂ agá pírí
ãzíla ĩꞌdi ãbị́rị́ mídrị̂ de ãkónã múké ãndânĩ ri sĩ.
15 Ĩꞌdi ãzị́táŋá fẽ ụ̃nọ́kụ́ drị̃ gá ꞌdâ pírí
ị́jọ́ ĩꞌdidrị̂ la acị́ ụ̃nọ́kụ́ drị̃ gá ꞌdâ gbõrú!
16 Ĩꞌdi ũfú iré cécé kãbĩlõ ꞌbíko imve rĩ áni,
ĩꞌdi andrẹlị́ imve sí áni rĩ iré cécé úfóró áni.
17 Ĩꞌdi sí fẽ zõlé cécé írã áni;
ꞌbá ãzí icó ũlí ị̃gbẹ́ ĩꞌdi ꞌbã tị ãpẽlé rĩ ꞌbã tị talé ku!
18 Wó ãzị́táŋá ĩꞌdi ꞌbã fẽlé ri sĩ sí la ra rá,
ĩꞌdi ũlí ĩꞌdidrị̂ tị ãpẽ ãzíla ị̃yị́ la dị rá.
19 Ĩꞌdi ị́jọ́ ĩꞌdidrị̂ kí iꞌda Yãkóꞌbõ ní,
ĩꞌdi ãzị́táŋá ĩꞌdidrị̂ kí icé ị́jọ́ lịŋá ĩꞌdidrị̂ be Ịsịrayị́lị̃ ní.
20 Idé ị́jọ́ ꞌdi kí sụ́rụ́ ãzí ndú la ní ku,
nị̃ kí ãzị́táŋá ĩꞌdidrị̂ kí ku.
Ĩmi ịcụ́ Úpí ꞌi!